ICIPANDE CA KUSAMBILILAMO 26
ULWIMBO 123 Tulenakila Yehova Lesa
Muleicefya Nga ca Kuti Tamwishibe Ifintu Fimo
“Te kuti twishibe fyonse pa Wa Maka Yonse.”—YOBO 37:23.
IFYO TWALASAMBILILAPO
Nangu ca kuti tatwaishiba fyonse ifikacitika ku ntanshi, kuti twashipikisha amafya ayo twingakwata nga ca kuti tuletontonkanya pa fyo twaishiba, kabili nga ca kuti twacetekela Yehova.
1. Bushe Yehova atubumbile shani, kabili mulandu nshi atubumbile muli iyi inshila?
YEHOVA atubumbile mu nshila ya kuti tuletontonkanya, tuleishiba ifintu, tuleumfwikisha fimo kabili tulecita ifilanga ukuti tuli ba mano. Mulandu nshi Yehova atubumbile muli iyi inshila? Ni co alefwaya ukuti tumwishibe kabili tulemubombela na maka yesu aya kupelulula.—Amapi. 2:1-5; Rom. 12:1.
2. (a) Finshi tulingile ukwishiba? (Yobo 37:23, 24) (Moneni ne cikope.) (b) Mulandu nshi tulingile ukwishibila ukuti te fyonse twaishiba?
2 Nangu ca kuti Yehova atubumbile mu nshila ya kuti tuleishiba ifintu, te fyonse twaishiba. (Belengeni Yobo 37:23, 24.) Tontonkanyeni pali Yobo. Yehova alimwipwishe amepusho ayengi ayalengele eluke ukuti kwali ifintu ifingi ifyo ashaishibe. Ifyo alanshenye na Yehova fyalengele eluke ukuti alingile ukuba uwaicefya no kwaluka mu fyo aletontonkanya. (Yobo 42:3-6) Kuti cawama na ifwe twaishiba ukuti te fyonse twaishiba. Nga twaishiba ukuti kwaliba ifingi ifyo tushaishiba, tukaba abaicefya, kabili tukacetekele ukuti Yehova akulatweba ifyo tulingile ukwishiba pa kuti tulesala bwino ifya kucita.—Amapi. 2:6.
Nga twasumina ukuti kwaliba ifyo tushaishiba nga filya Yobo acitile, te kuti tulesakamikwa sana (Moneni paragrafu 2)
3. Finshi twalalandapo muli cino cipande?
3 Muli cino cipande, twalalanda pa fintu ifyo tushaishiba e lyo no mulandu ukukanaishibila ifi fintu kwingalengela twalasakamana. Twalasambilila ne co twingalandila ukuti caliba fye bwino ifi tushaishiba ifintu fimo. Nga twasambilila pali ifi, calalenga tucetekele sana ukuti Yehova “uwaishiba fyonse” alatweba ifyo tulingile ukwishiba.—Yobo 37:16.
TATWAISHIBA ILYO IMPELA IKESA
4. Ukulingana ne fyaba pali Mateo 24:36, cintu nshi cimo ico tushaishiba?
4 Belengeni Mateo 24:36. Tatwaishiba ilyo impela ya cino calo ikesa. Nangu fye ni Yesu ilyo ali pano isonde, taishibe ilyo “ubushiku bulya bukafika ne nshita bukafika.”a Bushiku bumo Yesu aebele abatumwa bakwe ukuti Yehova alipima inshita ilyo ifintu fimo fikacitika. (Imil. 1:6, 7) Yehova alipima inshita ilyo cimo calo cikapwa, lelo ifwe te kuti twishibe bwino bwino ilyo icalo cikapwa.
