Mwilamona Kwati te Kuti Mubombe—Ifyo Mwingacita nga Mwaliba Abapamfiwa Sana
1. Cinshi bamo bafililwa ukutendeka amasambililo ya Baibolo?
1 Bamo balafilwa ukutendeka amasambililo ya Baibolo pantu balikwata ifya kucita ifingi. Kwena ukusakamana isambililo, mulimo uusenda inshita iikalamba. Kasabankanya alakabila inshita ya kupekanya ifya kuyasambilisha, inshita ya kutungulula isambililo lya Baibolo, ne yakwafwa umusambi ukulunduluka. Umutumwa Paulo aebele abena Tesalonika ati twalefwaya ukumupeela fye ne myeo yesu pa kuti mwishibe Yehova. (1 Tes. 2:7, 8) Kuti twacita shani pa kuti tuletunguluko amasambililo nangu ca kuti twalikwata sana ifya kucita?
2. Nga twalitemwa Yehova, bushe tukalabomfya shani inshita yesu?
2 Ukubombela Yehova Kulasenda Inshita: Icishinka ca kuti, tulakabila inshita pa kuti tubombele Lesa. Ku ca kumwenako, tulasanga inshita ya kuya ku kulongana lyonse, inshita ya kuya mu kushimikila, ne ya kubelenga Baibolo no kupepa. Umuntu uwaupa nelyo uwaupwa alasanga inshita ya kuba no mwina mwakwe nga alimutemwa nangu ca kuti alikwata ifya kucita ifingi. Na ifwe bene nga twalitemwa Yehova ‘tukalabomfya bwino inshita’ pa kuti tulemupepa. (Efes. 5:15-17; 1 Yoh. 5:3) Yesu alandile ukuti umulimo wa kulenga abantu ukuba abasambi, mulimo uwacindama sana mu kupepa kwesu. (Mat. 28:19, 20) Ukulatontonkanya pali ici cishinka kukatwafwa ukubombesha pa kuti tuletungululako amasambililo ya Baibolo.
3. Kuti twacita shani pa kuti tutwalilile ukulatungulula isambililo lya Baibolo nangu ca kuti kuli ifilepumfyanya imibombele yesu?
3 Nomba kuti mwacita shani nga mulefilwa ukutungulula amasambililo pa mulandu wa ncito, ukulwalilila nelyo imilimo imbi iya mu cilonganino? Moneni ificita bakasabankanya bamo nga bafumapo, balatwalilila ukutungulula amasambililo yabo ukubomfya foni e lyo bambi babomfya Intaneti. Bamo abafilwa ukuya mu kutungulula amasambililo pa mulandu wa kulwalilila balitantika ukuti isambililo lyabo lilebakonkela ku ng’anda yabo. Bambi balilanshanya na kasabankanya umo ukuti aleya mu kubatungulwilako amasambililo nga tabalipo.
4. Tukapaalwa shani nga tulebombako umulimo wa kutungulula amasambililo ya Baibolo?
4 Paulo aleba ne nsansa ishingi pa mulandu ne fyo alebomfya inshita yakwe na maka ku kwafwa abantu ukusambilila icine. (Imil. 20:35) Aletasha Yehova nga atontonkanya pa bantu bonse abo ayafwile mu Tesalonika. (1 Tes. 1:2) Tukalaipakisha mu mulimo e lyo tukaba ne nsansa sana nga twaleka ukulaimona kwati te kuti tubombeko umulimo wa kutungulula amasambililo pantu twalikwata ifya kucita ifingi.