Icupo Cifwile Ukubelelela

Abena Kristu ababa ne nsansa mu fyupo balalenga Yehova acindikwa. (Marko 10:9) Pa kuti Umwina Kristu atwalilile ukuba ne nsansa mu cupo afwile ukukonka sana amashinte ya mafunde ya mu Baibolo ilyo alesala uwa kuupana nankwe.

Umwina Kristu tafwile ukutendeka ukwishishanya no uli onse ukufikila ‘acila na pa mushinku wa bwaice’ apo umuntu akwata sana insuna ya kulaala no mwaume nelyo umwanakashi, pantu pali iyi inshita cilafya sana ukusala bwino ifya kucita. (1 Kor. 7:36) Ilyo mucili abashimbe mulingile ukubomfya bwino inshita pa kuti mulekosha bucibusa bwenu na Lesa no kuba ne mibele ya Bwina Kristu. Nga mwacita ifi, ilyo mukopa nelyo ukuupwa cikamwangukila ukulacita ifingalenga mwaba ne nsansa mu cupo cenu.

Ilyo tamulasuminishanya ukuupana, mufwile ukukwata inshita iikalamba iya kwishiba bwino “ubuntu bwa mu kati” ubwa muntu mulefwaya ukuupana nankwe. (1 Pet. 3:4) Nga ca kuti kuliko ifyo mulemona ukuti tafili bwino, mufwile ukulanshanya no muntu mulefwaya ukuupana nankwe. Nga filya fine caba na kuli bucibusa bumbi ubo abantu bakwata, abaupana nabo balingile ukubika amano ku kucitila abena mwabo ifisuma ukucila ukulafwaya fye ukuti ebo balecitila ifisuma. (Fil. 2:3, 4) Kanshi nga ca kuti mulekonka amashinte ya mafunde ya mu Baibolo ilyo mushilaupa nelyo ukuupwa, cikamwangukila ukulayakonka na lintu mukopa nelyo ukuupwa kabili ici cikalenga mukabe ne nsansa mu cupo cenu.

TAMBENI VIDIO ITILA IFYO MWINGAIPEKANYA ILYO TAMULAUPA NELYO UKUUPWA—ULUBALI 3: “MUFWILE UKUIPEKANYA,” LYENA ASUKENI AMEPUSHO YAKONKAPO:

• Bushe ifintu fyali shani ilyo nkashi atendeke ukwishishanya na ba Shane?

• Finshi nkashi atendeke ukumona ilyo aishibe bwino ba Shane?

• Bushe abafyashi bakwe bamwafwile shani, kabili finshi asalilepo ukucita?