Tulingile Ukutekanya Ilyo Tuleshimikila
1. Bushe Yehova alanga shani ukutekanya ku bantu?
1 Lesa lyonse alatekanishisha abantu. (Ukufu. 34:6; Amalu. 106:41-45; 2 Pet. 3:9) Ica kumwenako icisuma icilangilila ukuti Lesa alitekanya mulimo wa kushimikila pa Bufumu mwi sonde fye lyonse. Yehova alibomba na bantunse pa myaka nalimo 2,000, nangu cibe fyo alitwalilila ukukula abakwata imitima iisuma ukuba ku lubali lwakwe. (Yoh. 6:44) Bushe umulimo wesu uwa kushimikila kuti walanga shani ukutekanya kwa kwa Yehova?
2. Bushe kuti twalanga shani ukutekanya ilyo tuleshimikila mu cifulo cesu?
2 Ukushimikila ku Ng’anda ne Ng’anda: Tulapashanya ukutekanya kwa kwa Yehova ilyo tushimikila “ukwabula ukuleka” mu cifulo cesu umo abantu bashilaumfwa icine. (Imil. 5:42) Tulatekanya kabili tulashipikisha ilyo batupontela, ukutupumya, nelyo ukutukaanya ilyo tuleshimikila. (Marko 13:12, 13) E lyo tulalanga ukuti twalitekanya lintu tuletwalilila fye ukutapilila imbuto sha cine ca Bufumu nangu ca kuti calyafya ukusanga abatemwa icine pa mayanda.
3. Cinshi tufwile ukubela abatekanya ilyo tulebwelela ku bo twashimikile no kutungulula amasambililo ya Baibolo?
3 Amasambililo ya Baibolo: Nga twabyala icimenwa tufwile ukutekanya. Kwena kuti twacisakamana bwino, lelo tapali ifyo twingacita pa kuti cikule bwangu. (Yako. 5:7) E cimo cine no kukula kwa ku mupashi, kucitika panono panono kabili mu kupita kwa nshita. (Marko 4:28) Abo tusambilila nabo limbi kuti cabakosela ukuleka ifisumino fyabo ifya bufi nelyo ukusha intambi ishishumfwana na Baibolo. Tatulingile ukupatikisha abasambi ukwalula imibele yabo pa kuti fye bakule bwangu ku mupashi. Lelo tulakabila ukutekanya pa kuti tupeele umusambi inshita iikalamba iingalenga umupashi wa kwa Lesa ukwalula umutima wakwe.—1 Kor. 3:6, 7.
4. Bushe ukutekanya kukatwafwa shani ukushimikila bwino kuli balupwa lwesu abashasumina?
4 Balupwa Abashipepa: Tulafwaisha ukuti balupwa lwesu beshibe cine, lelo tulabatekanishisha no kulolela inshita iisuma iya kubashimikila, kabili tulacenjela pa kuti twibeba ifyebo ifingi pa muku fye umo. (Luk. Mil. 1:7) Mu kuya kwa nshita, bakasuka bakamone imibele iisuma twakwata pa mulandu wa cine tusambilila, kabili ifwe tulingile ukuba fye abaipekanya inshita yonse ukubashimikila bufuke bufuke kabili mu mucinshi. (1 Pet. 3:1, 15) Kanshi, ukutekanya ilyo tuleshimikila kukafumamo ifisuma kabili kukalenga Yehova Shifwe ukusekelela.