IFYO TWINGACITA PA KULEKA UKUBA NO LUPATO

1 | Mwilaba Na Kapaatulula

Ifyo Baibolo Ilanda:

“Lesa taba na kapaatulula, lelo umuntu uwa mu luko lonse uutiina Lesa no kucita icalungama alapokelelwa kuli ena.”—IMILIMO 10:34, 35.

Umo aya Mashiwi Yalola:

Yehovaa Lesa tatupingula ukulingana ne calo twafumako, umushobo wesu, ifyo inkanda yesu imoneka nelyo intambi tukonka. Lelo ico abikako sana amano fintu tutontonkanya ne fyo tufwaisha. Pantu na kuba, “umuntunse amona fye ifimoneka ku menso; lelo Yehova ena, amona mu mutima.”—1 Samwele 16:7.

Ifyo Mwingacita:

Nangu ca kuti ifwe tatwakwata amaka ya kumona abantu mu mitima, kuti tulepashanya Lesa nga ca kuti tatuleba na kapaatulula. Mwilapingula umuntu pa mulandu ne fyo mwaishiba incende afumako nelyo ulupwa akulilamo, lelo mulebika amano ku fyo aba. Nga mwamona ukuti mwalipata abantu bamo nalimo abafuma ku calo cimbi, mulepepa kuli Lesa ukuti alemwafwa ukuleka ukuba no lupato. (Amalumbo 139:23, 24) Nga mwapepa kuli Yehova ukufuma pa nshi ya mutima ukuti amwafwe ukuleka ukuba no lupato, mwilatwishika no kutwishika ukuti akaasuka amapepo yenu.—1 Petro 3:12.

a Yehova e shina lya kwa Lesa.—Amalumbo 83:18.

“Nshatalile njikalapo mu mutende na basungu . . . Nomba nalishininkisha ukuti naba mu lupwa ulwa mwi sonde lyonse umwaba abantu abatemwana ukufuma pa nshi ya mutima.”—E FYALANDILE BA TITUS

Ifyo Bamo Bashimike—BA TITUS

Ifyo Bacitile pa Kuti Baleke Ukuba no Lupato

Ba Titus balifulilwe sana pa fyo amafunde yalepaatulula abantu abakwata inkanda ishapusana. Ici calengele bengile mu kabungwe umwali abantu abankalwe abapatile sana aya mafunde. Batile: “Twaleya mu fikuulwa pamo nga ama hotela ne fikuulwa fya kunwinamo ubwalwa umo bashasuminishe abantu abafiita ukwingila ne co twalecitila ifi kufwaya ukwimya ifimfulunganya.” Ba Titus balisumine ukuti icalengele balecita ifi ni co baali sana no lupato. Batile: “Nga ca kuti napusana no muntu, nine nalebalilapo ukumumamo pa kuti tulwe.”

Ba Titus balitendeke ukwaluka ilyo batendeke ukusambilila Baibolo ne Nte sha kwa Yehova. Ifyo balebelenga mu Baibolo fyalilengele batendeka ukwaluka mu fyo baletontonkanya. Balitemenwe sana ifyo Lesa atulaya ukuti mu calo cipya “imfwa tayakabeko na kabili, takwakabe no kuloosha nangu ukuteta nangu ukukalipwa na kabili.”—Ukusokolola 21:3, 4.

Pa kubala ba Titus calibafishe sana ukuleka ukupata abantu. Balandile ukuti: “Calishupile sana ukwaluka mu fyo naletontonkanya e lyo na mu fyo nalecita.” Nomba amashiwi yaba pa Imilimo 10:34, 35 yalibafwile sana, pantu yatila “Lesa taba na kapaatulula.”

Bushe ifintu fyaishileba shani? Ba Titus batile: “Nalishininkishe ukuti Inte sha kwa Yehova balapepa Lesa ukulingana ne fyo afwaya, pantu nalimwene ifyo balelanga abantu banabo ukutemwa, te mulandu no kuti nabapusana inkanda. Ilyo nshilabatishiwa, uwa bwananyina umo mu cilonganino umusungu alinjitile ukuti tuye tuliile pamo ica kulya ku mwakwe. Nalipapile sana kabili namwene kwati ndeloota. Nshatalile njikalapo mu mutende na basungu nangu ukuliila pamo nabo ifya kulya mu ng’anda mu mwabo. Nomba nalishininkisha ukuti naba mu lupwa ulwa mwi sonde lyonse umwaba abantu abatemwana ukufuma pa nshi ya mutima.”