Abantu Balileka Ukucetekela Intungulushi sha Fikansa fya Calo—Finshi Baibo Yalandapo?

Mu mwaka wa 2024 muli no kuba ukusala bakateka mu fyalo ifyalekanalekana mwi sonde. Na lyo line, abantu abengi balileka ukucetekela intungulushi sha fikansa fya calo.

• Abengi abafwailishe mu America batile “ifyo intungulushi sha fikansa fya calo ishingi shabikako amano, kufwaya fye ukuisekesha” ukucila ukubika amano ku kubombela abantu.a—Pew Research Center, September 19, 2023.

Abalumendo na bakashana abengi nabo tabacetekela intungulushi sha fikansa fya calo.

• “Ifyo abacaice muno nshiku babikako amano, kwishiba ifingapwisha amafya bakwata mu mikalile, lelo ifyo bafwailishe filanga ukuti abacaice abengi balandile ukuti intungulushi sha fikansa fya calo tashabika amano ku kwishiba ifingapwisha amafya bakwata.”—The New York Times, January 29, 2024.

• “Abafwailishe basangile ukuti abacaice abengi balicetekelapo abantu ababika amavidio pa intaneti, ukucila intungulushi sha fikansa fya calo.”—The Korea Times, January 22, 2024.

Bushe kuti twacetekela ukuti intungulushi sha fikansa fya calo shikalenga ifintu ukuwama ku ntanshi? Ni bani tulingile ukucetekela?

Muleishiba bwino abo mwingacetekela

Calicindama sana ukwishiba bwino abo mulingile ukucetekela. Baibo itila “uushaishiba atetekela fye fyonse ifyo aumfwa, lelo uwacenjela alalolekesha apo alenyanta.”—Amapinda 14:15.

• Nga mulefwaya ifingamwafwa ukwishiba ifyebo mwapokelela nga fya cine nelyo nga fya bufi, belengeni icipande citila “Ifyo Twingaicingilila ku Malyashi ya Bufi.”

Na cimbi ca kuti, ne ntungulushi sha fikansa fya calo ishaba ne cishinka tashakwata amaka ya kucita fyonse ifyo shilefwaya. E co Baibo ilandila ukuti:

• “Mwilasuubila muli bakateeka, mu mwana wa muntu, uushingapususha.”—Amalumbo 146:3. Baibo ya Diocese of Mbala.

Intungulushi iyo mwingacetekela

Baibo ilondolola ukuti Lesa alisala intungulushi yafikapo kabili iyacetekelwa, e kutila Yesu Kristu. (Luka 1:32, 33) Yesu e Mfumu ya Bufumu bwa kwa Lesa nelyo ubuteeko ubwaba ku muulu.—Mateo 6:10.

• Moneni umulandu mwingacetekela Yesu e lyo ne fyo akacita pa kupwisha amafya tukwata. Belengeni icipande citila “Bushe Imfumu ya Bufumu bwa kwa Lesa Nani?” e lyo ne citila “Finshi Ubufumu bwa kwa Lesa Bukacita?”