Ifya Kubomfya Broshuwa ya Imbila Nsuma Ukufuma Kuli Lesa!
Broshuwa Iipya iya Kutwafwa Ukucita Ifipempu no Kutendeka Amasambililo ya Baibolo
1. Ni broshuwa nshi iyo twapokelele pa Kulongana kwa Citungu ukwaleti “Sunga Umutima Obe!” iya kutwafwa ukucita ifipempu no kutendeka amasambililo ya Baibolo?
1 Pa Kulongana kwa Citungu ukwaleti “Sunga Umutima Obe!” twalitemenwe ukupokelela broshuwa iipya iya kutwafwa ukucita ifipempu no kutendeka amasambililo ya Baibolo. Iyi broshuwa ya kuti Imbila Nsuma Ukufuma kuli Lesa! e ipyene pali broshuwa ya Cinshi Cintu Lesa Afwaya Kuli Ifwe? Kabili nayo ikwete amasambililo ayepi. Kanshi kuti twabomfya iyi broshuwa ku kutendeka amasambililo ya Baibolo pa mwinshi ukwabula no bwafya. Broshuwa ya Cintu Lesa Afwaya, yalelanda pa fyo Umwina Kristu afwile ukuba, kabili ubu bwaleba bwafya pantu abasambi bamo abapya balekana ukusumina fimo ifyo balesambilila, lelo iyi broshuwa iipya yena ilelanda fye pa mbila nsuma iisangwa mu Baibolo.—Imil. 15:35.
2. Mulandu nshi balembela broshuwa ya Imbila Nsuma?
2 Mulandu nshi bailembeele? Bamunyinefwe ukufuma mu fyalo ifyalekanalekana baalefwaya ukuti kubeko ulupapulo ulwayanguka ulwingalenga abantu ukufwaya ukusambilila icine, ulwingalenga batendeka bwino ukusambilila mu citabo ca Baibolo Isambilisha ico tubomfya sana pa kutungulula amasambililo. Abatiina ukusambilila mu citabo ilingi balasumina ukusambilila Baibolo ukubomfya ka broshuwa. Na kabili, calyanguka ukupilibula broshuwa mu ndimi ishingi.
3. Bushe iyi broshuwa ipusene shani ne mpapulo shimbi isho tusambilishamo abantu?
3 Inshila Bailembelamo: Impapulo ishingi isho tusambilishamo abantu bashilemba mu musango wa kuti umuntu kuti aibelengela umwine no kumfwa icine nangu tapali ulemusambilisha. Iyi broshuwa yena yalipusanako. Bailemba mu musango wa kuti umuntu pa kuti ayumfwikishe kano pali uulemusambilisha. Kanshi, ilyo muleshiila abantu iyi broshuwa kuti cawama mwalanshanyako paragrafu imo nelyo yabili. Amaparagrafu yepi, kanshi kuti mwalanshanya na bantu pa mwinshi nelyo pa cifulo babombela. Kwena, kuti cawama ukutendekela pe Sambililo 1, lelo kuti mwatendekela pe sambililo ilili lyonse.
4. Bushe iyi broshuwa kuti yatwafwa shani ukusambilisha abantu mu kulungatika ifyaba muli Baibolo?
4 Mu mpapulo shesu ishingi mulaba amepusho e lyo mu maparagrafu e musangwa amasuko. Nomba muli ulu lupapulo mwena, ilingi ifyasuko fileba mu Baibolo. Abantu abengi bafwaya ukusambilila muli Baibolo ukucila mu mpapulo shesu. E ico, amalembo ayengi ayalimo tabayambwile. Kanshi mufwile ukuyabelenga muli Baibolo. Ici kuti calenga abasambi ukwishiba ukuti ifyo balesambilila fyafuma kuli Lesa.—Esa. 54:13.
5. Mulandu nshi cacindamina ukulapekanya isambililo limo na limo ilyo tushilaya mu kusambilila no musambi?
5 Iyi broshuwa tailondolola amalembo yonse. Mulandu nshi? Bailemba mu musango wa kuti umusambi aleipusha sana amepusho no kuleka uulemusambilisha ukulabomfya inshila shisuma isho abomfya pa kusambilisha. Kanshi mufwile ukulapekanya bwino isambililo limo na limo ilyo mushilaya mu kusambilisha umusambi. Ukumicinkulako fye: Mwilalandapo sana. Ca cine ukuti, tulomfwa bwino ukulondolola Amalembo. Lelo cilawama sana nga ca kuti musambi aleilondolwela umwine ifyo alemona ukuti e fyo amalembo yalepilibula. Nga tuleipusha amepusho mu mucenjelo, kuti twaafwa umusambi ukulatontonkanya no kwishiba ifyo ilembo lilepilibula.—Imil. 17:2.
