Natulange Ukuti Tulatasha Icibukisho Cikabako pa 17 April
1. Mashiwi nshi uwaimbile amalumbo alandile ayengatukuma mu nshita ya Cibukisho?
1 Ilyo amwene ifintu ifingi ifyo Yehova acitile ku kupususha abantu bakwe ku luse fye, uwaimbile amalumbo aipwishe ati: “Cinshi ndebwesesha kuli Yehova pa fisuma fyonse ifyo ancitila?” (Amalu. 116:12) Ino nshita, kwaliba icintu icacilapo ukucindama icilenga ababomfi ba kwa Lesa ukulatasha. Umupashi wa mushilo walengele uwaimbile amalumbo ukulemba aya mashiwi, lyena palipitile imyaka iingi nga nshi, e lyo Yehova aishilepeela abantunse ubupe bwakulisha no bu bupe bwali cilubula. Ilyo tuleipekanya ukwibukisha imfwa ya kwa Kristu pa 17 April, tuletontonkanya na pa mulandu uukalamba uo tulingile ukutashisha Yehova.—Kol. 3:15.
2. Fintu nshi fimo ifilenga tuletasha Yehova pa cilubula?
2 Amapaalo pa Mulandu wa Cilubula: Icilubula calilenga bonse “ukwelelwa imembu shesu.” (Kol. 1:13, 14) Ici cilenga tulepepa Yehova na kampingu iisuma. (Heb. 9:13, 14) Twalikwata ubuntungwa bwa kweba Yehova ifili ku mukoshi ilyo tulepa kuli ena. (Heb. 4:14-16) Abatetekela mu cilubula balikwata ishuko likalamba ilya kwisaba no mweo wa muyayaya!—Yoh. 3:16.
3. Kuti twalanga shani ukuti tulatasha Yehova pa cilubula?
3 Langeni Ukuti Mulatasha: Inshila imo iyo tulangilamo ukuti tulatasha kulabelenga cila bushiku ifipandwa fya mu Baibolo ifyo batupekanishisha ukubelenga mu nshita ya Cibukisho no kulatontonkanyapo. Ulupungu lwa kwa Kalinda ulwa February 1, 2011, lwakwete icipande caletila “Bushe Namuipekanya Ukusefya Ubushiku Ubwacindama Sana mu Mwaka?” Ici cipande ca kutwafwa ifyo twingalanga ukuti tulatasha Yehova. Kuti twaeba na Yehova ukupitila mwi pepo lya pa mutima ifyo twacindamika sana icilubula. (1 Tes. 5:17, 18) Ukumfwila ifunde lya kwa Yesu ilya kuti tulesangwa ku Cibukisho kulalanga ukuti tulatasha pa cilubula. (1 Kor. 11:24, 25) Te apo peka, kuti twapashanya ukutemwa kwa kwa Yehova ukukalamba nga nshi ilyo twaita abantu abengi ukwisasefya na ifwe Icibukisho.—Esa. 55:1-3.
4. Cinshi bonse tufwile ukufwaisha ukucita?
4 Ababomfi ba kwa Yehova abatasha tabakulamona kwati Icibukisho caba fye kwati kulongana kumbi uko tukwata cila mulungu. Icibukisho, e kulongana kwacindamisha mu mwaka! Ilyo Icibukisho cilepalamina, lekeni bonse tufwaishe ukuba ngo waimbile amalumbo uwalembele ati: “We mweo wandi, cindika Yehova, kabili wilaba fyonse ifyo aacita.”—Amalu. 103:2.