ICIPANDE CA KUSAMBILILAMO 34
ULWIMBO 3 Mulatupeela Amaka, Twashintilila Pali Imwe
Bushe Mwalishininkisha Ukuti Yehova Alimubelela Uluse?
“Mwalinjelela imembu.”—AMALU. 32:5.
IFYO TWALASAMBILILAPO
Twalasambilila pa co tulingile ukushininkishisha ukuti Yehova alitubelela uluse, na pa fyo Baibo ilangilila ukuti alelela abantu nga balapila.
1-2. Tumfwa shani nga twaishiba ukuti Yehova natubelela uluse pa membu isho twacitile? (Moneni ne pa nkupo.)
IMFUMU Davidi yali no bulanda sana pa mulandu ne fyabipa ifyo yacitile. (Amalu. 40:12; 51:3; utulembo twa pa muulu) Na lyo line, yalilapiile icine cine, kabili Yehova ali-ibelele uluse. (2 Sam. 12:13) Ifi Yehova abelele Imfumu Davidi uluse, fyalengele yasansamuka.—Amalu. 32:1.
2 Nga filya fine cali kuli Davidi, na ifwe kuti twaba ne nsansa nga twaishiba ukuti Yehova natubelela uluse pa membu isho twacitile. Ala tulasansamuka nga twaishiba ukuti Yehova alaitemenwa ukutwelela imembu shesu, nangu fye ni membu ishikalamba, kulila fye twalapila icine cine, twayebelela imembu, kabili twalaesha na maka yesu yonse pa kuti twikabwekeshapo ukucita imembu isho twacitile. (Amapi. 28:13; Imil. 26:20; 1 Yoh. 1:9) Na kabili tulatemwa nga twaishiba ukuti Yehova nga atwelela imembu, alalabililako fye kabili ciba fye kwati tatwacitilepo ne membu!—Esek. 33:16.
Imfumu Davidi yalishikile inyimbo ishingi pa kulondolola ifyo Yehova abelela abantu uluse (Moneni paragrafu 1-2)
3-4. Bushe nkashi Jennifer aleumfwa shani pa numa ya kubatishiwa, kabili finshi twalalandapo muli cino cipande?
3 Nomba inshita shimo bamo kuti cabakosela ukusumina ukuti Yehova alibabelela uluse. Ifi fine e fyo ba Jennifer baleumfwa. Ilyo bali abaice, abafyashi babo balibasambilishe icine. Ilyo bakulileko, batampile ukucita ifyabipa mu bumfisolo. Ilyo papitileko imyaka balyalwike, baipeela na kuli Yehova babatishiwa no kubatishiwa. Ba Jennifer balandile abati: “Kale nalitemenwe sana icuma, nalecita sana ubulalelale, nalenwa sana ubwalwa, kabili nali sana ne cipyu. Nalishibe ukuti apo nalilombele Yehova ukuti ambelele uluse kabili nalilapiile, Yehova alimbelele uluse pa mulandu ne cilubula ca kwa Kristu. Na lyo line, nshashininkishe ukuti Yehova alimbelele uluse.”
4 Bushe inshita shimo cilamukosela ukushininkisha ukuti Yehova alimubelela uluse pa membu isho mwacitile kale? Nomba ibukisheni ifyo Davidi aumfwile ilyo Yehova amubelele uluse. Alishininkishe ukuti Yehova alimubelele uluse pa membu acitile, pantu Yehova wa luse sana. Ifi fine e fyo afwaya na imwe muleumfwa. Muli cino cipande, twalalanda pa co tulingile ukushininkishisha ukuti Yehova alitubelela uluse e lyo ne fyo twingacita pa kuti tushininkishe.
MULANDU NSHI TULINGILE UKUSHININKISHISHA UKUTI YEHOVA ALITUBELELA ULUSE?
