Ni Bani Bengatemwa Ukubelenga Ici Cipande?
1. Finshi tulingile ukulatontonkanyapo ilyo tulebelenga Ulupungu lwa kwa Kalinda na Loleni!, kabili mulandu nshi?
1 Ilyo balepekanya Ulupungu lwa kwa Kalinda na Loleni!, balatontonkanya pa bantu mwi sonde lyonse. Kanshi mulaba amalyashi ayalekanalekana. E ico, ilyo tulebelenga icipande cimo na cimo, tulingile ukulatontonkanya pa bantu abengatemwa sana ukubelenga ico cipande no kubatwalila.
2. Malyashi nshi ayaba muli magazini yesu ayo abantu bengatemwa sana?
2 Bushe muli magazini iifumine muli icipande icilelanda pa lyashi mwalelanshanyapo nomba line na bo mubomba nabo? Bushe muli icipande icilelanda pa fya kwikala mu lupwa icingafwa lupwa wenu? Bushe kuli abo mwaishiba abalefwaya ukuya ku calo ico balandilepo muli Loleni!? Bushe pali magazini iyo abacita amakwebo nelyo aba mu fipani fya buteko mu cifulo mushimikila bengatemwa? Ku ca kumwenako, mu mayanda basungila abakoloci, kuti batemwa sana magazini iilelanda pa mafya abakote bakwata. Abalolesha pa kusunga umutende nabo kuti batemwa magazini iilelanda pali bantalamisoka.
3. Shimikeni ifyacitike ifilanga ubusuma bwaba mu kutwalila magazini abo twishibe ukuti ilyashi lilimo nalibakuma sana.
3 Ifisuma Ifyacitike: Ilyo munyinefwe umo no mwina mwakwe mu South Africa bapokelele Loleni! ya October–December 2011 iya kwete icipande icaleti, “Ifya Kukusha Bwino Abana,” batumiine foni ku masukulu 25 ayaba mu cifulo bashimikila no kwipusha nga kuti batemwa iyi magazini. Abakalamba ba masukulu 22 balisumine ukubatumina magazini, bapeela na abana be sukulu. Abaupana bambi muli ici cine calo nabo bacitile fimo fine kabili balishalike magazini pa masukulu yaba mu cifulo bashimikila. Na kuba, bakafundisha pe sukulu limo batendeke ukubomfya magazini pa masambililo ya kubelenga ayo balekwata na bana be sukulu cila mulungu. Aba baupana bashimikiile kangalila wa muputule ifyo bacitile kabili kangalila akoseleshe ifilonganino fyaba mu muputule wakwe ukulashimikila mu masukulu ayaba mu fifulo bashimikila. Iofeshi lya musambo lyasukile lya pulintilapo iyi magazini pantu abantu baleifwaya sana.
4. Mulandu nshi tulingile ukulapeelela abantu abengi magazini yesu?
4 Magazini yesu ilalanda umulandu ifyabipa filecitikila no kulenga abantu ukwishiba Baibolo no kusubila mu Bufumu bwa kwa Lesa. Na kuba e magazini fye yeka pano calo ‘iibila ipusukilo.’ (Esa. 52:7) Kanshi tulingile ukulapeela abantu abengi. Icingatwafwa sana kulayipusha ati, ‘Ni bani bengatemwa ukubelenga ici cipande?’