Afweni Abo Mulelanda Nabo Ukutontonkanya
1. Ni nshila nshi iyawama ukubomfya pa kushimikila?
1 Ni nshila nshi iingabomba bwino sana mwi bala? Bushe ni ilya iya kupampamina fye pa fyo mulelanda pa kuti umuntu asumine nangu ni ilya iya kwafwa umuntu uo mulelanda nankwe ukupelulula nelyo ukutontonkanya pa kuti asange icishinka? Ilyo umutumwa Paulo alelanda na baYuda mu Tesalonika, alepelulushanya nabo kabili, “bamo pali bena balitetekele.” (Imil. 17:2-4) Bushe ukupelulushanya na bantu bambi e kuti shani?
2. Kuti twapashanya shani Paulo ilyo tuleshimikila?
2 Ishibeni Ifyo Umuntu Aleumfwa E lyo ne Fyo umo Akula: Pa kwafwa abantu abo tushimikila ukupelulula, tufwile ukutontonkanya pa fyo bomfwa. Paulo atendeke ukulanshanya na baGriki abashasumina pa Areopagi pa kulondolola ifintu ifyo baishibe no kusumina. (Imil. 17:22-31) Kanshi, ilyo muleipekanya ifya kulanda pa kushimikila, tontonkanyeni pa fyo abantu mu cifulo cenu basumina ne fyo bapata. (1 Kor. 9:19-22) Abo mulelanda nabo nga baipusha icipusho, esheni ukufwaya icishinka cimo ico mwingasuminishanya apo mwingatampila ukulanshanya, no kulanda pali ilyo line ilyashi.
3. Bushe ukubomfya bwino ifipusho kuti kwatwafwa shani ukupelulushanya na bambi?
3 Bomfyeni Bwino Ifipusho: Te kuti twafwe umuntu ukwishiba uko aleya nga tatwishibe incende alipo. Kanshi, te kuti twafwe umuntu ukumfwikisha icishinka nga tatwishibepo nangu kamo pa fyo asumina. Ilyo Yesu ashilapelulushanya no muntu, ilingi line alebala aipusha ifipusho pa kuti eshibe ifyo umuntu aletontonkanya. Ku ca kumwenako, ilyo umuntu umo aipwishe Yesu ati, “Cinshi ningacita pa kuti nkakwate ubumi bwa muyayaya?,” Yesu atalile aipusha ifyo uyu muntu aletontonkanya ilyo ashilamwasuka. (Luka 10:25-28) Pa nshita imbi, ilyo Petro ayaswike ifyalubana, Yesu abomfeshe ifipusho pa kumulungika. (Mat. 17:24-26) Kanshi, abo tuleshimikila nga baipusha icipusho nelyo balanda ifya bufi, kuti twabomfya ifipusho pa kubafwa ukutontonkanya pa fyo tulelandapo.
4. Mulandu nshi tufwile ukwafwa uo tuleshimikila ukutontonkanya pa fyo tulelanshanya?
4 Nga twa-afwa abo tuleshimikila ukulatontonkanya, ninshi tulepashanya Kasambilisha Mukalamba, Yesu, e lyo na Bena Kristu bakubalilapo bambi abaleshimikila bwino. Nga twacita ifi, ninshi tulecindika abantu tulelanda na bo. (1 Pet. 3:15) Ici kuti calenga basumina ukuti tukabweleleko.