5. Finshi Satana afwaya twasumina? Landeni pa ca kumwenako.
5 Nga twasumina ukuti Yehova alitubelela uluse, Satana te kuti atubepe. Muleibukisha ukuti Satana afwaya twaleka ukubombela Yehova. Kanshi alesha na maka yakwe yonse pa kuti alenge tuleke ukubombela Yehova. Pa kuti acite ifi, alalenga twasumina ukuti Yehova te kuti atubelele uluse pa membu isho twacitile. Tontonkanyeni pa mwaume uwali mu Korinti uo bafumishe mu cilonganino pa mulandu wa kuti alecita ubulalelale. (1 Kor. 5:1, 5, 13) Ilyo alapiile, Satana alefwaya aba mu cilonganino bemubelela uluse kabili bemupokelela mu cilonganino. Na kabili Satana alefwaya ulya umwaume uwalapiile aleumfwa ukuti Yehova tamubelele uluse. Ifi fyali no kulenga aba sana ne “cikonko” ica kuti aleka no kubombela Yehova. Na muno nshiku mwine Satana afwaya tulemona ukuti Yehova te kuti atubelele uluse, kabili ifi kuti fyalenga twaleka ukubombela Yehova. Lelo “twalishiba amapange yakwe.”—2 Kor. 2:5-11.
6. Finshi tufwile ukucita nga ca kuti twatwalilila ukumfwa ububi na pa numa ya kulapila pa membu isho twacitile?
6 Nga twasumina ukuti Yehova alitubelela uluse pa membu twacitile, kuti twaleka ukumfwa ububi. Nga twabembuka, mu cifyalilwa fye tulomfwa ububi. (Amalu. 51:17) Caliba fye bwino ukumfwa ububi nga twabembuka, pantu nga twaumfwa ububi, kuti twacitapo cimo pa kuti twaluke, tuleke ukucita ifyabipa lelo tulecita ifisuma. (2 Kor. 7:10, 11) Nomba nga twatwalilila fye ukumfwa ububi na pa numa ya kulapila pa membu isho twacitile, kuti twafuupuka ica kuti twaleka no kubombela Yehova. Lelo nga twasumina ukuti Yehova alitubelela uluse pa membu isho twacitile, kuti twaleka ukumfwa ububi. Lyena kuti tulebombela Yehova ukulingana ne fyo afwaya, e kutila ukulamubombela na kampingu iisuma e lyo no kulasekelela ilyo tulemubombela. (Kol. 1:10, 11; 2 Tim. 1:3) Nomba kuti twacita shani pa kuti tushininkishe ukuti Yehova alitubelela uluse?
FINSHI TWINGACITA PA KUTI TUSHININKISHE UKUTI YEHOVA ALITUBELELA ULUSE?
7-8. Mibele nshi Yehova akwata iyo aebele Mose, kabili ifi amwebele filenga twashininkisha cinshi? (Ukufuma 34:6, 7)
7 Muletontonkanya pa mibele iyo Yehova alanda ukuti e yo akwata. Ku ca kumwenako, tontonkanyeni pa fyo Yehova aebele Mose ilyo ali pa Lupili lwa Sinai.a (Belengeni Ukufuma 34:6, 7.) Nangu ca kuti Yehova alikwata imibele iisuma iingi, asalilepo ukweba Mose ati ni “Lesa wa luse kabili uwa nkumbu.” Bushe Lesa uwakwata iyi imibele kuti afilwa ukubelela umubomfi wakwe uluse nga ca kuti nalapila icine cine? Nakalya! Yehova nga akaana ukwelela umubomfi wakwe uulapile, kuti aba umunkalwe pantu ninshi takwata uluse. Nomba ifi te fyo Yehova aba.
