Bamunyinefwe Babili abo Basontele Ukuba mwi Bumba Litungulula
PA 5 OCTOBER, 2024 ilyo kwali ukukumana kwa pa mwaka ukwa Nte sha kwa Yehova, kwali ica kubilisha icaibela. Babilishe ukuti: Munyinefwe Jody Jedele na munyinefwe Jacob Rumph balibasontele ukuba mwi Bumba Litungulula ilya Nte sha kwa Yehova. Aba bamunyinefwe bonse babili balibombela Yehova ne cishinka pa myaka iingi.
Ba Jody Jedele na bena mwabo ba Damaris
Munyinefwe Jedele afyalilwe mu citungu ca Missouri, ku U.S.A. Uko ulupwa lwa kwa munyinefwe Jedele lwaleikalila takwali ba Nte abengi. E ico munyinefwe Jedele alishibene na ba bwananyina abengi abalefuma mu ncende ishalekanalekana isha calo ca United States abaleya mu kubila imbila nsuma kuli ilya ncende. Munyinefwe Jedele alitemenwe sana ifyo aba bamunyinefwe na bankashi batemwanene ne fyo bali abaikatana. Abatishiwe pa 15 October mu 1983 ninshi ali fye umulumendo. Alitemenwe sana umulimo wa kubila imbila nsuma, kabili ilyo apwishishe isukulu lya ku sekondari atendeke bupainiya bwa nshita yonse mu September mu 1989.
Ilyo munyinefwe Jedele ali umwaice, abafyashi bakwe balemusenda pamo na nkashi yakwe mu kutandala ku Bethel. Filya abafyashi babo balebatwala mu kutandala ku Bethel fyalenge balafwaisha ukuya mu kulabombelapo, kabili ifi fine e fyo cali. Mu kupita kwa nshita bonse babili balitendeke ukubombela pa Bethel. Munyinefwe Jedele atendeke ukubombela pa Bethel ya ku Wallkill mu September mu 1990. Atampilepo ukubombela mu dipartimenti ya busaka. Lyena atendeke ukubombela mu dipartimenti iyafwilisha ababombela pa Bethel mu fya cipatala.
Pali ilya ine nshita, ifilonganino fya ciSpanish ifyali mupepi fyalefulilako, kabili bamunyinefwe aba kutungulula balefwaikwa. E ico munyinefwe Jedele atampile ukulalongana mu cilonganino cimo pali ifi, kabili atendeke ukusambilila iciSpanish. Tapakokwele alishibene na nkashi Damaris uwalebomba bupainiya mu muputule umo wine. Mu kupita kwa nshita balyupene, kabili nkashi Damaris na o atendeke ukubombela pa Bethel.
Mu 2005 balifumine pa Bethel pa kuti bengaya mu kusakamana abafyashi babo. Pa nshita balesakamana abafyashi babo, balebomba bupainiya bwa nshita yonse. Munyinefwe Jedele alisambilisheko mwi Sukulu lya Bapainiya, alibombeleko muli Komiti ya Kumfwaninamo ne Fipatala na muli Komiti ya Makuule.
Mu 2013 munyinefwe Jedele no mwina mwakwe balibetile na kabili ku Bethel pa kuti bengabombako umulimo wa makuule ayali ku Warwick. Ukutula muli ulya mwaka, balibombelapo ku Patterson na ku Wallkill. Munyinefwe Jedele alibombelapo mu Dipartimenti ya Makuule na mu Dipartimenti Ipeela Ifyebo pa fya Cipatala. Mu March mu 2023, balimusontele ukuba kaafwa muli Komiti ya Mulimo iye Bumba Litungulula. Munyinefwe Jedele alandile pa milimo yonse iyo abombapo ukuti: “Nga bakupeela umulimo umbi, inshita shimo kuti walamona kwati tawakakumanishe uku-ubomba. Nomba iyi e nshita ya kwibukisha ukuti ulingile ukushintilila pali Yehova, pantu e ulenga tulebomba imilimo yonse iyo bengatupeela.”
Ba Jacob Rumph na bena mwabo ba Inga
Munyinefwe Rumph afyalilwe mu citungu ca California, ku U.S.A. Ilyo ali umwaice, banyina balilekele ukubila imbila nsuma no kulongana, lelo balemusambilisha icine ica mu Baibo. Na kabili cila mwaka munyinefwe Rumph aletandalila banakulu abali Inte ya kwa Yehova. Aba banakulu balilengele alafwaya ukwishibilapo na fimbi pali Baibo, kabili ilyo ali ne myaka 13 alitendeke ukusambilila Baibo. Pa 27 September mu 1992, alibatishiwe ninshi ali fye umulumendo. Icawemeko ca kuti banyina balitendeke ukubila imbila nsuma no kulongana na kabili. Bawishi na bana banankwe nabo balitwalilile ukulunduluka mpaka babatishiwa no kubatishiwa.
Ilyo munyinefwe Rumph ali umulumendo, alemona ifyo bapainiya baleba ne nsansa. E ico ilyo apwishishe isukulu lya ku sekondari, alitampile bupainiya bwa nshita yonse mu September mu 1995. Mu 2000, akuukile ku calo ca Ecuador ukwali bakabila ba Bufumu abanono. Ilyo ali kulya alishibene na nkashi Inga uwa ku Canada uwali painiya wa nshita yonse, kabili mu kupita kwa nshita balyupene. Ilyo baupene batendeke ukubombela mwi tauni limo ilya mu Ecuador umwali ibumba ilinono ilya bakasabankanya. Pali ino nshita ili ibumba cilonganino icikalamba.
Mu kupita kwa nshita munyinefwe Rumph no mwina mwakwe balibasontele ukuba bapainiya baibela. Pa numa batendeke ukubombela mu muputule. Mu 2011 balibetile kwi Sukulu lya Gileadi mwi klasi lyalenga 132. Ilyo bapwishishe isukulu balibombeelepo mu fyalo 5. Balibombeelepo pa Bethel, umulimo wa bumishonari no mulimo wa bukangalila bwa muputule. Munyinefwe Rumph alibombeleko no mulimo wa kusambilisha mwi Sukulu lya Bakabila ba Bufumu.
Pa mulandu ne cikuko ca COVID-19, munyinefwe Rumph no mwina mwakwe balibwelele ku United States. Balibetile ku Bethel ya ku Wallkill kabili munyinefwe Rumph batendeke ukumusambilisha ifya kubomba imilimo mu Dipartimenti ya Mulimo. Mu kupita kwa nshita balibabwekeshe ku musambo wa ku Ecuador, kabili munyinefwe Rumph aileba muli Komiti ya Musambo. Mu 2023 babatumine ukuya mu kubombela ku Warwick. Mu 2024 munyinefwe Rumph balimusontele ukuba kaafwa muli Komiti ya Mulimo. Alandile pa milimo abombapo ukuti, “Icilenga ukuti umulimo ube uwaibela, te cifulo uko ulebombela, lelo bantu abo ulebomba nabo.”
Tulatasha pa fyo aba bamunyinefwe babombesha kabili ‘tulatwalilila ukucindika ababa nga bena.’—Fil. 2:29.