Baibolo iyo Bapangile Ukuti Ilekokola

INTE SHA KWA YEHOVA balitemwa sana Baibolo ukucila ifyo batemwa impapulo shimbi. Tulaibelenga lyonse kabili tulaibomfya ku kusambilisha abantu imbila nsuma iya Bufumu bwa kwa Lesa. (Mat. 24:14) E ico, ilyo balepanga Baibolo ya Amalembo ya Calo Cipya iyapitulukwamo iya mu 2013 iya mu ciNgeleshi, bamunyinefwe balibombeshe pa kushininkisha ukuti ifyo balebomfya pa kupanga, fintu fyakosa pa kuti Baibolo ikalemoneka bwino kabili ikalekokola.

Ilyo bamunyinefwe ababombela kuli fimashini ifipulinta mu Wallkill, New York, ku U.S.A., balelanshanya no mukalamba wa kampani iipanga inkupo sha fitabo umusango wa Baibolo balefwaya, abebele ukuti, “Iyo Baibolo mulefwaya ukupanga takwaba. Kwena ca bulanda, lelo icishinka ca kuti amaBaibolo ayengi bayapanga fye ukuti yalemoneka bwino nga nabayabika pe tebulo nelyo pa shelufu, tabayapanga ukuti yalekokola.”

AmaBaibolo yamo aya Amalembo ya Calo Cipya ayo babalilepo ukupanga tayalekokola. E ico bamunyinefwe aba ku Wallkill, balibebetele sana ifyo balebomfya ukupangilako inkupo, ifya kukakatikilako ne nshila ya kukakatikilamo inkupo pa kuti bapange Baibolo iingalakokola nangu umuntu aibomfya sana ku ncende ukwaba imicele iyapusanapusana. Pa numa, balipangile amaBaibolo ayo batumiine ba Nte aba mu fyalo umwaba imicele iyayafya sana, pa kuti bamone nga kuti yakokola.

Ilyo papitile imyeshi 6, baliyabweseshe kabili bamunyinefwe baliwemyeko inshila sha kuyapangilamo no kuyatuma na kabili. AmaBaibolo yonse ayo batumine yalicilile pali 1,690. Yamo yalyonaike ukwabula no kwenekela. Ku ca kumwenako, Baibolo imo baliipitilepo kuli motoka, imbi yalilokelwe pantu baiishile pa nse ubushiku bonse, imbi nayo yalibundile ilyo kwali mulamba wa hurricane.

Mu 2011, ilyo baleesha amaBaibolo, fimashini ifyangufyanya sana ukupulinta fyalishitilwe kabili bafitwele ku Wallkill na ku Japan mu Ebina. AmaBaibolo ya kupeela abantu abasangilwe ku kukumana yalefwaikwa kabili aya amaBaibolo yalingile ukumoneka cimo cine nangu ca kuti bayapulintile ku ncende shibili ishapusana.

Inkupo Ishalepempemana

Mu kutampa kwa 2012, pali fimashini ifya ku Wallkill na ku Ebina batendeke ukupulintilapo Baibolo ya Amalembo ya Calo Cipya iyafumine mu 1984, ukubomfya fimo ifya kupangila inkupo ifipya. Na lyo line, iyi mashini iipya yalebomfya glu na kapepala ako balebika pa kati pa kupanga inkupo, ifyo bashatalile abesha ku maBaibolo batumine. Nomba ishi nkupo tashaleololoka. E ico balilekele ukupanga ishi nkupo.

Abo baleshitako fimo ifya kupangila inkupo batile balishibe icalengele ukuti inkupo shilepempemana, balandile no kutila bonse abapanga iyi nkupo balakwatu ubu ubwafya. Mu nshita ya kunenuka no kutendeka ukupanga inkupo ishatikama, bamunyinefwe balitwalilile fye ukufwaisha ukupanga inkupo iyanaka, iisuma kabili iingakokola. Pa numa ya myeshi nalimo ine iya kweshaesha ukupanga inkupo iyo balefwaya, basukile basanga inshila iyalebomba bwino ica kuti balitampile na kabili ukupulinta amaBaibolo ukubomfya inkupo iyanaka, kabili iishalepempemana.

Apo ukukumana kwa pa mwaka ukwa Watch Tower Bible and Tract Society of Pennsylvania kwali no kubako pa 5 October, 2013, Ibumba Litungulula lyapekenye ukuti Baibolo ya Amalembo ya Calo Cipya iyapitulukwamo ikafume pali ubu bwine bushiku. Ababombela kuli fimashini fya kupulintilako bapokelele Baibolo yonse pa kompyuta pali Cisano, pa 9 August, 2013, kabili ubushiku bwakonkelepo balitendeke ukupulinta. Pa 15 August e lyo bapulintile Baibolo ya kubalilapo pali ifi fimashini. Pa milungu 7 iyakonkelepo, abalebombela kuli fimashini fya ku Wallkill na ku Ebina balebomba akasuba no bushiku ukupulinta no kutuma amaBaibolo ukucila pali 1,600,000, kabili yalifulile na bonse abasangilwe ku kukumana kwa pa mwaka balipokeleko imo imo.

Nangu ca kuti iyi Baibolo isuma kabili yalikosa, ifyebo fyabamo fyalicilapo ukuwama pantu fya kupususha abantu. Ubushiku fye bumo pa numa ya kupokelela Baibolo iipya, nkashi umo uwa ku United States alembele ukuti, “Apo natukwata Baibolo iipya, nomba ndeumfwikisha ifyabamo.”