Bonse Tulasalapo Ukucita Ifisuma Nangu Ifyabipa

Finshi mwingacita nga mulefwaya ukuya uko mushabala amuyapo?

1. 1. Ukulungama fye uko mulemona ukuti e ko mulingile ukuya.

2. 2. Ukukonka uko bambi baleya, no kusubila ukuti uko baleya e ko na imwe mulingile ukuya.

3. 3. Ukwipushako umuntu uwingamutungulula, nelyo ukusenda mapu.

Nga twasalapo ukucita ifili pa 1 nelyo pa 2, te kuti tufike uko tulefwaya ukuya. Nga twacita ifili pa 3 kuti twacetekela ukuti tulefika uko tulefwaya ukuya.

Caba kwati na ifwe twaba pa bulendo ubukalenga tukabe ne nsansa ku ntanshi. Pa kuti tukabe ne nsansa ku ntanshi tulingile ukwishiba bwino ifingatutungulula ilyo tulesala ifya kucita.

Nangu ca kuti fimo ifyo tusalapo ukucita tafikuma ifyo ubumi bwesu bukaba ku ntanshi, fimo filatukuma sana. Ifyo tusalapo ukucita filalanga ifyo tumona ukuti fisuma ne fyo tumona ukuti fyalibipa. Ifyo tusalapo kuti fyalenga twaba ne nsansa na balupwa lwesu nelyo twaba na mafya pa myaka iingi. Fimo ifyo tulingile ukusalapo fintu pamo nga:

• Ukulaala no muntu ne cupo

• Ukuba ne cishinka, incito, ne ndalama

• Ifya kukusha abana

• Ifya kwikala na bantu

Kuti mwaishiba shani nga ca kuti ifyo musalapo ukucita pali ifi fintu fikalenga imwe no lupwa lwenu mukabe ne nsansa ku ntanshi?

Icipusho ifwe bonse tulingile ukuipusha ni ci: Cinshi cingatutungulula pa kutila tatucitile ifyabipa?

Ino magazini yalalondolola umulandu twingacetekela Baibo ukutila kuti yatutungulula no kutwafwa.