Bushe Amenso Yenu Yalolesha Fye pa Cintu Cimo?

1. Bushe ‘ukulolesha fye pa cintu cimo’ kwalola mwi?

¹ Amenso yesu nga yalelolesha sana pa cintu cimo, ico cine tuleloleshapo cikalenga tukacitepo fimo. Kanshi amashiwi Yesu alandile ya cine ayatila: “Amenso yobe nga yalolesha fye pa cintu cimo, umubili obe onse ukaba umwabuuta.” (Mat. 6:22) ‘Ukulolesha fye pa cintu cimo’ kwalola mu kuti ilinso lyesu ilya ku mupashi lilelolesha fye pa kucita ukufwaya kwa Lesa epela. Tukalatangisha fye umulimo wa Bufumu kabili tatwakapumbulwe ku fya mu calo nelyo imilimo imbi iingapumfyanya umulimo wa kushimikila.

2. Finshi fingatupumbula, lelo finshi ifingatwafwa?

² Tulingile Ukulaibebeta: Ifyo basabankanya pa milabasa ukuti e fyo tulingile ukukwata, e lyo ne fintu ifyo bambi bakwata kuti fyalenga twapumbulwa. Ilyo tatulatendeka umulimo uukalamba nelyo ilyo tatulashita icipe cimo, icikafwaya ukuti tukapoosepo inshita iikalamba, indalama ishingi, nelyo amaka pa kuti tulecisakamana, intanshi tufwile ‘twapenda ishingapooswapo’ pa kuipusha atuti, ‘Bushe umulimo wandi kuli Yehova ukawaminako nelyo ukabwelela inuma? (Luka 14:28; Fil. 1:9-11) Mu nshita mu nshita cilaba bwino ukulatontonkanya pa nshila sha kwangushishamo imikalile yesu pa kuti tulebombesha umulimo wa kushimikila.—2 Kor. 13:5; Efes. 5:10.

3. Cinshi twingasambililako kuli nkashi umo uwacefesheko ifya kucita?

³ Ilyo nkashi umo atendeke umulimo wa bupainiya bwa nshita shonse, atwalilile fye ne ncito ya kubomba inshita yonse nangu ca kuti kwali ne ncito imbi iya kubomba fye ama-awala yanono iyali no kumulenga ukukwata indalama shalinga isha kubomfya. Lyena aishileiluka ukuti: “Takuli uwingabombela bashikulu babili. Nalisulileko kuli fimo fimo ifyo nalefwaisha pa kuti nsakamane ifyacindama. Naishileishiba ukuti ifyuma filonaika mu kuya kwa nshita kabili nga nafikonkelela tapali uko fingantwala.” Ifintu fyali bwino kuli uyu nkashi ica kutila, alicefesheko ifya kucita kabili atendeke ukubomba incito imbi iyamulengele ukubomba bwino bupainiya.

4. Mulandu nshi cicindamine ukuti tulelolesha fye pa cintu cimo?

⁴ Apo inshita tufikilepo naipamfya nga nshi, kanshi nacicindama sana ukuti tulelolesha fye pa cintu cimo. Cila bushiku tulaya tulepalama ku mpela ya buno bwikashi kabili tulapalama na kutendeka kwa calo cipya. (1 Kor. 7:29, 31) Nga twabika amano ku mulimo wa kushimikila kuti twaipususha fwe bene na bonse abakutika kuli ifwe.—1 Tim. 4: 16.