Umukululo wa Mepusho

◼ Ni bani bafwile ukulembela ku Bethel ukulomba ukutandalilwa nelyo ukulomba impapulo?

Impapulo shesu shilakwata ulubali umuntu engaputula no kutuma ku Bethel pa kuti alombe impapulo nelyo ukutandalilwa ne Nte sha kwa Yehova. Kabili umuntu kuti abomfya adresi yesu iya pa Intaneti, Web site www.watchtower.org, pa kuti alombe ukumusambilisha Baibolo. Ifi fileafwa abantu abengi ukusambilila icine. Lelo, kulaba amafya nga ca kuti bakasabankanya babomfya inshila tulandilepo pa muulu pa kufwaya ukwafwilisha balupwa lwabo ukusambilila Baibolo.

Bamo abo twatumina impapulo ukufuma ku Bethel isho bashalombele bali-ilishanya, pantu bamona kwati ukuteyanya kwesu kulebacusha nangu kwalikwata ishina lyabo pa kuti balebatumina impapulo lyonse. Bakasabakanya abaebelwe ukutandalila umuntu uushailombeele umwine ukumutandalila cilabapesha amano ilyo umuntu afulwa lintu abamona. Kanshi abantu abene e bafwile ukuilombela ukusambilila nangu ukuilombela impapulo, bakasabakanya tabafwile ukubalombelako iyo. E ico nga caishibikwa ukuti umuntu tailombele fye umwine lelo bamulombeleko fye, kuno ku Bethel tatubombelapo iyo.

Nomba kuti twa-afwa shani lupwa nelyo umunensu ukusambilila Baibolo? Nga mulefwaya abelenge impapulo shesu, kuti cawama imwe bene mwamupeela. Nga ca kuti alafwaya ukutandalilwa ne Nte sha kwa Yehova nomba tamwishibe ifya kulanshanya na baeluda ba mu cilonganino cabela uko ekala, kuti mwalemba formu ya Mukwai Fwayeni Uyu Muntu (S-43) no kupeela kalemba, kabili akamonapo no kutuma ku Bethel. Lelo, uulefwaya ukusambilila nga aba mu cifungo, na mu fifulo fimbi umo basungila abantu, tamufwile ukulembela ku Bethel pali uyo muntu. Lelo, mufwile ukumweba ukulanshanya na bamunyinefwe abatandalila icifulo abako nelyo umwine ukulembela ku Bethel.