Bakomfwa Shani?
1. Mulandu nshi umulimo wa kushimikila limo ukosela, nomba cinshi cilenga ukuti tutwalilile fye ukushimikila?
1 Apo ubushiku bwa kwa Yehova bulepalamina lubilo lubilo, tufwile ukubombesha ukwafwa abantu na bambi abengi ukwishiba Lesa bwino no bufwayo bwakwe ku bantunse. (Yoh. 17:3; 2 Pet. 3:9, 10) Uyu mulimo limo ulakosa, umulandu wa kuti abengi tababikako amano nelyo nalimo balatupumya ilyo tuleshimikila. (2 Pet. 3:3, 4) Nangu cibe fyo, tufwile ukucetekela ukuti kucili abantu na bambi mu cifulo tubombela abakapokelela imbila nsuma ilyo bakayumfwa. Abo bantu bakomfwa shani apabula uwa kubila?—Rom. 10:14, 15.
2. Bushe ica kumwenako ca kwa Paulo citukosha shani?
2 Ifya Kucita Ilyo Baletulwisha: Apo kucili na bambi abengatemwa ukumfwa imbila nsuma iya Bufumu, tatufwile ukuleka ukushimikila. Umusumba wa Filipi wali e musumba wa kubalilapo ku Bulaya umo umutumwa Paulo ashimikiile imbila nsuma. Ilyo Paulo na Sila bababepeshe imilandu ya bufi, balibomine ku nkonto no kubapoosa mu cifungo. (Imil. 16:16-24) Lelo, ubu bucushi tabwalengele Paulo ukufuupuka ku mwenso. Ilyo aile ku Tesalonika, umusumba wakonkelepo ukutandalila pa bulendo bwakwe ubwa bumishonari, ‘alishipile pantu Lesa alimukoseshe.’ (1 Tes. 2:2) Bushe ica kumwenako ca kwa Paulo tacitukosha na ifwe ‘ukukananenuka’?—Gal. 6:9.
3. Cinshi cingalenga abantu bamo ukwaluka nangu ca kutila kale tabalefwaya ukumfwa imbila nsuma?
3 Abengi abalekaana imbila nsuma pa myaka iingi balyaluka. Ubwafya bwa ndalama, ukulwala, ukufwilwa, nangu ifintu fimbi ifilecitika mu calo ifishaseekele kale kuti fyalenga abantu ukwaluka. (1 Kor. 7:31) Bamo abo balekaanya ku bafyashi babo nomba balikula kabili kuti batemwa ukumfwa imbila nsuma. Nga twatwalilila ukushimikila ninshi tulepeela aba bantu ishuko lya ‘kulilila kwi shina lya kwa Yehova’ ilyo akashita kashilapwililila.—Rom. 10:13.
4. Cinshi cilenga ukuti tutwalilile ukushimikila “ukwabula ukuleka”?
4 “Ukwabula Ukuleka”: Ukutemwa uko twatemwa Lesa na bantu banensu kukatulenga ukushimikila no kupanga abasambi “ukwabula ukuleka,” nga filya fine abatumwa ba kubalilapo bacitile. (Imil. 5:42) Abengi lelo ‘baleteta no kulilishika pa fya bunani’ ifilecitika. (Esek. 9:4) Ala mwandini aba musango uyu balomfwa bwino no kusansamuka ilyo baumfwa imbila nsuma! Nangu fye ni lintu abengi balekaana ukumfwa, Baibolo yalitweba ukuti ukubombesha kwesu kulalenga Yehova ukusekelela.—Heb. 13:15, 16.