6. Kuti twabomfya shani iyi broshuwa: (a) nga twasanga abantu abatwishika Lesa ne fyaba muli Baibolo? (b) ilyo tuleshimikila ku ng’anda ne ng’anda? (c) ukutendeka amasambililo ya Baibolo apo pene fye? (d) ilyo tulecita ifipempu?
6 Filya fine tushalika impapulo tusambililamo na bantu, kuti twashalika ne yi ine broshuwa inshita fye iili yonse, nangu ca kuti kuli mpapulo shimbi isho tuleshalika muli uyo mweshi. Abengi bakatemwa sana ukubomfya iyi broshuwa ukutendeka amasambililo ya Baibolo pa mwinshi. E lyo kabili, nga filya fine batwebele pa kulongana kwa citungu, nga tulebomfya iyi broshuwa ilyo twabwelela kubo twashimikiile, “ninshi tukalaipakisha nga nshi ukucita ifipempu!”—Moneni utubokoshi utuli pa mabula 5-7.
7. Kuti mwatungulula shani isambililo lya Baibolo ukubomfya broshuwa?
7 Ifyo Tufwile Ukulatungulula Isambililo: Kuti twatendeka ukulanshanya ukubomfya icipusho icili mu filembo fyatikama. Lyena, belengeni paragrafu na malembo ayalembelwe mu filembo ifyapindama. Mu mucenjelo ipusheni ifipusho ifingalenga abo muleshimikila ukumfwikisha umulolele amalembo. Lyena, ilyo mushilaselela mu paragrafu ikonkelepo, bepusheni na kabili icipusho cili mu filembo fyatikama kabili shininkisheni ukuti baumfwa. Nga e lyo mutendeke fye ukusambilila, kuti cawama mulelanshanya fye pa cipusho cimo icili mu filembo ifyatikama. Mu kupita kwa nshita, kuti mulelundako inshita mulanshanya mwasuka mwalapwisha ne sambililo lyonse.
8. Mashiwi nshi tufwile ukulanda ilyo tulefwaya ukubelenga ilembo, kabili mulandu nshi?
8 Amalembo ayo balembelepo ukuti “belengeni” e yasuka mukulungatika amepusho yali mufilembo fyatikama. Pa kulanda ilembo, mwilabomfya amashiwi pamo nga, “Umutumwa Paulo alembele ukuti” nelyo ati, “Moneni ifyo Yeremia asoobele.” Nga mulelanda ifi abo muleshimikilako kuti bamona kwati amashiwi mulebelenga bantunse fye balandile. Kanshi kuti cawama ukulanda ukuti, “Icebo ca kwa Lesa citila” nelyo ukuti, “Umfweni ifyo Baibolo yasoobele ukuti e fikacitika.”
9. Bushe tulingile ukubelenga amalembo yonse ayashambwilwe ilyo tulesambilila no muntu?
9 Bushe tulingile ukubelenga amalembo yonse ayashambwile, nelyo tufwile fye ukubelenga yalya batile “belengeni”? Kuti mwamona mwe bene nga kuti mwabelenga yonse nelyo iyo. Amalembo yonse ayashambwilwe te ya kumulanga fye apo icishinka cisangwa muli Baibolo. Ilembo limo na limo nalikwata ifyebo ifyacindama ifyo mwingalanshanyapo. Nomba limo limo, nga ca kuti umusambi napamfiwa, talebikako sana amano, nelyo limbi tabelenga, kuti cawama mwabelenga fye amalembo ayo batile “belengeni.”
