Mulepashanya Bakasesema—Sefania
1. Finshi fyalecitika ilyo Sefania ali kasesema, kabili finshi twingasambililako?
1 Muli ba 650 B.C.E., abantu abengi mu Yuda balepepa Baali. Pali iyi nshita, Yoshia ali fye umwaice kabili e watendeke ukuteka mu Yuda pa numa ya mfwa ya kwa wishi Amone uwali imfumu yabipa. (2 Imila. 33:21–34:1) Lyena, Yehova atumine Sefania ukubila ubupingushi ku baYuda. Nangu ca kuti Sefania nalimo afumine ku lupwa lwa mfumu, alibilishe ubupingushi bwa kwa Yehova ku ntungulushi sha baYuda ukwabula no kupita mu mbali. (Sefa. 1:1; 3:1-4) Na ifwe bene twalishipa nga Sefania, tatutiina balupwa ica kuti twafilwa no kubombela Yehova bwino. (Mat. 10:34-37) Finshi Sefania aebele abaYuda, kabili finshi fyafuminemo?
2. Finshi tufwile ukulacita pa kuti tukapusuke ilyo ubushiku bwa kwa Yehova bukesa?
2 Fwayeni Yehova: Yehova fye e wingapususha abantu mu bushiku bwa bukali bwakwe. E mulandu wine Sefania akoseleseshe abaYuda ukufwaya Yehova, ubulungami bwakwe, e lyo no bufuuke ilyo ubukali bwakwe bwali tabulaisa. (Sefa. 2:2, 3) Ifi fine e fyo caba na muno nshiku, tulakoselesha abantu ukufwaya Yehova. Na kabili, tulabombesha pa kuti na ifwe bene ‘tatufutatwike mu kukonka Yehova.’ (Sefa. 1:6) Tulanga ukuti tulafwaya Yehova nga ca kuti tulesambilila Icebo cakwe no kulalomba ukuti aletutungulula. Tulanga ukuti tulafwaya ubulungami nga tulekonka amafunde ya kwa Yehova. E lyo nga tuleba ne cumfwila no kulakonka ifyo ukuteyanya kwa kwa Yehova kutweba, ninshi tulelanga ukuti tulafwaya ubufuuke.
3. Mulandu nshi tulingile ukusuubila ukuti bamo bakakutika ku mbila nsuma?
3 Ifisuma Ifyafuminemo: Ilyo Sefania asokele abaYuda, bamo balyumfwile, maka maka Yoshia, pantu atendeke ukufwaya Yehova ilyo ali fye umwaice. Pa numa, Yoshia atampile ukucita ifyali no kupwisha ukupepa kwa bufi mu Yuda. (2 Imila. 34:2-5) Muno nshiku namo, nangu ca kutila imbuto sha bufumu shimo shitandwa mu mbali ya musebo, pa mabwe, nelyo mu myunga, shimo shilatandwa pa mushili uusuma kabili shilatwala ifisabo. (Mat. 13:18-23) Ukwabula no kutwishika Yehova akatwalilila ukutupaala ilyo tulebombesha mu mulimo wa kutanda imbuto sha Bufumu.—Amalu. 126:6.
4. Mulandu nshi tufwile ukulaenekela ubushiku bwa kwa Yehova?
4 AbaYuda bamo balemona kwati Yehova takalete ubupingushi pali bena. Lelo Yehova alilandile apabuuta tuutu ukuti ali no kuleta ubupingushi bwangu bwangu. (Sefa. 1:12, 14) Kabili ali no kupususha fye abali no kuuba muli ena. (Sefa. 3:12, 17) Ilyo tule-enekela ubushiku bwa kwa Yehova, natutwalilile ukupepa Lesa Mukulu Yehova capamo na babwananyina!—Sefa. 3:8, 9.