“Paulo, . . . Atootele Lesa Kabili Alikoshiwe”

Ilyo abali mu cilonganino mu Roma baumfwile ukuti Paulo ali mu nshila, ibumba lya ba bwananyina lyaendele amakilomita 64 ku kumukonkela. Bushe Paulo aumfwile shani pali ifi bacitile? Baibolo itila: “Paulo, ilyo fye abamwene, atootele Lesa kabili alikoshiwe.” (Imil. 28:15) Nangu ca kuti Paulo alekoselesha ifilonganino ifyo aletandalila, uyu muku wena ilyo ali umufungwa, e o bakoseleshe. —2 Kor. 13:10.

Muno nshiku, bakangalila wa muputule balatandalila ifilonganino ku kukosha bamunyinefwe na bankashi. Nga filya fine fwe bantu ba kwa Lesa twaba, inshita shimo nabo balanaka, balasakamikwa, kabili balafuupulwa. Finshi mukacita ilyo kangalila wa muputule no mwina mwakwe bakatandalila icilonganino cenu pa kuti mukabakoshe, ‘bakamukoseleshe e lyo na imwe mukabakoseleshe’?—Rom. 1:11, 12.

• 

  Mulesangwako ku kukumana kwa kuya mu kubila imbila nsuma. Kangalila wa muputule alakoseleshiwa nga ca kuti bakasabankanya baipeelesha ukutungilila umulungu waibela. (1 Tes. 1:2, 3; 2:20) Kuti mwabombako bupainiya bwa kwafwilisha mu mweshi kangalila wa muputule akatandalila icilonganino cenu. Kuti mwabomba nankwe pamo no mwina mwakwe mu mulimo wa kubila imbila nsuma nelyo kuti mwaya nankwe ku muntu musambilisha Baibolo. Balatemwa ukubomba na bakasabankanya abalekanalekana, ukubikako fye na bapya nelyo abamona ukuti tabaishiba sana ukubila imbila nsuma.

• 

  Mulebapokelela. Nalimo kuti mwabapokelela ku ng’anda ku mwenu ukuti bakekaleko ilyo balebombela icilonganino cenu nelyo ukubapekanishisha ifya kulya. Nga mwacita ifi kangalila wa muputule no mwina mwakwe bakamona ukuti mwalibatemwa. Tabenekela ukubapekanisha ifingi. —Luka 10:38-42.

• 

  Mulekutika no kucita ifyo bamweba ne fyo bamufunda. Kangalila wa muputule alatwafwa ukumona umo twingawamyako pa kuti tulebomba sana umulimo wa kwa Yehova. Inshita shimo, kuti atukalipila. (1 Kor. 5:1-5) Alatemwa sana nga tulemumfwila no kumunakila.—Heb. 13:17.

• 

  Muletasha. Muleeba kangalila wa muputule no mwina mwakwe ukuti mulanonkelamo mu fyo babombesha. Kuti mwabeba mwe bene nelyo kuti mwabalembela kalata nelyo kardi.—Kol. 3:15.