Mulebomfya jw.org Ilyo Muleshimikila—“Beni Cibusa wa kwa Yehova”

Mu cipande icitila “Amasambilisho ya mu Baibolo” icaba pa jw.org, mwaliba ne cipande ica bana icitila “Beni Cibusa wa kwa Yehova.” Muli ici cipande ca bana mwaliba ne nyimbo, amavidio, e lyo na makardi apaba amepusho ayo abana bengaasuka. Bushe mwalibala amubomfyapo ici cipande ilyo muleshimikila? Nga ca kuti mulasambilila Baibolo no mufyashi uwakwata abana abanono, kuti mwamulangako ifyaba muli ici cipande. Ici kuti calenga afwaya ukubelenga ifyebo na fimbi ifyaba pali Webu saiti yesu.

Ilyo munyinefwe aleeshalika Imbila ya Bufumu Na. 38, akumenye umwanakashi uo apeele trakiti kabili atendeke ukubelenga ilyo line fye. Uyu mwanakashi ali na bana abanono abalefwaya ukwishiba ifyali muli iyi trakiti. Munyinefwe alibalondololweleleko panono ifyali muli trakiti kabili abalangile Webu saiti yesu iyaba ku nkupo. Apo uyu mwanakashi alefwaisha ukwishibilapo na fimbi, munyinefwe abomfeshe foni yakwe ukutambisha uyu mwanakashi na bana bakwe vidio ya kwa Kalebu.

Nkashi umo ashimikileko umwanakashi uo abomba nankwe uwakwata abana abanono pali Webu saiti yesu e lyo na pa fyebo ifyabapo ifilanda pa ndupwa. Uyu mwanakashi pamo na bana bakwe balile pa jw.org. Pa numa, aebele nkashi ukuti abana bakwe pa ng’anda balemba ulwimbo ulutila “Bileni Icebo,” ulwaba mu cipande citila “Beni Cibusa wa kwa Yehova.”

Mulingile ukwishiba ifyaba pa jw.org muli ici cipande, no kukopolwelako pali foni yenu vidio imo, ulwimbo, nelyo kardi ya bana. Nga mwacita ifi cikanguka ukubomfya ici cipande caba pa jw.org ilyo muleshimikila. Ala iyi Webu saiti yesu kuti yatwafwa ukulabombela bwino Shikulwifwe!—Imil. 20:19.