IFYO FWE BENA KRISTU TULINGILE UKULAIKALA
Muleisambilisha pa Kuti Muleishiba Ifyo Yehova Atontonkanya
Tufwaya ukulenga Yehova alasekelela muli fyonse ifyo tucita. (Amapi. 27:11) Pa kuti tucite ifi, tufwile ukushininkisha ukuti ifyo tulesalapo ukucita nafilingana no kufwaya kwakwe, nangu ca kuti tapali ifunde lya mukulungatika ilyo tufwile ukukonka. Finshi fingatwafwa ukucita ifi?
Lyonse muleisambilisha Icebo ca kwa Lesa. Nga tulebelenga Baibolo, ciba kwati tulelanshanya na Yehova. Kuti twasambilila ifyo Yehova atontonkanya nga twamona ifya kumwenako fya mu Baibolo, ifyo Yehova acitile ku bantu bakwe abalecita ifisuma e lyo na balecita ifyabipa. Ilyo tulefwaya ukupingula pa fintu, umupashi wa mushilo kuti watwafwa ukwibukisha ifintu ifyacindama ifyo twasambilila na mashinte ya mafunde ya mu Baibolo.—Yoh. 14:26.
Mulefwailapo ifyebo. Nga mulefwaya ukupingula pa fintu, yipusheni amuti, ‘Malyashi nshi nelyo ifikomo fya mu Baibolo ifingalenga naishiba ifyo Yehova omfwa pa fyo ndefwaya ukusalapo?’ Mulepepa pa kuti Yehova alemwafwa, kabili mulebomfya ifingamwafwa ukusanga ifyebo ifyo icilonganino cesu capekanya mu lulimi lwenu. Lyena bomfyeni amashinte ya mafunde ayengamwafwa ukulingana no bwafya mukwete.—Amalu. 25:4.
TAMBENI VIDIO ITILA ‘UKUBUTUKA NO KUSHIPIKISHA’—MULELYA IFYA KULYA IFISUMA, LYENA ASUKENI AMEPUSHO YAKONKAPO:
Mafya nshi nkashi wacaice uwaciba muli vidio akwete?
Kuti mwabomfya shani ifingamwafwa ukusanga ifyebo ifyo icilonganino cesu capekanya nga mwakwata ubwafya ubwapalako?
Ilyo tulesala ifya kucita, tunonkelamo shani nga tulesangako inshita ya kufwaya ifyebo ifingatwafwa e lyo no kuisambilisha Baibolo?—Heb. 5:13, 14