8 Ifi Yehova atweba ukuti wa luse, ca cine e fyo aba pantu tabepa. (Amalu. 31:5) Kanshi te kuti tutwishike ifyo alanda. Nga ca kuti cilamukosela ukuleka ukumfwa ububi pa membu mwacitile kale, muleyipusha amuti: ‘Bushe nalisumina ukuti Yehova wa luse icine cine, wa nkumbu, kabili te kuti afilwe ukwelela umuntu nga alapila icine cine? Nga ca kuti nalisumina ifi, ninshi nshifwile ukutwishika ukuti alimbelela uluse.’
9. Bushe amashiwi yaba pa Amalumbo 32:5 yatusambilisha finshi pa fyo Yehova atwelela imembu shesu?
9 Muletontonkanya pa fyo Yehova alengele abalembele Baibo balanda pa fyo eleela abantu. Ku ca kumwenako, tontonkanyeni pa fyo Davidi alandile pa fyo Yehova eleela. (Belengeni Amalumbo 32:5.) Alandile ati, “Mwalinjelela imembu.” Ishiwi lya ciHebere ilyo bapilibula ukuti “mwalinjelela” pali ici cikomo, kuti lyapilibula ukuti “ukwimya,” “ukutwala ukutali,” nelyo “ukusenda.” Ilyo Yehova abelele Davidi uluse, cali kwati alimishe imembu shakwe e lyo ashitwala ukutali. Ifi Yehova abelele Davidi uluse, cali kwati amutuula icipe icafina ico asendele. (Amalu. 32:2-4) Na ifwe bene kuti twaumfwa nga fintu Davidi aumfwile Yehova nga atwelela. Nga twalapila icine cine pa membu isho twacitile, tatufwile ukutwalilila ukumfwa ububi pantu ninshi Yehova alisenda imembu twacitile, kabili alishitwala ukutali.
10-11. Bushe amashiwi ya kuti “mwali-iteyanya ukwelela” yatusambilisha finshi pali Yehova? (Amalumbo 86:5)
10 Belengeni Amalumbo 86:5. Pali ici icikomo, Davidi alandile ukuti Yehova ‘ali-iteyanya ukwelela.’ Icitabo cimo icalanda pali aya mashiwi, calanda pali Yehova ukuti: “‘Alelela,’ ‘e fyo aba.’” Cinshi calenga Yehova ale-elela? Amashiwi yakonkapo muli ici icikomo yatila: “Mulalanga sana ukutemwa ukushipwa kuli bonse abalilila kuli imwe.” Nga fintu twasambilile mu cipande cafumineko, Yehova alilaya ukuti ababomfi bakwe aba cishinka akalabalanga ukutemwa ukushipwa, kabili takatale abasha. Apo Yehova alikwata ukutemwa ukushipwa, ‘alelela umupwilapo’ bonse abalapila. (Esa. 55:7, futunoti.) Nga ca kuti cilamukosela ukusumina ukuti Lesa alelela, kuti mwayipusha amuti: ‘Bushe nalisumina ukuti Yehova alelela, e kutila alaitemenwa ukwelela bonse abalapila abamulomba ukuti ababelele uluse? Nga ca kuti nalisumina ifi, ninshi nshifwile ukutwishika ukuti alimbelele uluse ilyo namulombele ukuti ambelele uluse.’
11 Tulasansamuka nga twaishiba ukuti Yehova alishiba bwino bwino ukuti tuli babembu. (Amalu. 139:1, 2) Ifi fine e fyo Davidi alembele mwi lumbo limbi, kabili ifyo alembele kuti fyalenga twashininkisha ukuti Yehova alatubelela uluse.
TAMUFWILE UKULABA IFYO YEHOVA EBUKISHA PALI IFWE
12-13. Nga fintu Baibo ilanda pa Amalumbo 103:14, finshi Yehova ebukisha pali ifwe, kabili ifi ebukisha filenga acita cinshi?
