Bushe Ifyalo Kuti Fyabombela Pamo Ukuwamya Imiceele pa Kuti Tailetele Ubonaushi?—Finshi Baibolo Yalandapo?

Pa mulungu pa 20 November 2022, kwali ukukumana kwa COP27 ukwa kabungwe ka United Nations uko balelanda pa kwaluka kwa miceele. Intungulushi na bakalapashi abasangilweko kuli uku kukumana balisuminishenye ukulapeela ifyalo ifipiina indalama isha kwafwa ukucefyako amasanso no kubomfya nga kwacitika amasanso ayesako pa mulandu wa kwaluka kwa miceele. Lelo abantu abengi balisumina ukuti ifi tafyakalenge imiceele ikawamineko.

• “Nintemwa ukuti twasuminishanya ukubikako indalama sha kwafwa abalecula pa mulandu no kwaluka kwa miceele. Lelo natwishiba ukuti ukucita ifi kweka fye takwakalenge imiceele ukuwama . . . Isonde lyesu lili mu busanso.”—E fyalandile ba António Guterres, bakalemba mukalamba aba kabungwe ka United Nations, pa 19 November, 2022.

• “Isonde lyonse lili mu busanso bwa kuti imiceele kuti yalenga ifintu fyabipa icine cine.”—E fyalandile ba Mary Robinson, abali bakateka ba calo ca Ireland kabili abali ba UN High Commissioner for Human Rights, pa 20 November, 2022.

Abacaice balesakamana sana pa fyo isonde likaba ku ntanshi. Nomba bushe ifyalo fyalekanalekana kuti fyabombela pamo no kucita ifyo fyalaya, e kuti ukucita ifingalenga imiceele yawaminako? Finshi Baibolo yalandapo?

Bushe ifyalo fikabombela pamo kabili bushe fikakumanisha ukucita ifyo filepanga?

Baibolo ilanda ukuti, nangu ca kuti amabuteko kuti yacita ifingalenga imiceele yabako eefilya, lelo te kuti balenge yawama. Moneni imilandu ibili iyalenga:

• “Icapondama te kuti cololoke.”—Lukala Milandu 1:15.

  Umwalola aya mashiwi: Amabuteko te kuti yacite fyonse ifyo yafwaya ukucita pa mulandu wa kuti abantu te kuti baiteke abene. (Yeremia 10:23) Nangu ca kuti ifyalo kuti fyaikatana, te kuti bapwisha amafya ayaba mu calo, nangu bengabombesha shani.

• “Pantu abantu bakaba abaitemwa, abatemwa indalama, . . . abashifwaya ifipangano.”—2 Timote 3:2, 3.

  Umwalola aya mashiwi: Baibolo yalisobele bwino bwino ukuti abantu abengi muno nshiku bali no kuba abaitemwa kabili tabakalafwaya ukubombela pamo pa kuti ifintu fiwame.

Umulandu twingabela ne subilo

Na lyo line, ifyo isonde likaba ku ntanshi tafyashintilila pa fyo amabuteko ya bantunse yalaya. Lesa alibikako katekwa we sonde, Yesu Kristu. Baibolo ilanda pali Yesu Kristu ukuti:

• “Bukateka bukaba pa kubeya kwakwe. Kabili akenikwa ati Kabilo wa cipesha amano, Lesa wa maka, Wishi wa pe, Cilolo wa mutende.”—Esaya 9:6.

Yesu e Mfumu ya Bufumu bwa kwa Lesa, nelyo ubuteko bwa ku muulu. (Mateo 6:10) Alikwata amaka, amano, kabili alafwaya ukusunga bwino isonde e lyo nabekalamo. (Amalumbo 72:12, 16) Ilyo akalateka, ubuteko bwa ku muulu bukafumyapo “abaleonaula isonde” kabili akalenga isonde likabe bwino na kabili.—Ukusokolola 11:18; Esaya 35:1, 7.

Pa kuti mwishibilepo na fimbi pa cikapwisha amafya ukwaluka kwa miceele kwaleta, belengeni icipande citila “Ukwaluka kwa Miceele ne fyo Ikaba ku Ntanshi—Finshi Baibolo Yalandapo?