IFYO FWE BENA KRISTU TULINGILE UKULAIKALA

Muleafwa Abantu Abashipepa Ukwishiba Kabumba Wabo

Bushe mwalibala amufilwapo ukubila imbila nsuma ku bantu abashipepa pa mulandu wa kuti mumona ukutila te kuti bakutike? Nga e fyo mumona, muleibukisha ukuti abantu abengi abashalepepa, ukubikako fye na abashasumine ukuti Lesa e ko aba, balisambilila Baibo no kuba Inte sha kwa Yehova. Icikabilwa fye kubalanga fye ifinono ifilanga ukuti Lesa e ko aba.—Rom. 1:20; 10:14.

TAMBENI VIDIO ITILA MULEIBUKISHA UKUTI NA BANTU ABASHABA NE CITETEKELO KUTI BABA NE CITETEKELO!—ABANTU ABASHABIKA AMANO KU FYA MAPEPO, LYENA ASUKENI ICI CIPUSHO:

Bushe ica kumwenako ca ba Tommaso calenga shani mwamona ukuti mulingile ukulabila mbila nsuma na ku bantu abashipepa?

Lembeni icasuko

Ifyo mwingacita

Nga ca kuti umuntu alanga ukuti tasumina muli Lesa, muleba ne cikuuku, muleshilimuka, kabili mulelanga ukuti mulefwaisha ukwishiba ifyo atontonkanya ne fyo omfwa pali ilyo lyashi. (2 Tim. 2:24) Lanshanyeni pa malyashi ayo engatemwa. Bushe kuti atemwa ukulanshanya pa fyalenga abantu abengi bashininkishe ukuti kwaliba Kabumba? Nga kuti atemwa, bomfyeni impapulo isho bapangila ukwafwa abantu ba musango uyu. Broshuwa itila Was Life Created? Ne itila The Origin of Life—Five Questions Worth Asking baliyabika pa Impapulo Tubomfya Sana pa Kusambilisha Abantu pa kuti cileanguka ukushisanga.

Pa kubala nalimo kuti mwaumfwa umwenso wa kulanshanya icine no muntu uushasumina ukuti Lesa e ko aba. Kuti mwaeba kasabankanya uwaishiba sana ukubila imbila nsuma ukumwafwako. Muleibukisha no kuti Yehova kuti atwafwa ukufika abantu pa mutima nangu ca kuti pa kubala tabasumine ukuti e ko aba—Imil. 13:48.