Muleangusha Ifyebo pa Kusambilisha
1. Ni nshila nshi imo iisuma sana iya kusambilishishamo bwino?
1 Pa kusambilisha bwino abantu tufwile ukula-angusha. Nga twamona ifyo Kasambilisha Mukalamba Yesu alesambilisha na ifwe kuti ‘twalasambilisha bwino.’—2 Tim. 4:2; Yoh. 13:13.
2. Bushe ukwangusha pa kusambilisha calola mwi, kabili nga twa-angusha pa kusambilisha kuti caba shani?
2 Mulelanda Amashiwi Ayayanguka: Mu lyashi lya pa lupili, mwaba ifishinka ifyacindama nga nshi ifyo takuli umuntu nangu umo uwingafikako ukulanda, lelo fyaba fye mu mashiwi ya-anguka ukumfwa. (Mat., ifipa. 5-7) Amabumba ayaumfwile uko Yesu alesambilisha “yalipapile imisambilishishe yakwe.” Abashilika abo batumine ku kuyamwikata calibapeseshe amano, bati no kuti: “Takwatala akuba nangu umo uulanda ngo yu muntu.” (Mat. 7:28, 29; Yoh. 7:46) Kanshi pa kuti tusambilishe abantu icine, tatulingile ukulalanda ifyakosa nelyo ukubomfya ifilangililo ifya-afya ukulondolola. Kuti twalondolwela abantu icine mu nshila fye iya-anguka.
3. Cinshi nalimo icingalenga ukuti bamo bafushe ifyebo pa kusambilisha, nomba kuti twacita shani pa kuti tatufushishe?
3 Muleishiba Ubwingi bwa Fyebo Mwalasambilisha: Pa kwishiba ubwingi bwa fyebo ifyo Yesu aali no kusambilisha, aletala atontonkanya pa fyo abantu alesambilisha baali. (Yoh. 16:12) Na ifwe tufwile ukwishiba abantu tuleshimikila no kwishiba ifyebo twingabasambilisha, maka maka nga tuleshimikila balupwa besu, abapya, nelyo abaice. Nangu bamoneke ukuti balekutika, na lyo line, tatufwile ukufusha ifyebo. Abafumacumi bakatwalilila ukusambilila no kwishiba Lesa wa cine, Yehova.—Yoh. 17:3; 1 Kor. 3:6.
4. Mulandu nshi cabela bwino ukubika amano ku fishinka ifikalamba ukucila ukulafusha ifyebo?
4 Mulebika Amano ku Fishinka Ifikalamba: Yesu talefusha ifyebo pa kusambilisha. Ilyo atile, “Bonse ababa mu nshiishi . . . bakomfwa ishiwi lyakwe no kufumamo,” tayali ni nshita ya kulondolola ififulo fibili uko abantu bakabuukila. (Yoh. 5:28, 29) Pa kutungulula amasambililo ya Baibolo, tatufwile ukulalanda ifishilimo, lelo tufwile ukubika amano ku fishinka ifikalamba.
5. Mapaalo nshi twingakwata nga tuleangusha pa kusambilisha?
5 Ala tulatasha Yehova pa kulatusambilisha fyonse ifyo tulingile ukwishiba mu nshila fye iya-anguka! (Mat. 11:25) Kanshi na ifwe natulebombesha pa kuti tuleangusha pa kusambilisha, e lyo no mulimo wingalawama.