Mulebomfya jw.org Ilyo Muleshimikila

Inshila na imbi iyacindama iya kusabankanishishamo imbila nsuma ukufika “na ku mpela ya pano isonde,” kubomfya Webu saiti yesu ilyo tuleshimikila. (Imil. 1:8) Abantu abengi tabaishiba Webu saiti yesu iya jw.org, lelo nga twabalanga ilyo tuleshimikila, e lyo baishiba.

Kangalila wa muputule umo alikopolola vidio iipi iitila, Mulandu nshi Mulingiile Ukusambilila Baibolo?, kabili aliibika muli foni yakwe, e lyo alatambishako na bantu nga aleshimikila. Nga aleshimikila ku ng’anda ne ng’anda, alanda fye ukuti: “Ndefwaya ukumfwa ifyo mutontonkanya pali aya mepusho: Mulandu nshi amafya yafulila mu calo? Bushe Lesa akayapwisha shani? Kabili cinshi tulingile ukucita nga twaba na mafya? Iyi vidio yalyasuka aya mepusho yonse.” Nga alanda fye ifi, alatendeka ukutambisha umuntu vidio. Lilya umuntu aletamba, kangalila alalolesha umuntu pa kuti amone nga naitemwa nelyo iyo. Iyi vidio isuma sana ica kuti abantu abengi tabafumyako amenso mpaka yapwa. Pa numa, kangalila aleba umuntu ati: “Muli vidio bacitila nga mulefwaya ukusambilila Baibolo, kuti mwalanshanya ne Nte sha kwa Yehova. Nomba apo ndi nenu, kuti namulanga mu nshita fye iinono ifyo tusambilila Baibolo.” Umuntu nga asumina, alamulanga ifyo tusambilila Baibolo muli broshuwa ya Imbila Nsuma. Umuntu nga napamfiwa, alapangana nankwe inshita imbi ilyo engaya mulanga ifya kusambilila. E fyo acita na lintu aya mu cikuulwa pa kuti ashiteko ifya kulya nelyo ifya kunwa. Pa numa ya kuposha umuntu no kulanshanyako nankwe, alatendeka ukumutambisha vidio. Bushe na imwe mulabomfya jw.org ilyo muleshimikila?