Ifyo Inkondo Ikapwa

LESA AKAFUMYAPO AMABUTEKO YA BANTUNSE

Lesa akonaula amabuteko ya bantunse yonse pa nkondo iyo Baibo ita ukutila Armagedone.a (Ukusokolola 16:16) Pali ilya nshita, “imfumu sha ba pano isonde bonse, bakashilonganika ku nkondo ya bushiku bukalamba ubwa kwa Lesa wa Maka Yonse.” (Ukusokolola 16:14) Inkondo ya kwa Lesa iya Armagedone, ikapwisha inkondo shonse.

Lesa akafumyapo amabuteko ya bantunse, kabili akabikako Ubufumu ubukalatekela ku muulu. Ubu Ubufumu tabwakatale abonaulwa. (Daniele 2:44) Lesa alisala Umwana wakwe Yesu Kristu ukuti abe Imfumu ya ubu Ubufumu. (Esaya 9:​6, 7; Mateo 28:18) Ubu ubuteko, e Bufumub ubo Yesu aebele abasambi bakwe ukuti balebupepela. (Mateo 6:​9, 10) Ubufumu ubo Yesu Kristu akalateka, bukalateka abantunse bonse mwi sonde lyonse.

Yesu te kaitemwe nga filya bakateka abantunse baba. Ena takwata akapatulula, e ico takuli umuntu nangu umo uo akalekelesha pa mulandu fye wa mushobo wakwe nelyo icalo uko afuma. (Esaya 11:​3, 4) Na kabili, abantu tabakalelwa pa kuti fye belabekala pa nsambu. Mulandu nshi? Pantu Yesu akabika amano ku bantu bonse. Na kuba Baibo itila: “Akapususha umupiina uulepunda mutuule, Kabili akapususha uo balecusha e lyo no uushakwata bakumwafwa. . . . Akabapususha ku bankalwe na kubacusha abantu.”—Amalumbo 72:​12-14.

Ubufumu bwa kwa Lesa bukalofya ifyanso fyonse pano isonde (Mika 4:3) Bukafumyapo na bantu bonse abashifwaya ukuleka ukulwa nelyo abalenga abantu bambi belaikala mu mutende. (Amalumbo 37:​9, 10) Umwaume onse, umwanakashi, nelyo umwana akalaikala mu mutende konse uko engaya pano isonde ponse.—Esekiele 34:28.

Abantu bonse bakalaikala bwino mu Bufumu bwa kwa Lesa. Lesa akafumyapo fyonse ifilenga abantu balelwa pamo nga ubupiina, insala, e lyo no kukanakwata umwa kwikala umusuma. Abantu bonse bakalakwata ifya kulya ifisuma, kabili bakalaikala bwino.—Amalumbo 72:16; Esaya 65:​21-23.

Mu Bufumu bwa kwa Lesa, Lesa akafumyapo fyonse ifyabipa ifibako pa mulandu ne nkondo. Pali ifi paba no kulemana, e lyo no bulanda ubo abantu bakwata pa mulandu na mafya ayo balekwata pa mulandu ne nkondo. Nangu fye bantu abafwa mu nkondo bakabuuka. (Esaya 25:8; 26:19; 35:​5, 6) Aba mu lupwa bakalaikala pamo na kabili, kabili tabakaleibukisha ifyabipa ifibako pa mulandu wa nkondo pantu fikaba “nafipita.”—Ukusokolola 21:4.

LESA AKAFUMYAPO ULUBEMBU

Mu Bufumu bwa kwa Lesa, abantu bonse bakekatana kabili bakalapepa fye Lesa wa cine Yehova,c “Lesa wa kutemwa kabili uwa mutende.” (2 Abena Korinti 13:11) Abantu bakasambilila ukwikala pamo mu mutende. (Esaya 2:​3, 4; 11:9) Bonse abakalacita ifyo bakalasambilila bakalubuka ku lubembu.—Abena Roma 8:​20, 21.

LESA AKONAULA SATANA NE FIBANDA FYAKWE

Ubufumu bwa kwa Lesa bukafumyapo abalenga kuleba inkondo, e kutila Satana ne fibanda fyakwe. (Ukusokolola 20:​1-3, 10) Ilyo Lesa akonaula Satana ne fibanda fyakwe, “umutende ukaba konse.”—Amalumbo 72:7.

Kuti twacetekela ukuti filya Lesa atulaya ukuti akafumyapo inkondo no bunkalwe fikacitika, pantu Lesa alafwaisha nga nshi ukufumyapo inkondo kabili alikwata na maka ya kuifumyapo.

• Lesa alishiba ifya kucita pa kupwisha inkondo no bunkalwe kabili alikwata na maka ya kuipwisha. (Yobo 9:4) Takwaba ico Lesa engafilwa ukucita.—Yobo 42:2.

• Lesa tafwaya ukumona abantu balecula. (Esaya 63:9) Kabili “alipata bonse abatemwa ubunkalwe.”—Amalumbo 11:5.

• Lesa tabepa, lyonse alacita ifyo alaya.—Esaya 55:​10, 11; Tito 1:2.