5. Finshi fingacitika ifi tushaishiba ilyo impela ya cino calo ikesa?
5 Ukulingana ne fyo Yesu alandile, tatwaishiba inshita iili no kupitapo pa kuti impela ya cino calo ikese. Ifi kuti fyalenga twanaka ukulolela nelyo twafuupuka, maka maka nga ca kuti ni kale twatendeka ukulolela ubushiku bwa kwa Yehova. Nelyo kuti catukosela ukushipikisha nga ca kuti aba mu lupwa nelyo abantu bambi baletupumya. (2 Pet. 3:3, 4) Nalimo kuti twalatontonkanya atuti nga ca kuti twalishibe ilyo impela ya cino calo ikesa, kuti catwangukila ukulolela kabili kuti twalashipikisha nga ca kuti balupwa nelyo abantu bambi baletupumya.
6. Cinshi twingalandila ukuti caliba fye bwino ifi tushaishiba ilyo impela ya cino calo ikesa?
6 Na kuba ifi Yehova ashatweba ilyo impela ya cino calo ikesa, alilenga twakwata inshita ya kulanga ukuti icilenga tulemubombela, ni co twalimutemwa kabili twalimucetekela. Ilyo tulebombela Yehova tatubika amano ku nshita iyo impela ya cino calo ikesa kwati nalimo ukubombela Yehova kwalikwata impela. Mu nshita ya kubika sana amano ku nshita iyo ubushiku bwa kwa Yehova bukesa, kuti cawama twabika amano ku fisuma ifikacitika ilyo ubushiku bwa kwa Yehova bukesa. Nga tulecita ifi, tukaba sana ifibusa na Yehova, tukamucetekela, kabili tukalacita ifikalalenga alesekelela.—2 Pet. 3:11, 12.
7. Finshi twaishiba?
7 Kuti caba bwino nga twabika amano ku fyo twaishiba ukuti inshiku sha kulekelesha shatendeke mu 1914. Mu Baibo mwaliba amasesemo ayalanga ukuti inshiku sha kulekelesha shatendeke mu 1914. Na kabili Yehova alitwebele ifyo ifintu fyali no kuba mu calo pa numa ya mwaka wa 1914. Ifi fyalenga twashininkisha ukuti, “ubushiku ubukalamba ubwa kwa Yehova nabupalama.” (Sefa. 1:14) Na kabili twalishiba umulimo uo Yehova afwaya tulebomba, e kutila umulimo wa kubila “imbila nsuma ya Bufumu” ku bantu abengi. (Mat. 24:14) Iyi imbila nsuma ilebilwa nalimo mu fyalo 240, kabili mu ndimi ukucila pali 1,000. Bushe tulingile ukwishiba ‘ubushiku ne nshita’ pa kuti tuleba abacincila muli uyu mulimo uwacindama? Awe.
TATWAISHIBA IFYO YEHOVA ENGACITA PA KUTWAFWA
8. Bushe amashiwi ya kuti “imilimo ya kwa Lesa wa cine,” yalanda pali finshi? (Lukala Milandu 11:5)
8 Te lyonse twishiba “imilimo ya kwa Lesa wa cine.” (Belengeni Lukala Milandu 11:5.) Amashiwi ya kuti “imilimo ya kwa Lesa wa cine,” yalanda pa fyo Yehova alenga fyacitika nelyo ifyo aleka fyacitika pa kuti afikilishe ifyo afwaya. Te kuti twishibe ico Yehova engasuminishisha ifintu fimo ukuti ficitike nelyo ifyo engacita pa kutwafwa. (Amalu. 37:5) Baibo ilinganya ifyo tushingeshiba imilimo ya kwa Lesa wa cine ku fyo tushingeshiba bwino ifyo umwana akula mwi fumo lya kwa nyina. Nangu fye ni basayantisiti tabaishiba bwino ifyo umwana akula mwi fumo lya kwa nyina. Ifi fine e fyo na ifwe tushaishiba bwino ifyo Yehova acita ifintu.
