Cinshi Cilenga Tuleshimikila?
1. Bushe kutemwa bani ukulenga tuleba abacincila mu mulimo?
1 Umulimo wa kushimikila imbila nsuma ya Bufumu bwa kwa Lesa, e mulimo wa cindama pa milimo yonse iyo tubomba. Nga tulebombako uyu mulimo, ninshi tulelanga ukuti tulomfwila ifunde lya kuti tuletemwa Yehova e lyo ne lya kuti tuletemwa abanensu, aya amafunde yabili yalicindama icine cine. (Marko 12:29-31) Kanshi ukutemwa Yehova na banensu e kulenga ukuti tuleba abacincila mu kushimikila.—1 Yoh. 5:3.
2. Bushe ukushimikila kulanga shani ukuti twalitemwa Yehova?
2 Ukutemwa Yehova: Ukutemwa Cibusa wesu Yehova, kulatucincisha ukulamulandilako. Pa myaka nalimo 6,000, Satana alibepesha sana Lesa. (2 Kor. 4:3, 4) Alenga bantu ukusumina ukuti Lesa alalungulusha ababi mu mulilo wa pe, no kuti abamo batatu, e lyo tabikako na mano ku bantu. Pa mulandu wa ifi, abantu abengi basumina ukuti takwaba Lesa. E co tufwaila ukuti abantu beshibe icine pali Shifwe wa ku muulu! Nga tulebombesha sana mu mulimo wa kushimikila, ninshi tulelenga Lesa wesu ukusekelela no kulenga Satana insoni.—Amapi. 27:11; Heb. 13:15, 16.
3. Bushe ukushimikila kulanga shani ukuti twalitemwa abantu banensu?
3 Ukutemwa Abanensu: Nga twashimikila umuntu, ninshi tulelanga ukuti twalimutemwa. Muli ino nshita ya-afya, abantu balekabila sana ukumfwa imbila nsuma. Abengi baba fye nga filya fine abena Ninebe ba mu nshiku sha kwa Yona bali, ‘tabaishibe nangu panono ukulekanya ukuboko kwabo ukwa ku kulyo no kwa ku kuso.’ (Yona 4:11) Imbila nsuma tushimikila ilalenga abantu ukuba ne nsansa. (Esa. 48:17-19) Kabili ilalenga baba ne subilo. (Rom. 15:4) Nga bakutika no kukonka ifyo balesambilila, ‘bakapusuka.’—Rom. 10:13, 14.
4. Finshi ifyo Yehova ashakalabe?
4 Abana basuma tabatemwa fye abafyashi limo limo, lelo balabombesha ukulanga ukuti balibatemwa lyonse. Na ifwe nga twalitemwa sana Lesa na bantu banensu, tukalashimikila lyonse ilyo twakwata ishuko, tatwakaleshimikila fye pa nshiku batantika pa cilonganino. E lyo kabili tukalashimikila ukwabula ukuleka. (Imil. 5:42) Ukwabula no kutwishika, Yehova takalabe ifyo tubombesha pa mulandu wa fyo twamutemwa.—Heb. 6:10.