ILEMBO LYA UNO MWESHI: “BILA ICEBO, CINCILA.”—2 TIM. 4:2.
Lyonse Muleshukila Inshita ya Kushimikila!
1. Cinshi twingasambilila ku fyo Davidi acitile?
1 Davidi uwali imfumu alibombele umulimo uwacindama nangu ca kuti tabamupeele amaka ya kucita fimo. Ku ca kumwenako, Davidi alefwaya sana ukuti akuulile Yehova ing’anda, lelo ilyo bamukeenye, Davidi talekelepo fye. Alyafwilishe umwana wakwe Solomone ukukuula itempele. (1 Isha. 8:17-19; 1 Imila. 29:3-9) Nangu ca kuti balimukeenye ukukuula itempele, Davidi alicitilepo cimo ku kwafwilisha umulimo wa kukuula itempele. Kuti twapashanya shani Davidi mu mulimo tubomba uwa kushimikila imbila nsuma?
2. Cinshi mulingile ukucita pa kuti mulebombesha?
2 Mulebomba Apapelele Amaka Yenu: Bamunyinefwe abengi balicefyako ifya kucita pa kuti balebombako bupainiya bwa nshita yonse nelyo ubwa kwafwilisha. (Mat. 6:22) Bushe na imwe kuti mwabombako? Nga mulepepa kuli Lesa ukuti akamwafwe, mukamona ukuti ‘mwalikwata ishuko ilikalamba’ ilya kubombesha.—1 Kor. 16:8, 9.
3. Cinshi tulingile ukucita pa kuti tuleshimikila apapelele amaka yesu nangu ca kuti te kuti tubombeko bupainiya?
3 Inga nga ca kutila kwaliba ifyalenga ukuti mwiba bapainiya? Na imwe kuti muleshukila inshita yonse iya kushimikila abantu. Ku ca kumwenako, nga mubomba na bashili ba Nte, kuti mulebashimikilako imbila nsuma. Nga mulalwalilila, kuti muleshimikila ababomba mu cipatala. Abashakwata amaka ya kushimikila sana imbila nsuma pa mulandu wa bukote nelyo ukulwalilila, kuti batuma lipoti nangu babombele fye amamineti 15. Nga mulelemba lipoti, muleibukisha ukusanshapo ne nshita iyo mwashimikile abantu mu bunte bwa mu lyashi, e lyo na matrakiti no tupepala mwaitilepo abantu ku kulongana kwa citungu na ku Cibukisho. Nga mulecita ifi, mukapapa ukumona ukuti inshita mushimikila ikulu!
4. Finshi mulefwaisha ukulacita?
4 Lyonse tuleshukila inshita ya kushimikila imbila nsuma nangu ca kuti kwaliba ifyalenga ukuti twilabombesha mu mulimo wa kushimikila. Nga tulecita ifi, tukaba ne nsansa pantu tukeshiba ukuti tulabomba apapela amaka yesu kabili tulacita fyonse ifyo tulingile ukucita mu mulimo wa kwa Lesa.—Marko 14:8; Luka 21:2-4.