9. Nga tatwishibe ifyo Yehova engatwafwa, finshi nalimo twingatendeka ukucita?
9 Nga tatwishibe bwino ifyo Yehova engatwafwa, kuti twalawayawaya pa kusalapo ifya kucita. Ku ca kumwenako, kuti twalawayawaya ukuipeelesha pa kuti tulebombesha mu mulimo wa kubila imbila nsuma, kuti twalawayawaya ukwangusha imikalile nelyo ukuya uko bakabila ba mbila nsuma bacepa. Nelyo kuti twalatwishika nga ca kuti Yehova alitutemwa nga twafilwa ukufikilisha ifyo twapanga ukucita mu mulimo wakwe, nga ca kuti mu mulimo wa kubila imbila nsuma tamulefuma ifisuma sana nelyo nga natukwata amafya ayengi ilyo tulebomba umulimo wa makuule mu cilonganino ca kwa Lesa.
10. Mibele nshi iyacindama iyo twingakwata pa mulandu wa kuti tatwaishiba ifyo Yehova engatwafwa?
10 Ifi tushaishiba ifyo Yehova engatwafwa, kuti fyalenga twakwata imibele iyacindama pamo nga ukuicefya e lyo no kufuuka. Kabili tuleshiba ukuti ifyo Yehova atontonkanya fyalicila ifyo tutontonkanya, ne fyo acita ifintu fyalicila ifyo tucita ifintu. (Esa. 55:8, 9) Na kabili tulasambilila ukucetekela sana Yehova no kushintilila pali ena ukuti akulatwafwa. Nga ca kuti mu fyo tulebila imbila nsuma mulefuma ifisuma nelyo umulimo wa makuule ule-enda bwino, tulalumbanya Yehova. (Amalu. 127:1; 1 Kor. 3:7) Nga ca kuti ifintu taficitike ukulingana ne fyo twale-enekela, tufwile ukwibukisha ukuti Yehova naishiba. (Esa. 26:12) E ico ifwe tulingile ukucita ifyo twingakumanisha ukucita no kucetekela ukuti akulatwafwa. Twalishininkisha ukuti akulatutungulula nangu ca kutila te kuti atutungulule mu cisungusho nga fintu alecita inshita shimo kale.—Imil. 16:6-10.
11. Fintu nshi ifyacindama ifyo twaishiba?
11 Twalishiba ukuti Yehova lyonse alaba no kutemwa, wa mulinganya kabili wa mano. Twalishiba ukuti Yehova alatasha sana pa fyo tumubombela e lyo na pa fyo tucitila bamunyinefwe na bankashi. Kabili twalishiba no kuti lyonse Yehova alalambula ababa ne cishinka kuli ena.—Heb. 11:6.
TATWISHIBA IFIKACITIKA MU BUSHIKU UBUKONKELEPO
12. Ukulingana ne fyaba pali Yakobo 4:13, 14, finshi ifyo tushaishiba?
12 Belengeni Yakobo 4:13, 14. Icishinka icacindama ca kuti tatwishiba ifyo fintu fikaba ubushiku ubukonkelepo. Muli cino calo te kuti twishibe ifingatucitikila mailo pa mulandu wa “nshita ne fintu ificitika ukwabula ukwenekela.” (Luk. Mil. 9:11) Kanshi te kuti twishibe nga ca kuti ifyo twapanga ukucita fikacitika nelyo nga tukaba abomi ilyo ifyo twapanga ukucita fikacitika.
13. Kuti twaumfwa shani nga tatwishibe ifikacitika ku ntanshi?
13 Kuti catukosela ukushipikisha nga ca kuti tatwishibe bwino ifikatucitikila ku ntanshi. Cinshi twalandila ifi? Kuti twasakamana pa fingatucitikila, kabili ifi kuti fyalenga twaleka ukuba ne nsansa. Ifyabipa nga fyacitika ukwabula ukwenekela kuti fyalenga twaba no bulanda sana kabili kuti twasakamikwa. Kabili ifyo tule-enekela nga taficitike kuti twaumfwa ububi kabili kuti twafuupuka.—Amapi. 13:12.
