Finshi Baibolo Yalandapo pa Filala?

• “Icalo ca China catile uno mwaka kwalikaba sana kabili kwaliuma sana ukucila ulusuba lonse ulwapita.”—The Guardian, September 7, 2022.

• “Imyaka 5 iyakonkana, ku ncende shimo mu Africa mukaba icilala.”—UN News, August 26, 2022.

• “Kukaba icilala mu fyalo mupepi na hafu ifyaba ku Bulaya, kabili ici cilala cilemoneka ukuti takwabala ukubapo icilala ca musango uyu mu myaka 500 iyapita.”—BBC News, August 23, 2022.

Abasambilila sana baleti ici cilala cikatwalilila kabili cikalabipilako fye. Bushe kwalibako isubilo lya kuti ifintu fikawama ku ntanshi? Finshi Baibolo yalandapo?

Ifyo amasesemo ya mu Baibolo yalandapo pa filala

Ifyo Baibolo yasobele ukuti fikalacita muli shino nshiku:

• “Mu ncende shimo shimo mukaba . . . ifipowe.”—Luka 21:11.

Ilingi line nga kuli icilala, kulaba ifipowe. Ifi ifipowe filenga abantu balacula no kufwa, filafikilisha ifyo Baibolo yasobele.—Ukusokolola 6:6, 8.

Icilelenga ifilala ukubipilako

Baibolo ilalanda icilelenga ifilala filebipilako. Itila:

• “Umuntu . . . takwata amaka ya kutungulula intampulo shakwe.”—Yeremia 10:23.

Aya mashiwi yalola mu kuti abantu te kuti ‘batungulule intampulo shabo’ nelyo ukuiteka abene. Ifyabipa ifyo basalapo ukucita filalenga kwaba ifilala na menshi ukucepa.

• Basayantisti abengi balisumina ukuti ifyo abantu bacita fyalilenga isonde lyalakaba sana, ne ci calilenga ukuti kuleba ifilala mwi sonde lyonse.

• Ifyo abantu abafunushi bacita na mafunde abantu bapanga ukwabula ukutontonkanya pa fyabipa ifikafumamo fyalilenga batemaula imiti, balakowesha umwela na menshi, no kukanalasunga bwino ifyabumbwa. Ifi bacita filalenga amenshi yalacepa no kukowela.

Na lyo line Baibolo ilatupeela isubilo.

Bushe ifintu fikawama ku ntanshi?

Baibolo yalaya ukut Lesa akapwisha ubwafya bwa amanshi ukwafya ubwabako pali ino nshita. Akacita shani ifyo?

1. 1. Lesa “akonaula abaleonaula isonde.” (Ukusokolola 11:18) Akafumyapo abalenga amenshi yacepa e kutila abantu ababipa, abafunushi abacita ifilenga isonde lileonaika.—2 Timote 3:1, 2.

2. 2. “Impanga iyaumisha ikaba nge cishiba.” (Esaya 35:1, 6, 7) Lesa akawamya fyonse ifyaonaika pa mulandu wa filala kabili akalenga isonde likabe paradaise umukaba amenshi ayengi.

3. 3. “Mwalolesha pe sonde, pa kuti mulipeele ifingi; mwalicindamika nga nshi.” (Amalumbo 65:9) Lesa nga apaala isonde, mwi sonde lyonse mu kaba ifya kulya ifingi kabili ifisuma nga nshi, na menshi ayasuma.