Bushe Mfwile Ukuleka Ukwensha Motoka?

Bushe ubu e bwafya na imwe mukwete? Nga e bwafya mukwete, finshi mwingacita pa kuti mumone nga mufwile ukuleka ukwensha motoka nelyo iyo?

Mu fyalo fimo, banamutekenya nga bafisha imyaka imo, balingile ukuya kuli badokota pa kuti babapime, bamone nga kuti batwalilila ukwensha motoka nelyo iyo. Abena Kristu abekala mu fyalo fya musango uyu, bafwile ukukonka aya amafunde kabili balingile ukukonka ifyo babeba. (Rom. 13:1) Nampo nga mwikala mu calo ca musango uyu nelyo iyo, kwaliba ifyo mufwile ukutontonkanyapo pa kuti mumone nga kuti mwatwalilila ukwensha motoka nelyo iyo.

TONTONKANYENI PA FYO MWENSHA MOTOKA

Akabungwe kamo akalanda pa fyakuma abakalamba aka mu United States kalandile ukuti abakalamba balingile ukuyipusha amepusho yakonkapo pa kuti bamone nga kuti batwalilila ukwensha motoka nelyo iyo:

• Bushe cilankosela ukwishiba ifishibilo fya pa musebo, nelyo cilankosela ukumona nga pafiita?

• Bushe cilankosela ukulolesha mu mamira no kumona bwino bwino ifili pa musebo?

• Bushe cilankosela ukucita bwangu ifintu, pamo nga ukunyantuka bwangu pa mafuta no kunyanta pa mabuleki?

• Bushe nyensha panono panono ica kuti ndalenga ne myotoka shimbi nasho shalaenda panono panono?

• Bushe kwaliba ifyacitika, ica kuti kwempe fye nga nali mu busanso, nelyo bushe motoka yandi yalikwesauka pa mulandu wa kuti nalipunkapo mu fintu?

• Bushe bakapokola balinjiminikapo pa mulandu wa kukanaensha bwino?

• Bushe nalishipulapo ilyo nde-ensha?

• Bushe ndanwa umuti uwingalenga nafilwa ukwensha bwino?

• Bushe balupwa lwandi ne fibusa fyandi balinjebapo ukuti imyenseshe yandi ilabasakamika?

Nga ca kuti mwa-asuka ukuti ee icipusho cimo nelyo fibili pali ifi, ninshi nalimo mufwile ukwealulako ifyo mwensha motoka. Ku ca kumwenako, nalimo kuti mwacefyako imiku mwensha motoka, maka maka ubushiku. Cila nshita muleiceeceeta pa kuti mulemona nga mule-ensha fye bwino. Kuti mwaipushako lupwa lwenu nelyo cibusa wenu pa kuti amwebeko ifyo mwensha. Nalimo kuti mwayasambililako ne fyo mwingalacita pa kuti mule-ensha bwino motoka. Nomba nga mwa-asuka ukuti ee amepusho ayengi pali aya, kuti cawama mwaleka fye ukwensha motoka.a

MULELEKA AMASHINTE YA MAFUNDE YA MU BAIBO YALEMUTUNGULULA

Inshita shimo te kuti twiluke no kwiluka ukuti twalileka ukwensha bwino motoka. Na kabili kuti catukosela ukulanda pa kuleka ukwensha motoka. E ico mashinte nshi aya mafunde ya mu Baibo ayengalenga mwatontonkanyapo bwino kabili mwasalapo bwino ica kucita? Natulandeko pali yabili.

Muleba abaicefya. (Amapi. 11:2) Nga twakula, tatumwenekesha, tatumfwikisha, imicincili ilanaka kabili tatwangufyanya ukucita ifintu pa kuti tuicingilile nga fintu twalecita kale. Ku ca kumwenako, abantu abengi nga bakula balaleka ukuteya ifyangalo fimo pantu balishiba ukuti umuntu nga akula cilanguka ukuicena. Ifi fine e fyo twingacita na pa kwensha motoka. Umuntu uwaicefya, nga akula kuti aleka ukwensha motoka pa kuti eba mu busanso. (Amapi. 22:3) Na kabili, nga ca kuti abantu balandapo pa myenseshe yakwe, alakutika.—Linganyeniko 2 Samwele 21:​15-17.

Tatufwaya ukuba no mulandu wa mulopa. (Amala. 22:8) Umuntu nga tensha bwino motoka, kuti acena umuntu nelyo kuti amwipaya. Umuntu nga atwalilila fye ukwensha motoka nangu ca kuti tensha bwino, kuti ayipaya nelyo kuti aipaya umuntu umbi. Nga aipaya umuntu, kuti aba no mulandu wa mulopa.

Nga ca kuti mufwile ukusalapo nampo nga kuleka ukwensha motoka nelyo iyo, mwilamona ukuti nga mwaleka ukwensha, abantu bakamusuula. Yehova alimutemwa pa mulandu ne mibele yenu iisuma, pamo nga ifyo mwaba abafuuka, abaicefya ne fyo mubika amano ku bantu banenu. Na kabili Yehova alimulaya ukuti akulamusansamusha kabili akulamwafwa. (Esa. 46:4) Takatale amusha. E ico mulemulomba ukuti alemwafwa pa kuti mwingatontonkanyapo bwino pali ili lyashi, na pa kuti mulekonka amashinte ya mafunde ya mu Baibo ilyo mulesalapo nampo nga kuleka ukwensha motoka nelyo iyo.