12 Belengeni Amalumbo 103:14. Pali ici icikomo, Davidi alandile pali Yehova ukuti “alebukisha ukuti tuli lukungu.” Aya mashiwi Davidi alandile yalenga twaishiba na cimbi icilenga Yehova alebelela abantu abalapila uluse. Ni cinshi ico cine icilenga alebabelela uluse? Lyonse alebukisha ukuti tuli babembu. Pa kuti tumfwikishe ifi twalandapo, natusambililepo na fimbi pali aya amashiwi Davidi alandile.
13 Davidi alandile ukuti Yehova “alishiba bwino ifyo twapangwa.” Abumbile Adamu “ku lukungu lwa mu mushili,” kanshi alishiba ifyo abantu babumbwa ne fyo bakabila. Ku ca kumwenako, balakabila ukulya, ukulaala no kupema. Ifi fine e fyo na bantu abapwililika balekabila ukulacita. (Ukute. 2:7) Nomba ilyo Adamu na Efa babembwike, abantunse baishileba ulukungu mu nshila na imbi. Apo twatuntwike kuli Adamu na Efa, twalipyana ulubembu ululenga tulecita ifyabipa. Yehova alishiba ukuti tuli babembu, lelo Davidi alandile no kuti “alebukisha” ukuti tuli babembu. Ishiwi lya ciHebere ilyo bapilibula ukuti alebukisha, kuti lyapilibula no kuti alacitapo cimo pa kuti atwafwe. Mu kwipifya Davidi aleti, Yehova alishiba ukuti inshita shimo kuti twalufyanya, kabili nga twalufyanya kuti atwelela nga ca kuti twalapila.—Amalu. 78:38, 39.
14. (a) Finshi fimbi ifyo Davidi alandile pa fyo Yehova atubelela uluse? (Amalumbo 103:12) (b) Finshi twingasambililako ku fyo Yehova abelele Davidi uluse? (Moneni akabokoshi akaleti “Yehova Nga Atwelela Alalabako.”)
14 Finshi fimbi twingasambilila ku fyaba mu Amalumbo103 pa fyo Yehova atubelela uluse? (Belengeni Amalumbo 103:12.) Davidi alandile ukuti Yehova nga atubelela uluse, alatwala imembu shesu ukutali sana nga “filya ku kabanga na ku masamba kwatalukana sana.” Akabanga na masamba fyalitalukana sana ica kuti te kuti fikumane. Finshi tusambilila kuli aya mashiwi pa fyo Yehova acita ku membu isho tucita? Tusambililako ukuti Yehova nga atubelela uluse, ciba kwati asenda imembu shesu e lyo ashitwala ukutali sana. Alashitwala ukutali sana ica kuti takuli nangu cimo icingalenga ashitontonkanyapo na kabili, nelyo atwibukishako ukuti twalicitile isho imembu kabili te kuti atukandilepo.—Esek. 18:21, 22; Imil. 3:19.
15. Finshi twingacita nga ca kuti twatwalilila fye ukumfwa ububi pa membu isho twacitile kale?
15 Bushe ifyo Davidi alandile ifyaba mu Amalumbo 103, kuti fyalenga shani twashininkisha ukuti Yehova alitubelela uluse? Nga ca kuti tulatwalilila ukumfwa ububi pa membu isho twacitile kale, kuti twayipusha atuti, ‘Bushe nindaba ukuti Yehova alishiba ukuti ndi mubembu, no kuti abantu abalapila nge fi nalapila alabelela? Bushe ndeibukisha ifintu ifyo Yehova asalapo ukulabako, e kutila, ndeibukisha imembu isho anjelela kabili isho ashakankandilepo?’ Yehova tekalila fye ukutontonkanya pa membu isho twacitile kale. Ifi fine e fyo na ifwe tufwile ukulacita. (Amalu. 130:3) Nga twashininkisha ukuti Yehova alitubelela uluse pa membu isho twacitile, kuti twaleka ukumfwa ububi, kabili kuti twalamubombela ne nsansa.
