‘Ifya Kulya pa Nshita Yalinga’
1. Bushe ukulongana kwaibela ukwafumineko kwamwafwile shani pamo na bantu bambi?
1 Nga twafuma ku kulongana kwaibela, ilingi line tulanda ukuti, “Ifi twasambilila e fyo tulekabila sana pali ino nshita!” Kangalila umo uwa muputule alandile ukutila pa numa ya kumfwa ifyo ukulongana kwaibela kukaba, bamo balitendeke ukubombesha mu mulimo wa kushimikila. Kangalila umo uwenda atile: “Uku kulongana kulatwafwa ukwishiba bwino bwino apo tufikile muli cino calo ilyo tuletontonkanya pa fintu tusalapo ukucita mu bumi.” Umbi na o atile “Bakasabankanya abengi balandile ukuti cali kwati kulya kulongana kwalibabushishe mu tulo no kubalenga ukubika sana amano pa fintu fyacindama, e kutila umulimo wa kushimikila.” Bushe ukulongana kwaibela ukwafumineko kwamwafwile shani?
2. Finshi tukasambilila pa kulongana kwaibela ukwa mwaka wa mulimo uuleisa?
2 Nangu fye kulongana kwaibela ukwa mwaka wa mulimo uuleisa kukatwafwa nga nshi. Umutwe wa kulongana ukalatila “Ukuuba Muli Yehova,” kabili ukafuma pa Amalumbo 118:8, 9. Umfweni amalyashi yamo yamo ayakaba pa kulongana: “Ifyo Yehova aba Icubo mu Nshita ya Macushi,” “Afweni Bambi Ukuuba mu Mapindo ya kwa Yehova,” “Beni Icubo Kuli Bambi nga Filya Yehova Aba,” “Mwe Baice, Cetekeleni Yehova!” e lyo na “Yehova Alitubika mu Kupepa kwa Cine—Umo Tuuba.”
3. Kuti twanonkelamo shani nga ca kuti twasangwa ku kulongana kwaibela?
3 Ifya Kucita pa Kuti Mukamwenemo: Ilyo fye babilisha ubushiku bwa kulongana, tampeni ukulaipekanya pa kuti mukasangweko, kabili mukebe na bo musambilisha Baibolo ukuti bakasangweko. Pa kuti ‘tuletwala ifisabo ilyo tuleshipikisha,’ tulingile ukwikatisha ifyebo ifyo tuleumfwa. (Luka 8:15) Kanshi mukalekutikisha ilyo balelanda amalyashi kabili mukalelembako ne fishinka ifyo mwingalabomfya mu mikalile yenu na pa kushimikila abantu. Ilyo ukulongana kukapwa, mukekale panshi capamo no lupwa lwenu no kupituluka mu fyo mwasambilile pa kulongana kwaibela pa kuti mumone inshila shimo shimo isho imwe pamo no lupwa lwenu mwingabomfeshamo ifyebo mu mikalile yenu.
4. Mulandu nshi tulingile ukulafwaisha ukusangwa ku kulongana kwaibela ukwa mwaka wa mulimo uuleisa?
4 Ukulongana kwaibela ukwa mwaka wa mulimo uuleisa nabakupekanya bwino sana kuli kwati fya kulya ifisuma kabili ifyo twingatemwa. Pali uku kulongana tukasambilila ukuba ne citemwiko kabili kukatwafwa na ku ntanshi. Shi Yehova natwalilile ukumipaala ilyo muletwalilila ukulasangwa ku kulongana no kulanonkelamo ilyo mulelya ‘ifya kulya pa nshita yalinga’ ifilenga bakapyunga Abena Kristu ukukosa.—Mat. 24:45.