Twalitemwa Sana Shifwe Yehova

1-2. Cinshi Yehova acitile pa kuti tube mu lupwa lwakwe, kabili cinshi calengele acite ifi?

YEHOVA alituleta mu lupwa lwakwe umwaba abamupepa. Ala lishuko nga nshi ukuba muli ulu lupwa! Mu lupwa lwa kwa Lesa mwaba abantu abaipeela kuli ena kabili abacetekela mwi lambo lya Mwana wakwe. Muli ulu lupwa mwaba abantu ba nsansa. Kanshi twaliba ne nsansa pali ino nshita, kabili tulasekelela pantu twalikwata isubilo lya kuba no mweo wa muyayaya, nampo nga tukalaikala ku muulu nelyo muli Paradaise pano isonde.

² Ukutemwa e kwalengele Yehova aipeeleshe sana pa kuti acitepo fimo ifyalenga tube mu lupwa lwakwe. (Yoh. 3:16) ‘Twashitilwe pa mutengo uukulu.’ (1 Kor. 6:20) Filya Yehova atuulile Umwana wakwe ilambo, fyalilenga twaba ne shuko lya kuba ifibusa fyakwe. Yehova alitucindamika pantu alitusuminisha ukulamwita ukuti Shifwe, nangu ca kuti alicindama sana ukucila ifibumbwa fyonse ifyaba mu muulu na pano isonde. Na kabili nga fintu twalandilepo mu cipande cafumineko, Yehova ni Shifwe umusuma sana.

3. Mepusho nshi twingayipusha? (Moneni na kabokoshi kaleti “Bushe Yehova Alimbikako Amano?”)

³ Nga fintu umo uwalembeleko Baibolo aipwishe, na ifwe kuti twayipusha atuti: “Cinshi ndebwesesha kuli Yehova pa fisuma fyonse ifyo ancitila?” (Amalu. 116:12) Icasuko ca kuti, tapali ico twingabwesesha Shifwe wa ku muulu pali fyonse ifyo atucitila. Na lyo line, ukutemwa kuntu atutemwa kulalenga na ifwe twamutemwa. Umutumwa Yohane alembele ukuti: “Tulatemwa, pantu Lesa e wabalilepo ukututemwa.” (1 Yoh. 4:19) Finshi twingacita pa kuti tulelanga ukutila twalitemwa Shifwe wa ku muulu?

MULEPALAMA KULI YEHOVA

4. Ukulingana ne fyaba pali Yakobo 4:8, cinshi tulingile ukulapalamina kuli Yehova?

⁴ Yehova afwaya twaba ifibusa fyakwe e lyo no kulalanshanya nankwe. (Belengeni Yakobo 4:8.) Atukoselesha ukuba “no mute wa kupepa,” kabili alakutika lyonse nga twapepa kuli ena. (Rom. 12:12) Yehova taba nga bafyashi abantunse abafilwa ukukutika ku bana babo pa mulandu wa kuti balanaka nelyo balakwata ifya kucita ifingi. Ena tanaka nelyo ukufilwa ukukutika kuli ifwe pa mulandu wa kukwata ifya kucita ifingi. Tulakutika kuli Lesa nga tulebelenga Icebo cakwe, Baibolo, e lyo ne mpapulo ishitwafwa ukumfwikisha ifyaba mu Baibolo. Inshila imbi iyo tukutikilamo kuli ena, kulabika amano ku fyo tusambilila pa kulongana kwa Bwina Kristu. Nga filya fine ukulanshanya libili libili kulenga abana balaumfwana bwino na bafyashi, ukulalanshanya libili libili na Yehova na ko kulenga twatwalilila ukuba ifibusa fyakwe.

5. Finshi tulingile ukucita ilyo tulepepa kuli Yehova?

⁵ Tontonkanyeni pa fyo amapepo mupepa kuli Lesa yaba. Yehova afwaya tulemweba fyonse ifili ku mutima. (Amalu. 62:8) Kanshi tulingile ukuyipusha ici cipusho: ‘Bushe amapepo yandi yaba nga makalata ayo nakopolwele fye, nelyo yaba nga makalata ayo nemba ukufuma pa nshi ya mutima?’ Te ca kutwishika ukuti mwalitemwa sana Yehova, kabili mulafwaya ukulakosha bucibusa bwenu na ena. Nomba pa kuti mukoshe bucibusa bwenu na Yehova, mufwile ukulalanshanya nankwe libili libili. Mulemulondolwela fyonse ifyo muleumfwa, ifyo nalimo mushingebako umuntu nangu umo. Na kabili, mulemweba ifilenga mwaba ne nsansa, ifimusakamika nelyo ifilenga muleba no bulanda. Mwilatwishika ukutila Yehova kuti amwafwa nga mwapepa kuli ena.

