‘Ishina lya kwa Lesa Libe Ilya Mushilo’
1. Bushe umutwe wa kulongana kwa muputule ukwa mwaka wa mulimo uwa mu 2012 uleti shani kabili ufumine pi?
1 Twalikwata ishuko ilikalamba nga nshi ifi twainikwa ishina lya kwa Mulopwe wa Fyabumbwa fyonse, Yehova. Ni Lesa umwine, e watupeele ishina lyakwe ilya kuti Inte sha kwa Yehova. Ili ishina lilamupusanyako kuli tulesa tumbi, kabili ifwe twapeelwe ili ishina mu mwaka wa 1931. (Esa. 43:10) Umwana wa kwa Lesa uwafyalwa eka, Yesu, alicindike ishina lya kwa Lesa, ica kuti e lyo abalilepo no kulumbula mwi pepo lyakwe ilya cilangililo. (Mat. 6:9) Pali aya yene mashiwi Yesu alandile e pafumine no mutwe wa kulongana kwa muputule ukwa mwaka wa mulimo uwa 2012. Umutwe uleti: ‘Ishina lya kwa Lesa Libe Ilya Mushilo.’ Nga mwalishiba inshiku sha ukulongana kwa muputule bushe mwaliconga pa kalenda yenu no kutendeka ukulaipekanya ukusangwako?
2. Fyebo nshi tulingile ukwenekela ukumfwa pa Kulongana kwa Muputule?
2 Amalyashi Ayo Tukomfwa: Pa Cibelushi ilyashi lya kuti “Lengeni Ishina lya kwa Lesa Ukwishibikwa pa Kubombako Umulimo wa Nshita Yonse” likalanda pa co umulimo wa nshita yonse wawamina. Na kabili kukaba na malyashi ya kukonkana ayakakwata umutwe uukalamba uuletila “Cenjeleni, Epali Mwaseebanya Ishina lya kwa Yehova,” kabili ili lyashi likatwafwa ukukanaikatwa mu fiteyo 4 ifyaseeka. Amepusho pamo nga Cinshi cingatwafwa ukucincila pa kushimikila nangula abantu tabapooseleko amano ku mbila nsuma? e lyo na Cinshi cingatwafwa ukulabomba bwino mu mulimo wa kushimikila? yakasukwa mu lyashi likalatila “Umulandu Ishina lya kwa Lesa Lifwile Ukubela Ilya Mushilo.” Pa Mulungu tukaipakisha amalyashi ya kukonkana yane ayakalanda pa fyo twingalenga ishina lya kwa Lesa ukuba ilya mushilo mu fyo tutontonkanyapo, mu milandile yesu, mu fyo tusalapo ukucita, na mu myendele yesu. Abapya bakatemwa ukukutika ku lyashi lya ku Cintubwingi ilikalati, “Yehova Akalenga Ishina Lyakwe Ilya Lulumbi Ukuba Ilya Mushilo pa Armagedone.”
3. Lishuko nshi twakwata kabili ukulongana kwa muputule kukatwafwa shani?
3 Nomba line fye Yehova akalenga ishina lyakwe ukuba ilya mushilo. (Esek. 36:23) Pali ino nshita twalikwata ishuko ilikalamba nga nshi ilya kulenga ishina lya kwa Yehova ukuba ilya mushilo ne fyo limininako. Tulecetekela ukuti uku kulongana kwa muputule kukatwafwa ifwe bonse ukufikilisha umulimo wesu uwacindama pantu nifwe twainikwa ishina lya kwa Lesa.