16. Langilileni ububi bwaba mu kutwalilila ukumfwa ububi pa membu isho twacitile kale. (Moneni ne cikope.)
16 Tontonkanyeni pali ici ica kumwenako. Umuntu uutwalilila ukumfwa ububi pa membu isho acitile kale aba kwati ni namutekenya uwa kuti ilyo ale-ensha motoka, ekalile fye ukulolesha muli mira iilanga ifilecitika ku numa. Kwena caliba fye bwino ukuloleshako muli iyi mira limo limo pa kuti namutekenya aleishiba ifilecitika ku numa. Nomba pa kuti namutekenya enshe bwino motoka, afwile ukulalolesha sana ku ntanshi. Ifi fine e fyo caba na ku membu isho twacitile kale. Kwena caliba fye bwino ukutontonkanyapo limo limo pantu kuti twasambililako ku fyo twalufyenye pa kuti twikabwekeshapo. Nomba nga ca kuti twaikalila fye ukutontonkanya pa membu isho twacitile kale, kuti twalaumfwa sana ububi ica kuti twalafilwa no kubombela Lesa no mweo onse. Lelo tufwile ukulabika amano ku kubombela Yehova no kulatontonkanya sana pa calo cipya ico atulaya, umo ifintu fyabipa ‘fishakese na mu mutima wesu.’—Esa. 65:17; Amapi. 4:25.
Nga filya fine namutekenya alingile ukulalolesha sana uko aleya ukucila ukulalolesha fye muli mira iilanga ifilecitika ku numa, e fyo na ifwe tufwile ukulabika sana amano ku fisuma ifyo Yehova atulaya ukucila ukulatontonkanya fye pa membu isho twacitile kale (Moneni paragrafu 16)
TWALILILENI UKUSHININKISHA UKUTI YEHOVA ALIMUBELELA ULUSE
17. Mulandu nshi tufwile ukutwalilila ukushininkisha ukuti Yehova alitutemwa kabili alatubelela uluse?
17 Tulingile ukutwalilila ukushininkisha ukuti Yehova alitutemwa kabili alaitemenwa ukutubelela uluse. (1 Yoh. 3:19) Mulandu nshi? Pantu Satana takaleke ukutwesha pa kuti twingalamona ukuti Yehova tatutemwa no kuti te kuti atubelele uluse. Ico Satana afwaisha kulenga twaleka ukubombela Yehova. Ilyo impela ya cino calo ileyailepalama, kuti twaenekela ukuti Satana akulaesha na maka yakwe yonse ukucita ifi, pantu naishiba ukuti ashele fye ne nshita iinono. (Ukus. 12:12). Tufwile ukulalwisha Satana no kulabombela Yehova ne cishinka!
18. Finshi mufwile ukucita pa kuti mushininkishe ukuti Yehova alimutemwa kabili lyonse ali-iteyanya ukumubelela uluse?
18 Pa kuti mushininkishe sana ukuti Yehova alimutemwa, mulecita ifyo twasambililepo mu cipande cafumineko. Pa kuti mushininkishe ukuti Yehova alimubelela uluse, muletontonkanya sana pa fyo Yehova umwine alanda ukuti e fyo aba. Muletontonkanya sana pa fyo alengele abalembele Baibo balanda pa fyo abelela abantu uluse. Mwilalaba ukuti alishiba bwino ukuti muli babembu kabili akulamubelela uluse. Muleibukisha no kuti nga amwelela imembu, alamwelela umupwilapo. Nga mwacita ifi mukashininkisha ukuti Yehvoa alimubelela uluse, kabili mukalanda nga filya Davidi alandile. Atile: “Natootela mwe Yehova pa ‘kunjelela imembu’!”—Amalu. 32:5.
ULWIMBO 1 Imibele ya kwa Yehova
a Moneni icipande citila, “Palameni kuli Lesa—Yehova Ailondolola Ifyo Aba” mu Ulupungu lwa kwa Kalinda ulwa May 1, 2009.