Abantu Amamilioni 6 Balifwa ku Bulwele bwa Korona—Finshi Baibolo Yalandapo?

Ukulingana ne fyo akabungwe ka World Health Organization (WHO) kalandile, ilyo calefika pa 23 May, 2022, abantu ukucila pali 6 milioni balifwa ku cikuko ca COVID-19. Nomba ukulingana ne fyo aka kabungwe ka WHO kalembele pa 5 May 2022, katile abantu abafwile bengi nga nshi ica kuti balicilile na pa mpendwa iyo tulandile. Katile mu mwaka wa 2020 na 2021, “abantu abafwile ku cikuko ca COVID-19 nelyo pa mulandu wa cikuko ca Korona . . . balicilile nalimo pali 14 milioni.” Bushe paliba ifyo Baibolo yalandapo pa fikuko fya musango uyu?

Bushe Baibolo yalilandapo pa fikuko?

• Yesu alisobele ukuti kukaba ifikuko mu nshiku isho beta ukuti “inshiku sha kulekelesha.”—Luka 21:11; 2 Timote 3:1.

Ifyo Yesu asobele filefikilishiwa muno nshiku. Nga mulefwaya ukwishibilapo na fimbi, belengeni icipande citila “Finshi Twingeshibilako Inshiku sha Kulekelesha, Nelyo ‘Inshita ya Mpela’?”

Ifyo Baibolo ilanda filatusansamusha

• “Lesa wa cisansamushi conse, uutusansamusha mu macushi yesu yonse.”—2 Abena Korinti 1:3, 4.

Abantu abengi abafwilwapo ifibusa na balupwa wabo balaba ne nsansa nga babelenga ifyaba mu Baibolo. Belengenipo na fimbi mu cipande citila “Ifingamwafwa nga Mwafwilwa—Ifyo Mwingacita Pali ino Nshita” e lyo ne citila “Icitabo Icingafwa Abafwililwe.”

Baibolo yalilanda icikapwisha ifikuko

• “Ubufumu bwenu bwise. Ukufwaya kwenu kucitwe pano isonde nga mu muulu.”—Mateo 6:10.

Nomba line fye “Ubufumu bwa kwa Lesa” bukacitapo fimo pa kuti kwikaba “umwikashi uukatila: ‘Nindwala.’” (Marko 1:14, 15; Esaya 33:24) Tambeni vidio itila Bushe Ubufumu bwa kwa Lesa ni Cinshi? pa kuti mwishibilepo na fimbi pa buteko bwa ku muulu ne fyo bukacita.

Tulemulomba ukuti musambililepo na fimbi pa fyo Baibolo yalanda pa kuti imwe no lupwa lwenu mukanonkelemo mu fisuma ifyo Baibolo ilanda ne fyo yatulaya.