6. Finshi tulingile ukucita pa kuti tutwalilile ukuba ifibusa na Shifwe wa ku muulu?

⁶ Pa kuti tutwalilile ukuba ifibusa na Shifwe wa ku muulu, tulingile ukulamutasha lyonse. Amashiwi uwaimbile amalumbo alembele ya cine. Atile: “Ifyo mwacita fingi, mwe Yehova Lesa wandi, imilimo yenu iyapesha amano na matontonkanyo yenu kuli ifwe na fyo fingi. Takuli uwingalingana na imwe. Nga nali no kulanda no kusosa pali ifi fintu, fyalifulisha ica kutila te kuti mfipende.” (Amalu. 40:5) Tatutasha fye Yehova mu mutima, lelo tulalanga ukuti tulamutasha mu fyo tulanda na mu fyo tucita. Ici e calenga tupusaneko na bantu abengi muno nshiku. Abantu abengi muli cino calo tabatasha pa fyo Lesa abacitila. Na kuba, cimo icilanga ukuti tuleikala mu “nshiku sha kulekelesha” ca kuti abantu abengi tabatasha. (2 Tim. 3:1, 2) Tatufwile ukuba abashitasha, nge fyo abantu abengi baba!

7. Finshi Yehova afwaya tulecita, kabili mulandu nshi?

⁷ Abafyashi tabafwaya abana babo baleumana, lelo bafwaya baleumfwana bwino. Yehova na o afwaya bonse abamupepa baleumfwana bwino. Na kuba, ukutemwana twatemwana e kulanga ukuti tuli Bena Kristu ba cine. (Yoh. 13:35) Tumfwa nge fyo uwaimbile amalumbo aleumfwa uwalembele ukuti: “Ukwikala pamo mu cumfwano ukwa ba bwananyina kwaliwama kabili kulaleta insansa icine cine!” (Amalu. 133:1) Nga twatemwa bamunyinefwe na bankashi, ninshi tulelanga ukuti twalitemwa Yehova. (1 Yoh. 4:20) Ala twaliba ne nsansa ifi twaba mu lupwa umwaba bamunyinefwe na bankashi aba ‘cikuuku, kabili ababa ne mitima ya nkumbu!’—Efes. 4:32.

MULEBA NE CUMFWILA PA KULANGA UKUTI MWALITEMWA LESA

8. Ukulingana ne lembo lya 1 Yohane 5:3, mulandu nshi uukalamba uulenga tuleumfwila Yehova?

⁸ Yehova afwaya abana baleumfwila abafyashi babo, kabili afwaya na ifwe bonse tulemumfwila. (Efes. 6:1) Tulingile ukulamumfwila pantu e watubumbile, e utupeela ifyo tukabila pa kuti tutwalilile ukuba no mweo, kabili alikwatisha amano ukucila na bafyashi bonse abantunse. Na lyo line, icikalamba icilenga tuleumfwila Yehova, ni co twalimutemwa. (Belengeni 1 Yohane 5:3.) Nangu ca kuti kwaliba ifingi ififwile ukulenga twalaumfwila Yehova, tatupatikisha ukulamumfwila. Yehova alitupeela ubupe bwa kuisalila ifya kucita, kanshi alatemwa nga twasalapo ukulamumfwila pa mulandu wa kuti twalimutemwa.

9-10. Mulandu nshi tulingile ukwishibila amafunde ya kwa Lesa no kulayakonka?

⁹ Abafyashi bafwaya abana babo bacingililwa. E mulandu wine babapeelela amafunde ayalenga bacingililwa kabili baba ne mibele iisuma. Abana nga balekonka amafunde, balanga ukuti balicetekela abafyashi babo kabili balibacindika. Kanshi calicindama sana ukwishiba amafunde ya kwa Shifwe wa ku muulu e lyo no kulayakonka. Nga tulecita ifi, tukalalanga ukuti twalitemwa Yehova kabili twalimucindika. Na kabili, tulanonkelamo sana nga tulekonka amafunde ya kwa Yehova. (Esa. 48:17, 18) Lelo abashikonka amafunde ya kwa Yehova balaba na mafya.—Gal. 6:7, 8.

¹⁰ Nga tulecita ifyo Yehova afwaya, tatwakulasakamikwa sana, tatwakulacita ifingonaula bucibusa bwesu na Yehova, kabili tukalaicingilila na ku mafya ayo abashikonka amafunde ya kwa Yehova bakwata. Yehova alishiba ifingatuwamina. Ba Aurora, abekala ku America, batile, “Nalishiba ukuti ukumfwila Yehova e kulenga umuntu aleba ne nsansa.” Ifyo ba Aurora balandile fya cine. Bushe munonkelamo shani mu kukonka amafunde ya kwa Yehova?