10. Ni lilali cingalinga ukutendeka ukusambilila mu citabo ca Ico Baibolo Isambilisha?
10 Ilyo Twingatendeka Ukusambilila mu Citabo ca Ico Baibolo Isambilisha: Pa numa ya kusambilila no musambi imiku yafululilako, e lyo twamona no kuti ukulanshanya kukatwalilila, kuti twatendeka ukusambilila mu citabo ca Ico Baibolo Isambilisha nelyo ukutwalilila na broshuwa ya Imbila Nsuma mpaka no kupwisha. Bakasabankanya abene kuti baishiba inshita iingalinga ukutendeka ukulasambilila mu citabo. Nga twatendeka ukusambilila mu citabo ca Ico Baibolo Isambilisha, bushe ninshi tulingile ukutendekela mu cipandwa ca kubalilapo? Takwaba ifunde ililanda apo tulingile ukutendekela. Abantu balapusanapusana. Lelo kwena abasambi abengi bakanonkelamo sana mu citabo ca Ico Baibolo Isambilisha pantu amasambililo basambilile muli broshuwa eyo bakalasambilila na kabili mu citabo. Na kuba mu citabo emo balondolola ifingi.
11. Mulandu nshi tulingile ukubomfesha sana iyi broshuwa iipya?
11 Mu calo umo abantu bomfwa fye imbila sha bulanda umo shacela, ifwe twalikwata ishuko ilikalamba ilya kubilisha imbila nsuma ya kuti Ubufumu bwa kwa Lesa buleteka kabili nomba line bukaleta icalo cipya umukaba ubulungami! (Mat. 24:14; 2 Pet. 3:13) Twalicetekela ukuti abengi abakomfwa iyi mbila nsuma bakasosa aya mashiwi ayalembelwe ukupitila mu mupashi aya kuti: “Ifyo yayemba pa mpili amakasa ya uleta imbila nsuma, uubila umutende, uuleta imbila nsuma iya fintu ifisuma, uubila ukupususha, usosa kuli Sione ati: ‘Lesa obe naba imfumu!’” (Esa. 52:7) Shi natulebomfya iyi broshuwa iipya ilyo tuletwala imbila nsuma iyafuma kuli Lesa ku bantu ababa mu ncende tushimikila ababa ne cilaka ca ku mupashi!
[Akabokoshi pe bula 5]
Nga Twasanga Abantu Abatwishika Lesa ne Fyaba Muli Baibolo:
● Mu ncende shimo shimo bakasabankanya basanga ukuti nga balanda fye amashiwi ya kuti “Lesa” nangu ati “Baibolo” ninshi abo baleshimikila balakaana no kukutika. Nga caba ifyo, ninshi kuti cawama umuku wa kubalilapo mwalanshanya no muntu, mwalanda fye pa fyo abantu balandapo sana pamo nga ukukwata ubuteko ubusuma, ukwa kusanga ubwafwilisho bwa fya kusunga bwino ulupwa, na pa fyo ifintu fikaba ku ntanshi. Lyena, nga twalanshanyako pa fyalenga tushininkishe ukuti Lesa eko aba no mulandu twasuminina muli Baibolo e lyo nomba twingatendeka ukusambilila nabo muli broshuwa ya Imbila Nsuma.
[Akabokoshi pe bula 6]
Ilyo Tuleya ku ng’anda ne ng’anda:
● “Namitandalila pa kuti milange ifyo cayanguka ukusanga ifisuma ifyo Lesa apekanishisha abantu ku ntanshi. Bushe mwalitala amutontonkanyapo nga Lesa akafumyapo ukucula kwesu? [Lekeni basuke.] Iyi broshuwa ilelanga apo mwingasanga icasuko ca ici cipusho muli Baibolo. [Bapeleni broshuwa, e lyo mubelenge paragrafu ya kubalilapo mwi sambililo 1, lyena belengeni na Yeremia 29:11.] Ukulingana ne fi twabelenga, bushe muletontonkanya caliba fye bwino ukusumina ukuti Lesa afwaya abantu bakekale bwino ku ntanshi? [Lekeni basuke.] Nga mwaitemwa, kuti mwashala nayo. Umuku ukakonkapo, kuti twaisalanshanya paragrafu 2 pa kuti tukasange ifyo Baibolo ya-asuka icipusho ca kuti, ‘Bushe Lesa akapwisha shani ifilenga abantu ukucula?’” Nga abo muleshimikila nabakwata inshita pali bulya bwine bushiku bwa kubalilapo mwabasanga, kuti mwabelenga no kulanshanya paragrafu 2 na malembo yatatu ayabamo. Umfwaneni ilyo mukakumana na kabili pa kuti mukalanshanye icipusho ca bubili muli ilyo line sambililo.
