Amepusho Ukufuma ku Babelenga
Ni lilali tukaleka ukubila imbila nsuma?
Yesu atile: “Iyi mbila nsuma ya Bufumu ikabilwa ku bantu bonse aba pe sonde pa kuti ikabe inte ku nko shonse, e lyo impela ikesa.” (Mat. 24:14) Ishiwi lya ciGriki ilyo bapilibula ukuti “impela” pali ici cikomo, pa cikomo 6 na pa cikomo 13, lishiwi lya kuti teʹlos. Ili shiwi lipilibula impela ya calo ca kwa Satana iikafika ilyo inkondo ya Armagedone ikatendeka. (Ukus. 16:14, 16) Kanshi tukatwalilila fye ukubila imbila nsuma kabili tukaleka fye ninshi kwashala fye panono ukuti inkondo ya Armagedone itendeke. Ifi twalandapo filelangilila ukuti natwalula ifyo twaishibe kale.
Kale twaishibe ukuti tukaleka ukubila imbila nsuma ilyo ubucushi bukalamba bukatendeka nga baonaula Babiloni Mukalamba. (Ukus. 17:3, 5, 15, 16) Twaishibe ukuti ilyo ubucushi bukalamba bukatendeka, ninshi inshita ya mampalanya iya kutila “Yehova abelele uluse abafuuka” yapwa. (Esa. 61:2) Na kabili twaishibe ukuti abakapusuka ubucushi bukalamba bantu aba kuti balilanga ukuti ba cishinka kuli Yehova ilyo ubucushi bukalamba bushilatendeka. Twalebalinganya ku baYuda abapuswike ilyo abena Babiloni baonawile umusumba wa Yerusalemu mu mwaka wa 607 ninshi Yesu talaisa pano isonde. Aba bantu balibashilile akashilwa ka kupusuka ilyo abena Babiloni bashilaonaula umusumba, pantu balepepa Yehova ne cishinka kabili balipatile ifyabipa. (Esek. 5:11; 9:4) Nomba filya twalebalinganya ku baYuda abapuswike fyalipusana ne fyo Yesu alandile pali Mateo 24:14. Amashiwi yaba pali ili ilembo yalangilila ukuti abantu nalimo bakakwata ishuko lya kusumina imbila nsuma ninshi kwashala fye panono ukuti inkondo ya Armagedone itendeke.
Ifi twa-alula ifyo twaishibe pali Mateo 24:14 fyalenga twalule ne fyo twaishibe pa mbila iyaba nge mfula ya mabwe iikalamba iyo Baibo yalandapo pa Ukusokolola 16:21. Pa numa ya kufwailapo ifyebo na fimbi, tusangile ukuti ifyo aya malembo yabili yalandapo tafyapusana. Cinshi twalandila ifi? Icalenga twishibe fintu Baibo yalondolola ifyo abantu bacita nga baumfwa imbila nsuma iya Bufumu. Umutumwa Paulo alembele ati, “ku balelola kwi pusukilo,” iyi mbila ni mbila nsuma pantu yaba kwati “cena icibatwala ku mweo.” Nomba ku balwani ba kwa Lesa, iyi mbila ni mbila iibi pantu yaba kwati “cena icibatwala ku mfwa.” (2 Kor. 2:15, 16) Balipata imbila ya Bufumu pantu ilalenga caishibikwa ukuti icalo ico batemwa cibi, citungululwa na Satana kabili nomba line cili no konaulwa.—Yoh. 7:7; 1 Yoh. 2:17; 5:19.
Moneni no kuti icinkunka ca mfula ya mabwe ica mampalanya, cikaba “icikalamba nga nshi.” Aya mashiwi kuti yapilibula ukuti ilyo kukaba ubucushi bukalamba, tatwakalepita abantu mu mbali pa kubila imbila kuli bena, kabili tukabila ku bantu abengi sana ica kuti abengi bakeshiba ishina lya kwa Yehova. (Esek. 39:7) Pali ilya nshita ninshi Babiloni Mukalamba nabamonaula. Bushe abantu bamo bakatemwa ukukutika imbila nsuma nga filya bengatemwa icena icanunkila bwino? Nalimo e fyo cikaba. Nalimo abantu bakebukisha nelyo bakasambilila ukuti pa myaka iingi Inte sha kwa Yehova balebilisha ukuti imipepele ya bufi yonse bakayonaula.
Ifi twalandapo fyalipalana ne fyacitike kale mu Egupti ilyo Yehova aletele Ifinkunka 10 pa bena Egupti. Ilyo Yehova “[akandile] tulesa tonse utwa mu Egupti,” abantu abengi abashali abena Israele bafumine pamo na bena Israele mu Egupti. (Ukufu. 12:12, 37, 38) Nalimo icalengele aba abashali abena Israele baye pamo na bena Israele, ni co balimwene ukuti ifinkunka fyonse 10 ifyo Mose alandilepo fyalicitike.
Bonse abakasalapo ukuba ku lubali lwa kwa Yehova ilyo Babiloni Mukalamba bakamonaula, bakakwata ishuko lya kutungilila bamunyina ba kwa Kristu abakaba pano isonde pali iyo nshita. (Mat. 25:34-36, 40) Nomba kwena inshita iyo Yesu akalapingula abantu ukuti bamo ni mpaanga ikapwa ninshi kwashala fye panono ukuti inkondo ya Armagedone itendeke, ilyo Abena Kristu abasubwa abakaba pano isonde pali iyo nshita bakapokelela icilambu cabo ica ku muulu.
Ifi ifyalwike filelangilila bwino bwino ukuti Yehova alitemwa sana abantu kabili wa luse nga nshi. Cine cine, Yehova “tafwaya umuntu nangu umo akonaike, lelo afwaya ukuti bonse bakalapile.”—2 Pet. 3:9.