Amashinte ya Mafunde ya mu Baibolo Ayengamwafwa Incito nga Yapwa
Incito nga yapwa kuti calenga ifintu ukwafya sana pantu ninshi tamwakulakwata indalama sha kushitamo ifyo mulekabila, kabili kuti mwalaumfwa ububi no kusakamikwa sana. Ukukonka amashinte ya mafunde ya mu Baibolo ayakonkapo kuti kwamwafwa ukushipikisha.
Mule-ebako abanenu ifyo muleumfwa.
Ifyo Baibolo ilanda: “Ukutemwa kwa kwa cibusa wa cishinka takupwa.”—Amapinda 17:17.
Incito nga yapwa kuti mwaumfwa ububi, kuti mwakalipa, kuti mwafulunganishiwa nelyo ukulamona kwati tapali ifyo mwingacita ifingabomba bwino. Nga ca kuti mule-ebako balupwa ne fibusa ifyo muleumfwa kuti bamukoselesha. Na kabili kuti bamwafwa no kusanga incito imbi.
Mwalacilamo ukusakamana.
Ifyo Baibolo ilanda: “E ico, mwilasakamikwa pa bushiku bwa mailo, pantu ubwa mailo bukaba na masakamika ya buko.”—Mateo 6:34.
Baibolo itukoselesha ukulapangila libela ifya kucita. (Amapinda 21:5) Na lyo line itukoselesha ukukanalasakamikwa sana pa fya ku ntanshi. Ilingi line tulasakamana pa fintu ifishingacitika no kucitika. Calicindama ukubika amano ku fyo tufwile ukucita muli ubo bwine ubushiku.
Baibolo yalilanda pa fintu ifingatwafwa ukushipikisha nga natusakamikwa. Pa kuti mwishibilepo na fimbi belengeni icipande citila “Ifya Kucita nga Natusakamikwa Nelyo Tuli na Mafya.”
Mufwile ukwalulako ifyo mubomfya indalama.
Ifyo Baibolo ilanda: “Nalisambilila inkama . . . iya kukwata ifingi ne ya kubulwa.”—Abena Filipi 4:12.
Mufwile ukusambilila ifya kwikala ukulingana ne fyo ifintu fili. Mu kucita ifi mubimbilwe no kwalulako ifyo mubomfya indalama pa kuti tamulebomfya indalama ishingi ukucila pa sho mukwata. Mwilakongola indalama icikongolekongole.—Amapinda 22:7.
Pa kuti mumone na fimbi ifyo mwingacita pa kuti muleikala ukulingana ne indalama isho mukwete, moneni icipande citila “Ifya Kucita pa Kuti Mulebomfya fye Indalama Ishinono Isho Mukwata.”
Mulebomfya bwino inshita.
Ifyo Baibolo ilanda: “Mule-enda mano mano . . . , kabili mulebomfya bwino inshita yonse iyo mwashukila.”—Abena Kolose 4:5.
Nangu ca kuti pali ino nshita tamukwete incito iyashintililwapo , mulingile ukutantika bwino ifya kubomfya inshita no kulafikonka. Ukucita ifi kukalenga mukalebomba bwino ifintu kabili cikalenga mukaleumfwa bwino e lyo no kumfwa ukuti mwalicindama.
Mulealuka ifintu nga fya-aluka.
Ifyo Baibolo ilanda: “Mu kucucutika konse mwaba no busuma.”—Amapinda 14:23.
Muleipeelesha ukubomba incito ishapusana ku yo mwalebomba. Mulebomba ne ncito ishimoneka kwati tashacindama nelyo isho bengamupeela fye amalipilo ayanono ukupusanako ne fyo balemulipila uko mwalebomba.
Mwilanenuka.
Ifyo Baibolo ilanda: “Ulucelo tanda imbuto shobe ukufika icungulo wileka ukuboko kobe kutuushe; pantu tawishibe ishikamena.”—Lukala Milandu 11:6.
Mwilanenuka ukufwaya incito. Mule-ebako abantu ukuti mulefwaya incito. Kuti mwaebako balupwa, abanenu, abo mwalebomba nabo kale na bena mupalamano. Muleyako ku makampani ayafwaila abantu incito, mulefwayako umo bakambatika ifipepala fya kuti balefwaya aba ncito, kabili kuti mwamonako na pa mawebusaiti ya makampani ukumona nga balefwaya ukwingisha abantu amacito. Muleibukisha ukuti pa kuti musange incito kuti mwatwala amapepala ayengi apo muleipushisha incito ku makampani ayengi.