14. Finshi tulingile ukwishiba no kucita pa kuti tuleba ne nsansa? (Moneni ne cikope.)
14 Nga tuleshipikisha amafya, tulanga ukuti icilenga tulebombela Shifwe wa ku muulu ni co twalimutemwa, te pa mulandu wa kuti nifwe bakaitemwe. Amalyashi ya mu Baibo yalanga ukuti, tatulingile ukwenekela Yehova ukutucingilila ku fyabipa fyonse, kabili tapangila libela ifikatucitikila ku ntanshi. Alishiba ukutila kuti twaba ne nsansa nangu tatwishibe ifikatucitikila ku ntanshi. Kuti twaba ne nsansa nga ca kuti tulemulomba ukuti aletutungulula kabili tulemumfwila. (Yer. 10:23) Nga twamucetekela ilyo tulesalapo ifya kucita, ninshi tulelanda ukuti: “Yehova nga atemwa, tukaba aba mweo kabili tukacita ici nelyo cilya.”—Yako. 4:15.
Nga tuleleka Yehova aletutungulula kabili nga tulemumfwila, tulacingililwa (Moneni amaparagrafu 14-15)b
15. Finshi twaishiba?
15 Nangu ca kuti tatwishiba ifikacitika mailo, twalishiba ukuti Yehova alitulaya umweo wa muyayaya nampo nga tukekala ku muulu nelyo pano isonde. Twalishiba ukuti te kuti abepe kabili takwaba nangu cimo icingalenga afilwa ukufikilisha fyonse ifyo alaya. (Tito 1:2) Yehova fye e wingasobela ifikacitika ku ntanshi. Alanda muli Baibo ukuti: “Ndasobela ifikacitika ku ntanshi, kabili kale sana nalisobele ifintu ifishilacitika.” Mu nshita balelemba Baibo, fyonse ifyo asobele fyalicitike kabili ifyo asobela ukuti fikacitika ku ntanshi, na fyo fili no kucitika. (Esa. 46:10) Twalishininkisha ukuti takuli nangu cimo icingalenga Yehova afilwa ukututemwa. (Rom. 8:35-39) Yehova akulatusansamusha, kabili akulatupeela amano na maka pa kuti tuleshipikisha ubwafya bonse ubo twingakwata. Kuti twacetekela ukuti Yehova akulatwafwa kabili akulatupaala.—Yer. 17:7, 8.
TE KUTI TWISHIBE BWINO IFYO YEHOVA ATWISHIBA
16. Nga fintu Baibo ilanda pa Amalumbo 139:1-6, finshi Yehova aishiba pali ifwe ifyo tushingomfwikisha?
16 Belengeni Amalumbo 139:1-6. Kabumba wesu alishiba ifyo atubumba, aleshiba ifyo tutontonkanya ne cilenga tuletontonkanishisha ifyo, aleshiba ifyo tumfwa ne cilenga tuleumfwila ifyo, aleshiba ifyo tulanda ne fiba mu mitima yesu. Na kabili aleshiba ifyo tucita ne cilenga tulecita ifyo. Imfumu Davidi yalandile ukuti lyonse Yehova ali-ipekanya ukutwafwa. Bushe mumfwa shani ifi Lesa wa Maka Yonse, Uwapulamo, kabili Uwabumbile ifintu fyonse amubikako sana amano? Davidi alandile ati: “Ifyo mwaishiba pali ine fyalimpesha amano. Fyalifulisha ica kutila te kuti mfyumfwikishe.”—Amalu. 139:1-6 na futunoti.
17. Finshi fingalenga nalimo catukosela ukusumina ukuti Yehova alitwishiba bwino sana?
17 Nalimo pa mulandu ne fyatucitikilepo mu lupwa, intambi shesu, nelyo ifyo twasuminemo kale, kuti catukosela ukulamona Yehova ukuti ni Shifwe uwatutemwa kabili uwatubikako amano. Nelyo kuti twalatontonkanya atuti ifilubo twacitile kale fyalibipile sana ica kuti Yehova te kuti afwaye no kutwishiba, kabili kuti twalatontonkanya no kuti aba ukutali sana na ifwe. Ifi fine e fyo na Davidi aletontonkanya inshita shimo. (Amalu. 38:18, 21) Nalimo umuntu uule-esha na maka yakwe yonse pa kuti aaluke kabili alekonka amafunde ya kwa Lesa ayalungama, kuti alatontonkanya ati, ‘Nga ca kuti cine cine Lesa alinjishiba bwino kuti alafwaya shani ukuti ndeke ukucita ifintu ifyankosela ukuleka ukuficita?’
