Imibele Yacindamisha Iyo Kasambilisha Musuma Afwile Ukukwata
1. Mibele nshi iyacindamisha iyo kasambilisha musuma afwile ukukwata?
1 Cinshi cilenga umuntu ukulasambilisha bwino Baibolo? Bushe masambililo ya ku calo? Ukukokola mu cine? Nelyo bushe kucenjela? Icilenga, mibele kabili ifunde ilyo twishibilako abasambi ba kwa Yesu, e lyo kabili iyi ine, e mibele yapulishamo kabili iyawamisha pa mibele yonse iyo Yehova akwata. (Yoh. 13:35; Gal. 5:14; 1 Yoh. 4:8) Iyi mibele, kutemwa. Bakasambilisha basuma balaba no kutemwa.
2. Mulandu nshi cacindamina ukutemwa abantu?
2 Ukutemwa Abantu: Kasambilisha Mukalamba, Yesu, alangile ukuti alitemwa abantu kabili ifi alecita fyalengele balekutika kuli ena. (Luka 5:12, 13; Yoh. 13:1; 15:13) Nga tulabika amano ku bantu, tukalashimikila lyonse nga twakwata ishuko. Ifya kutupumfyanya pamo nga ukutucusha no kutupata tafyakatufuupule nakalya. Tukalanga ukuti twalibika sana amano ku bantu tushimikila, kabili tukala-alula inshila ya kushimikililamo ukulingana ne fyo abo tuleshimikila balefwaya. Tukalapoosako inshita iikalamba ilyo tuli na basambi ba Baibolo e lyo na lintu tulepekanya isambililo limo na limo ilyo tukayasambilila nabo.
3. Bushe ukutemwa icine ca mu Baibolo kukatwafwa shani ilyo tuleshimikila?
3 Ukutemwa Icine ca mu Baibolo: Yesu na o alitemenwe icine caba mu Baibolo kabili alecimona nge cuma ica mutengo sana. (Mat. 13:52) Nga twalitemwa icine, tukalacincimuka pa kulanda kabili ukucite fi kukalenga abo tuleshimikila nabo bene ukutemwa icine. Ukutemwa icine kukalenga tulebika amano ku fyebo fyacindama ifyo tusambilisha abantu ukucila ukulatontonkanya pa fyo tufilwa ukucita, kabili ukucita ifi kuti kwalenga umwenso ukucepako ilyo tuleshimikila.
4. Finshi twingacita pa kuti tutwalilile ukutemwa abantu?
4 Twalilileni Ukuba no Kutemwa: Kuti twacita shani pa kuti tutwalilile ukutemwa abantu? Tufwile ukulatontonkanya pa fyo Yehova no Mwana wakwe batutemwa e lyo na pa bantu abashaishiba Lesa ababa mu cifulo tushimikila. (Marko 6:34; 1 Yoh. 4:10, 11) Nga tuleisambilisha Icebo ca kwa Lesa lyonse no kulatontonkanyapo, ninshi tukatemwa sana icine ca mu Baibolo. Ukutemwa cisabo ca mupashi. (Gal. 5:22) Kanshi kuti twalomba Yehova ukuti atupeele umupashi wa mushilo no kumulomba ukuti atwafwe ukukusha ukutemwa kwesu. (Luka 11:13; 1 Yoh. 5:14) Te mulandu na masambililo ya ku calo ayo twakwata, ifyo twakokola mu cine, nelyo ifyo twacenjela, kuti tulesambilisha abantu Baibolo bwino nga tuli no kutemwa.