IFYO TWINGACITA PA KULEKA UKUBA NO LUPATO

4 | Lesa Kuti Amwafwa Ukuleka Ukuba No Lupato

Ifyo Baibolo Isambilisha:

“Ifisabo fya mupashi kutemwa, ukusekelela, umutende, ukushishimisha, icikuuku, ubusuma, icitetekelo, ukufuuka, no kuilama.”—ABENA GALATIA 5:22, 23.

Umo aya Mashiwi Yalola:

Lesa fye e wingatwafwa ukuleka ukuba no lupato. Umupashi wa mushilo uwa kwa Lesa kuti walenga twakwata imibele iyo tushingakwata ku maka yesu. Kanshi mu nshita ya kuti tule-esha ukuleka ukuba no lupato ku maka yesu, tuleleka Lesa e o aletwafwa. Nga tulecita ifi, tukalanda nge fyo umutumwa Paulo alandile uwatile: “Muli fyonse ndi na maka pantu kuli uulenkosha.” (Abena Filipi 4:13) Kabili tukalanda ukuti: “Ukungafwa kufuma kuli Yehova.”—Amalumbo 121:2.

Ifyo Mwingacita:

“Yehova alingafwa ukuleka ulubuli.”—E FYALANDILE BA WALDO

Mulepepa kuli Yehova no kulomba umupashi wakwe uwa mushilo. (Luka 11:13) Mulemulomba ukuti alemwafwa ukuba ne mibele iisuma. Mulebelenga Baibolo pa kuti ilemwafwa ukuba ne mibele pamo nga, ukutemwa, umutende, ukutekanya, e lyo no kuilama, pantu iyi mibele kuti yalenga mwaleka ukuba no lupato. Kabili mule-esha ukulanga ukuti mwalikwata iyi mibele. Muleba ifibusa na bantu abakwata iyi mibele. Abantu ba musango yu kuti bamwafwa ukuba no ‘kutemwa e lyo no kubomba imilimo iisuma.’—AbaHebere 10:24.

Ifyo Bamo Bashimike—BA WALDO

Ifyo Bacitile pa Kuti Baleke Ukuba no Bunkalwe no Lupato

Ilyo ba Waldo balekula ifintu fyalibipile sana ica kuti baishileba no lupato. Batile: “Nalelwa sana na baleshitisha imiti ikola . . . Bushiku bumo, ibumba lya bacintomfwa limbi lyalyumene akapi ne cipondo icalumbwike sana pa kuti cinjipaye, lelo nalipuswike, cancenene fye.”

Ba Waldo tabatemenwe ilyo abena mwabo batendeke ukusambilila Baibolo ne Nte sha kwa Yehova. Balandile ukuti: “Nalipatile sana baNte kabili ilingi line nalebapontela. Lelo nalipapile ukuti nangu nalebapontela, tabalefulwa.”

Mu kuya kwa nshita, ba Waldo na bo balitendeke ukusambilila Baibolo. Batile: “Nangu nasambilile fyonse ifi, calingafishe ukulacita ifyo nalesambilila. Nalemona kwati nshakaleke ukuba uwa lubuli.” Lelo kwali fimo ifyo basambilile mu Baibolo ifyalengele baluke.

Ba Waldo balandile ukuti: “Bushiku bumo, ba Alejandro, abalensambilisha Baibolo, banjebele ukubelenga Abena Galatia 5:22, 23. . . . Ba Alejandro banondolwelele ukuti umupashi wa mushilo e wingangafwa fye ukuba ne yi imibele ilembo lyalandapo. Ifyo nasambilile muli ili ilembo fyalilengele nayaluka.”

Filya ba Waldo balekele Lesa abafwa, fyalilengele baleka ukuba no lupato.Balandile ukuti: “Balupwa lwandi e lyo na bo naleangala nabo balafilwa ukushininkisha nga bamona ifyo nayaluka.” Kabili batile: “Yehova alingafwa ukuleka ulubuli.”