11. Bushe ipepo litwafwa shani?

¹¹ Ipepo lilatwafwa ukuba ne cumfwila, na lintu citukosele ukuba ne cumfwila. Kwena inshita shimo kuti catukosela ukumfwila Yehova pa mulandu wa lubembu twapyana kuli Adamu, lelo tufwile ukulaesha na maka ukuba ne cumfwila. Uwaimbile amalumbo alombele Lesa ati: “Nengeni ukwiluka, pa kuti ndekonka amafunde yenu. Pa kuti ndeyakonka no mutima onse.” (Amalu. 119:34) Ba Denise, bapainiya ba nshita yonse, batile, “Nga cankosela ukukonka amafunde ya kwa Yehova, ndapepa kuli ena pa kuti ampeele amaka ya kucita icalungama.” Te ca kutwishika ukuti Yehova lyonse alasuka amapepo ya musango uyu.—Luka 11:9-13.

MULEAFWA ABANTU UKUTEMWA SHIFWE

12. Ukulingana ne fyaba pa Abena Efese 5:1, finshi tulingile ukulacita?

¹² Belengeni Abena Efese 5:1. Tulesha na maka ukulapashanya Yehova pantu tuli “bana bakwe abo atemwa.” Tulapashanya Yehova nga tuletemwa abantu, nga tuli ne cikuuku kabili nga tule-elela abanensu. Abantu abashaishiba Lesa nga bamona imibele yesu iisuma, kuti balafwaya ukwishibilapo ifingi pali Yehova. (1 Pet. 2:12) Abafyashi Abena Kristu bafwile ukulasunga abana babo bwino nga filya fine Yehova atusunga bwino. Nga balecita ifi, abana babo nabo bakaba ifibusa na Shifwe uwaba no kutemwa.

13. Finshi tulingile ukucita pa kuti tube abashipa?

¹³ Umwana umunono alomfwa icilumba pali ba wishi kabili alatemwa ukulanda pali bena. Na ifwe bene tulomfwa icilumba pali Shifwe wa ku muulu Yehova, kabili tulafwaya abantu bambi nabo bamwishiba. Tumfwa nge fyo Imfumu Davidi yaumfwile iyatile: “Muli Yehova e mo umweo wandi ukatakishisha.” (Amalu. 34:2) Inga ca kuti tulomfwa umwenso ukwebako bambi pali Yehova? Finshi fingatwafwa ukuba abashipa? Kuti twaba abashipa nga tulebika amano ku fyo Yehova engaba ne nsansa nga twaebako abantu pali ena. Cimbi icingatwafwa ukuba abashipa kulatontonkanya pa fyo abantu benganonkelamo nga ca kuti baishiba icine. Yehova akatukosha. Nga filya fine aleafwa aba bwananyina mu nshiku sha batumwa, e fyo na ifwe akulatwafwa.—1 Tes. 2:2.

14. Fintu nshi fimo ifilenga tulebila imbila nsuma?

¹⁴ Yehova taba na kapatulula, kanshi alomfwa bwino nga tulelanga abantu ukuti twalibatemwa, te mulandu ne nkulilo yabo. (Imil. 10:34, 35) Inshila imo iisuma iyo twingalangilamo ukuti twalitemwa abantu, kubashimikilako imbila nsuma. (Mat. 28:19, 20) Bushe abantu banonkelamo shani nga tulebashimikilako imbila nsuma? Bonse abakutika imbila nsuma iyo tubila, balaba ne nsansa pali ino nshita, kabili bakaba no mweo wa muyayaya ku ntanshi.—1 Tim. 4:16.

MULETEMWA SHIFWE KABILI MULEBA NE NSANSA

15-16. Finshi fingalenga twatwalilila ukuba ne nsansa?

¹⁵ Yehova ni Shifwe uwaba no kutemwa, kanshi afwaya ababa mu lupwa lwakwe baleba ne nsansa. (Esa. 65:14) Kwaliba ifingi ifilenga tuleba ne nsansa pali ino nshita, nangu ca kuti tulaba na mafya. Ku ca kumwenako, twalishiba ukuti Shifwe wa ku muulu alitutemwa icine cine. Na kabili, twalishiba icine icaba mu Cebo ca kwa Lesa, Baibolo. (Yer. 15:16) Cimbi icilenga tuleba ne nsansa ni co twaba mu lupwa ulwaibela umwaba abantu abatemwa Yehova, abakonka amafunde yakwe, kabili abatemwana.—Amalu. 106:4, 5.

¹⁶ Kuti tuleba ne nsansa lyonse pantu twalikwata isubilo lya kuti ifintu fikawama ku ntanshi. Twalishiba ukuti nomba line fye Yehova ali no kufumyapo ifyabipa fyonse, kabili akabomfya Ubufumu bwakwe pa kulenga isonde ukuba Paradaise. Na kabili, twalikwata isubilo lya kuti abafwa bonse bakabuuka kabili bakaba pamo na balupwa lwabo ne fibusa. (Yoh. 5:28, 29) Ala iyi ikaba ni nshita ya nsansa! Ne cacilapo ukucindama ca kuti, twalishiba ukutila nomba line fye bonse abakaba mu lupwa lwa kwa Yehova abakalaikala ku muulu, na bakalaikala pano isonde, bakalapepa no kulumbanya Shifwe uwaba no kutemwa.