Kuti Mwa-afwilisha Shani Abashipepa Abakwata Abena Mwabo Bakapepa?
1. Mulandu nshi twingalandila ukuti Abena Kristu abakwata abena mwabo abashipepa, te beka fye abafwaya ukwafwilisha abena mwabo ukwishiba icine?
1 Bushe bakasabankanya bamo mu cilonganino cenu balikwata abalume nelyo abakashi abashipepa? Nga ca kuti e fyo caba, ukwabula no kutwishika aba bakasabankanya balafwaisha ukuti abena mwabo bakatendeke ukulapepa. Lelo kwena te aba beka bafwaya ukuti abena mwabo bakatendeke ukupepa. Icilonganino conse cipashanya Lesa uufwaya ukuti “abantu balekanalekana bakapusuke no kwishiba bwino bwino icine.” (1 Tim. 2:4) Bushe kuti twa-afwilisha shani abashipepa abaupa nelyo ukuupwa kuli bakasabankanya mu cilonganino cesu?
2. Bushe ukwishiba bwino uushipepa kuti kwalenga shani ukuti tumwafwe?
2 Intanshi tulingile ukulamona ifintu ukulingana ne fyo umuntu uushipepa amona. Abengi abashipepa balitemwa ulupwa lwabo kabili baliba bwino ku bena mwabo kabili bafyashi basuma. Napamo balikwata uko bapepa kabili ifyo basuminamo fyalipusana ne fyo twasuminamo. Limbi kuti tabaishiba sana ifyo Inte sha kwa Yehova shaba, kabili balibabepa ubufi ku banabo abapata baNte. Bamo balakalipa pa mulandu wa kuti inshita baleba capamo no lupwa, nomba e nshita abena mwabo baya mu kupepa. Ukwishiba bwino umuntu uushipepa kukalenga tulemucindika no kukanalatiina nga tuli nankwe.—Amapi. 16:20-23.
3. Cinshi cingawamisha ukucita nga tulefwaya ukunashanasha uushipepa?
3 Ukubabikako Amano: Ica ntanshi kabili napamo icingawamisha nga mulefwaya ukunashanasha abena mwenu ukuti batendeke ukupepa, kulacita ifisuma, te kulalanshanya fye ifyaba muli Baibolo. (1 Pet. 3:1, 2) Icacindama kulabalanga ukuti mwalibapoosako amano. Bankashi baba mu cilonganino kuti balanga ukuti balibika amano ku banakashi abashipepa, na bamunyinefwe nabo kuti balanga ukuti balibika amano ku baume abashipepa. Kuti bacita shani ifyo?
4. Kuti twalanga shani ukuti twalibika amano ku bantu abashipepa?
4 Nga ca kuti tamulati mumonanepo na balume nelyo abakashi abashipepa, napamo kuti mwasalapo ukuyabamona pa numa ya kwipusha abena mwabo abo mupepa nabo. Mwikomfwa ububi nga ca kuti ilyo mwatandala, abo bantu abashipepa bamoneka kwati nabamisuula. Nga tulemoneka aba nsansa kabili natubabikako amano, kuti batendeka ukulamona ukuti Inte sha kwa Yehova bantu abasuma. (Rom. 12:20) Abena Kristu bamo abakosa mu kupepa balalalikako abashipepa pamo no lupwa lwabo ku ca kulya ca cungulo, pa kuti beshibane nabo e lyo no kupwisha impatila iili yonse iyo bakwata pali baNte. Balalanda pa fyo uyu muntu uushipepa atemwa, ukucila ukulalanda fye pa fyaba mu Baibolo. Lyena mu kuya kwa nshita ilyo baishibana no muntu uushipepa, kuti batendeka ukulanshanya ifyaba mu Malembo. Nelyo kuti limbi basumina ukusangwa ku kulongana ku kumona ifyo abena mwabo balesambilila, maka maka pa mulandu wa kuti balishibako bamo mu cilonganino. Nangula limbi pali iyo nshita tabalefwaya ukusambilila icine, kuti twabatasha pa fyo bafwilisha abena mwabo.
5. Bushe baeluda kuti ba-afwilisha shani umuntu uushipepa?
5 Baeluda maka maka balingile ukwaafwa umuntu uushipepa no kubika amano ku fintu ifingalenga ukuti bakwate ishuko lya kumushimikila. Umuntu uushipepa kabili uushifwaya ukulanshanya ifyaba mu Baibolo, nalimo kuti akutika ku kukoselesha ukwaba mu Malembo ilyo ali mu cipatala nelyo ilyo alwala ubulwele ububi sana. Nga ca kuti kasabankanya uwakwata umwina mwakwe uushipepa akwata ubwafya pamo nga ukufwilwa uwa mu lupwa, baeluda kuti baita uyo muntu uushipepa ukuti na o asangweko ilyo balekoselesha ulupwa.
6. Finshi fingalenga ukuti tulefwaisha ukwafwa abashipepa lelo abakwata abena mwabo bakapepa?
6 Elenganyeni insansa isho Umwina Kristu wa mu cilonganino cesu engakwata nga ca kutila umwina mwakwe asumina ukusambilila icebo no kwisa mu cine! Ica musango uyu nga cacitika cilalenga Yehova ukusansamuka, bamalaika nabo balasansamuka, e lyo na bonse mu cilonganino balasansamuka. (Luka 15:7, 10) Lelo nga ca kutila uushipepa pa mubalo akana ukusambilila icebo, na lyo line kuti twatwalilila ukusansamuka pantu ukubombesha kwesu kulasekesha Yehova uushifwaya “umuntu nangu umo ukonaika lelo afwaya ukuti bonse bakalapile.”—2 Pet. 3:9.
[Amashiwi pe bula 6]
Ica ntanshi kabili napamo icingawamisha nga mulefwaya ukunashanasha abena mwenu ukuti batendeke ukupepa, kulacita ifisuma, te kulalanshanya fye ifyaba muli Baibolo