● “Abantu abengi bapepa sana lilya bakwete amafya. Bushe na imwe limo mulapepa kuli Lesa? [Lekeni basuke.] Bushe mumona ukuti Lesa alomfwa ku mapepo yonse fye, nelyo bushe kwalibako yamo ayo ashikutikako? [Lekeni basuke.] Ninkwata broshuwa iilelangilila ifyo mwingasanga ifyo Baibolo ya-asuka aya mepusho. [Bapeeleni broshuwa, kabili lanshanyeni paragrafu 1 iye sambililo 12 e lyo na malembo batile “belengeni.”] Bushe tamumfwa bwino pali ifi Lesa afwaisha ukukutika kuli ifwe? Nomba pa kuti Lesa aleasuka amapepo yesu, tulingile ukumwishiba bwino sana. [Kabiyeni pe sambililo 2 kabili balangeni utumitwe.] Nga mulefwaya kuti namishiila iyi broshuwa, kabili inshita imbi, kuti twaisalanshanya ifyo Baibolo ya-asuka aya mepusho yacindama.”
● “Ico naishila pano lelo ni pa mulandu wa fyo abantu abengi balemoneka abasakamana pa kukanaishiba uko cino calo cilelola. Bushe batini ifintu fikatwalilila fye ifi fine? [Lekeni basuke.] Abengi balapapa ukusanga ukuti muli Baibolo mwaliba imbila nsuma iilenga twaba ne subilo. Umfweni amepusho yamo yamo ayo Baibolo ya-asuka.” Bapeleni broshuwa, kabili bebeni basalepo icipusho cimo pa fipusho fili pa nkupo ya ku numa ico bengatemwa ukulanshanyapo. Lyena kabiyeni pe sambililo basala, no kubalanga ifyo tusambilila Baibolo. Umfwaneni ilyo mukabwelelako pa kuti mukalanshanye icipusho cikonkelepo mwi sambililo limo line.
[Akabokoshi pe bula 7]
Ukutendeka Isambililo apo Pene fye:
● “Naisa mu ku mulanga programu iipya iya kusambilila Baibolo. Iyi broshuwa yakwata amasambililo 15 ayalanga ifyo mwingasanga amasuko yacindama ukubomfya Baibolo. [Balangeni inkupo ya ku ntanshi ne ya ku numa.] Bushe mwalyeshapo ukufwaya ukumfwikisha ifyaba mu Baibolo? [Lekeni basuke.] Lekeni imulange aya masambililo yayanguka. [Lanshanyeni icipusho 3 mu paragrafu 1, lyena belengeni Ukusokolola 21:4, 5. Nga calinga, lanshanyeni paragrafu yakonkapo na malembo batile “belengeni”.] Nga mulefwaya kuti namishiila iyi broshuwa. Tulemikoselesha ukuti mukesheko ukusambilila isambililo nangu fye limo. Nga mukatemwa, kuti twatwalilila ukusambilila. Umuku uukakonkapo tukasambilila isambililo lya kubalilapo. Moneni, ili isambililo talyalepa no kulepa lyaba fye pe bula limo.”
[Akabokoshi pe bula 7]
Ifya Kubomfya Broshuwa Ilyo Mwaya ku Cipempu:
● Ilyo twabwelela ku muntu uulefwaya ukusambilila icine, kuti napamo twatila: “Natemwa ukumimona na kabili. Namiletelako iyi broshuwa iilangilila ifyo Baibolo yasuka amepusho ayengi ayo abantu bepusha. [Bapeleni broshuwa, kabili bebeni ukumona ku nkupo ya ku numa.] Lyashi nshi ilyo mwatemwapo sana pali aya? [Lekeni basuke. Lyena kabiyeni pe sambililo basala.] Lekeni imulange ifyo tubomfya iyi broshuwa ku kusanga icasuko muli Baibolo.” Balangeni ifyo tusambilila. Lanshanyeni paragrafu imo nelyo yabili kabili belengeni na malembo batile “belengeni.” Nga mwacita ifi, ninshi mwatendeka ne sambililo! Bashileni broshuwa, kabili panganeni ilyo mukabwelelako. Nga mwapwisha ilyo isambililo kuti mwatwalilila ne sambililo limbi ilyo abo muleshimikilako basala, nelyo kuti mwatendekela fye pe sambililo 1 muli iyi yine broshuwa.