Ifya Kubomfya Icitabo ca “Ikalilileni” pa Kutungulula Amasambililo ya Baibolo

1. Cinshi icitabo ca “Ikalilileni” calembelwa?

¹ Twalitemenwe sana ilyo twapokelele icitabo cipya ica kuti “Ikalilileni mu Kutemwa kwa Lesa” pa Kulongana kwa Citungu ukwaleti “Ukutungululwa no Mupashi wa kwa Lesa”! Nge fyo babilishe pali uku kulongana, ico balembele ici citabo kufwaya ukutwafwa ukwishiba ifyo Yehova atusambilisha pa mibele isuma no kuti iyi ine mibele tuitemwe, te kutusambilisha amasambililo ya mu Baibolo. Tatwakulapeela abantu ici citabo ilyo twakulashimikila ku ng’anda ne ng’anda.

2. Bushe ici citabo cikabomfiwa shani kabili ni bani mwingasambilila na bo ukubomfya ici citabo?

² Ici citabo e co tukalasambilila na basambi ba Baibolo pa numa ya kupwisha icitabo ca Ico Baibolo Isambilisha.a Muleibukisha ukuti abantu balipusanapusana, bamo balasambilila bwangu e lyo bambi bena kano mwabatekanishisha. Mulingile ukutungulula isambililo ukulingana ne fyo umusambi aba. Shininkisheni ukuti aumfwikisha ifyo mulesambilila. Te kuti ciwame ukubomfya ici citabo ukutendeka amasambililo ya Baibolo ku bantu abasambilila kale ifitabo ifingi lelo abashisangwa mu kulongana kabili abamoneka fye ukuti tabafwaya ukulakonka ifyo basambilila mu Baibolo.

3. Bushe tufwile ukucita shani nga ca kuti pali ino nshita tuletungulula isambililo lya Baibolo mu citabo ca Pepeni?

³ Nga ca kuti muletungulula isambililo mu citabo ca Pepeni kabili muli mupepi no kupwa, nalimo kuti mwapingulapo ukupwisha ifipandwa fisheleko no kukoselesha umusambi ukuibelengela umwine icitabo ca “Ikalilileni.” Nga ca kuti ifipandwa ifisheleko fingi, kuti cawama mwatendeka ukusambilila ici citabo cipya ukufuma pa cipandwa ca kubalilapo. Ni mwe mufwile ukumona nga kuti caba fye bwino ukulanshanya no musambi amashiwi yalundwako ayaba ku mpela ya ici citabo, nga filya tucita na mu citabo ca Ico Baibolo Isambilisha.

4. Cinshi mufwile ukucita nga ca kuti umusambi abatishiwa ilyo mushilapwa ukusambilila ifitabo fibili?

⁴ Nga ca kuti umusambi abatishiwa ilyo mushilapwa ukusambilila ifitabo fyonse fibili, mufwile ukutwalilila ukusambilila mpaka mwapwa ukusambilila icitabo ca “Ikalilileni.” Nangu ca kuti umusambi nabatishiwa nomba, mufwile ukucita lipoti inshita, icipempu, ne sambililo. Kasabankanya uo mwabomba nankwe kabili alandapo pe sambililo na o kuti apenda inshita.

5. Bushe icitabo ca “Ikalilileni” kuti cabomfiwa shani ukwafwa bakasabankanya aba kuti apo bashimikilile palipita ne nshita iitali?

⁵ Nga ca kuti uwa muli Komiti ya Mulimo iya pa Cilonganino amweba ukutungulula Isambililo lya Baibolo no muntu uushishimikila, kuti nalimo bamweba ukusambililamo fye ifipandwa fimo fimo mu citabo ca “Ikalilileni.” Aya masambililo tayafwile ukutungululwa pa nshita iitali. Ala mwandini ici citabo cisuma nga nshi, kabili cilembelwe ukuti citwafwe ukwikalilila “mu kutemwa kwa kwa Lesa”!—Yuda 21.

[Futunoti]