Ubwafya bwa Kutalalilwa ku Bantu Bulekulilako fye—Ifyo Baibo Yalandapo

Ukulingana ne fyo bafwailishe nomba line mwi sonde lyonse,a pa bantu abali 4 umo ninshi alomfwa ukutalalilwa.

• “Umuntu fye uuli onse te mulandu neko ekala nelyo mukalamba nelyo mwaice kuti atalalilwa.”—E fyalandile ba Chido Mpemba, ba cochair ba kabungwe ka World Health Organization’s Commission on Social Connection.

Abantu abengi bamona kwati abengatalalilwa fye bakoloci na balya aba kuti baba beka, lelo icishinka ca kuti uuli onse fye kuti atalalilwa nampo nga mwaice, aliba no bumi ubusuma, alikala bwino, alyupa nelyo ukuupwa bonse fye kuti batalalilwa. Ukukanalanshanya na bantu bambi e lyo no kutalalilwa kuti fyalenga umuntu alwala amalwele, ukubikako fye na malwele ya matontonkanyo.

• “Ukutalalilwa kwalibipa sana kabili takupelela fye pa kumfwa ububi,” e fyalandile ba Dr. Vivek Murthy, ababomba incito ya kulepula abantu mu U.S.. Balandile no kuti: “Ukutalalilwa nelyo ukukanakwata abakulanshanya nabo kwabipa fye nga filya fine ukupeepa imishanga ya fwaka 15 mu bushiku bumo kwabipa.”

Ifyo Baibo ilanda

Kabumba wesu tafwaya ukuti tuletalalilwa nelyo ukukanakwata abakulanshanya nabo. Ukufuma fye na kale Lesa afwaya ukuti abantu balekwata ifibusa ifisuma.

• Ishinte lya mu Baibo: “Lesa atile: ‘Te cisuma umuntu ukulaikala fye eka.’”—Ukutendeka 2:18.

Lesa afwaya ukuti twaba ifibusa na ena. Alitulaya ukuti akapalama kuli ifwe nga ca kuti tuleibikilishako ukupalama kuli ena.—Yakobo 4:8.

• Ishinte lye funde: “Balipaalwa abaishiba ukuti balakabila ifya kwa Lesa, pantu ubufumu bwa mu muulu bwabo.”—Mateo 5:3.

Lesa afwaya ukuti tulemupepela pamo na bantu bambi. Nga tulecita ifi tulaba ne nsansa nga nshi.

• Ishinte lye funde: “Tutontonkanye pa banensu ku kucincishanya ku kutemwa kabili ku kubomba imilimo iisuma, twilapuswa ku kulongana, . . . lelo tulekoseleshanya.”—AbaHebere 10:24, 25.

Nga mulefwaya ukwishibilapo na fimbi ifingamwafwa ukukanalatalalilwa, belengeni icipande citila “Ilyo Ifya Kumfwaninamo Fifulile E lyo Abantu Baletalalilwa Sana.”