Ni Kateka Nshi Mukasala?—Finshi Baibolo Yalandapo?

Mu milungu fye inono i-ileisa, abantu mu fyalo ifyalekanalekana mwi sonde lyonse bakalasala bakateka. Abantu baletontonkanya pali kateka bakasala.

Finshi Baibolo yalandapo?

Bakateka abantunse te kuti bacitile abantu fyonse ifyo bafwaya

Baibolo yalilanda icalenga bakateka abantunse balefilwa ukucitila abantu fyonse ifyo bafwaya.

• “Mwitetekela bakankaala, nangu muntunse, uushingamupususha. Wafuma umupashi wakwe, abwelela ku mushili; ubushiku bulya bwine amatontonkanyo yakwe yaloba.”—Amalumbo 146:3, 4.

Nangu fye ni bakateka ababomba bwino umulimo wabo na bo bene balafwa. Na kuba, te kuti balande ukuti nga bafwa abakabakonkapo bakatwalilila ukucita ifisuma fyonse ifyo balecita.—Lukala Milandu 2:18, 19.

Icishinka ca kuti, Baibolo yalilanda ukuti Lesa tapangile abantu ukuti baleiteka.

• “[Umuntu] takwata amaka ya kutungulula intampulo shakwe.”—Yeremia 10:23.

Bushe kwaliba umbi uwingateka bwino abantu muno nshiku?

Kateka uo Lesa asala

Baibolo ilondolola ukuti Lesa alisonta kateka uwingateka bwino kabili uo twingacetekela, uyo kateka ni Yesu Kristu. (Amalumbo 2:6) Yesu e Mfumu ya Bufumu bwa kwa Lesa, ubuteko ubutekela ku muulu.—Mateo 6:10.

Bushe mukasala Yesu ukuti e o alemuteka? Baibolo ilalanda umulandu ici cipusho cacindamina:

• “Tomoneni umwana mwaume, pa kuti eba no bukali na pa kuti mwilobela mu nshila, Pantu ubukali bwakwe bulabilima bwangu. Balipaalwa bonse abooba muli ena.”—Amalumbo 2:12.

Ino e nshita mulingile ukusalapo. Ubusesemo bwa mu Baibolo bulangilila ukuti Yesu atendeke ukuteka mu 1914 kabili nomba line Ubufumu bwa kwa Lesa bukafumyapo amabufumu yonse aya bantunse.—Daniele 2:44.

Nga mulefwaya ukwishibilapo na fimbi pa fyo mwingacita pa kuti muletungilila imitekele ya kwa Yesu, belengei icipande citila “Tulingile Ukulatungilila Ubufumu bwa kwa Lesa Pali ino Nshita!”