18. Mulandu nshi cawamina ukusumina ukuti Yehova alitwishiba bwino ukucila na pa fyo twayishiba fwe bene? (Moneni ne cikope.)
18 Kuti twasumina ukuti Yehova alitwishiba bwino ukucila na pa fyo twayishiba fwe bene, kabili alamona ifisuma ifyo tucita ukucila ne fyo tumona fwe bene. Lelo nangu ca kuti alamona ifilubo ifyo tucita, kabili alishiba icilenga tuleumfwa ifyo tumfwa, ne cilenga tulecita ifyo tucita, alitutemwa. (Rom. 7:15) Nga ca kuti twailuka ukuti lyonse Yehova aleshiba ifyo twingaba, tulakwata amaka ya kutwalilila ukumubombela ne cishinka kabili tukaba ne nsansa.
Yehova alatwafwa pa kuti tutetekele sana ifyo atulaya. Ifi acita filenga tuleshipikisha amafya ayabula ukwenekela (Moneni amaparagrafu 18-19)c
19. Finshi twaishiba bwino pali Yehova?
19 Twalishiba ukuti Yehova kutemwa. Tatutwishika nangu panono ukuti Yehova kutemwa. (1 Yoh. 4:8) Twalishiba ukuti amafunde atupeela yalanga fye ukuti alitutemwa no kuti afwaya ifintu filetuwamina. Twalishiba ukuti Yehova afwaya tukakwate umweo wa muyayaya. E co atupeelele icilubula. Icilubula ico atupeela cilenga twashininkisha ukuti nangu tulacita ifilubo kuti twamulabombela ukulingana ne fyo afwaya. (Rom. 7:24, 25) Na kabili twalishiba ukuti “Lesa alicila imitima yesu kabili alishiba fyonse.” (1 Yoh. 3:19, 20) Yehova alamona fyonse ifyo tucita, kabili alicetekela ukutila kuti twakumanisha ukucita ifyo afwaya.
20. Finshi fingalenga twilasakamana sana pa fintu ifyo tushaishiba?
20 Yehova alitweba fyonse ifyo tufwile ukwishiba. Nga twaishiba ici cishinka, tatusakamana sana pa fintu ifyo tushakwatapo amaka, kabili tubika amano ku fintu ifyacindama. Nga tulecita ifi, ninshi tulelanga ukuti twalicetekela sana Yehova “Uwaishiba fyonse.” (Yobo 36:4) Nga ca kuti tatwaishiba ifintu fimo pali ino nshita, twalishiba ukuti Yehova akatwalilila ukutusambilisha ifyo tushaishiba, kabili twalitemwa pantu tatwakaleke ukusambilila ifintu ifipya pali Lesa wesu umusuma.—Luk. Mil. 3:11.
ULWIMBO 104 Umupashi wa Mushilo Bupe Bwa Kwa Lesa
a Yesu e ukatungulula abashilika bakwe pa konaula cino calo ca kwa Satana, kanshi kuti twatila pali ino nshita alishiba ilyo kukaba inkondo ya Armagedone na lintu ‘akapwishishisha ukucimfya.’—Ukus. 6:2; 19:11-16.
b UBULONDOLOSHI BWA CIKOPE: Bawishi no mwana balelonga ifintu mu tufyola pa kuti baipekanye ilyo kushilaba ubusanso.
c UBULONDOLOSHI BWA CIKOPE: Munyinefwe uukwete amafya ale-elenganya ifyo akalaikala bwino mu calo cipya