Bushe Abasambilila Balisumina Ukuti Yesu e ko Aali?

Abasambilila balishininkisha ukuti Yesu e ko aali. Icitabo ca Encyclopaedia Britannica ica mu 2002 calanda pa fyo bakalemba ba malyashi ya kale abaliko mu nshita ya Bena Kristu ba kubalilapo balandile pali Yesu na Bena Kristu ba kubalilapo. Catile: “Aya amalyashi ya kale, yalanga ukuti abalelwisha Abena Kristu tababalile abatwishika nga Yesu e ko aali, nangu ca kuti ku kupwa kwa myaka ya ba 1700 na muli ba 1800 e lyo na ku kutampa kwa ba 1900, kwali abatendeke ukulanda ati Yesu taaliko.”

Mu 2006, icitabo cilanda pali Yesu na pa fyashulwa catile: “Takwaba uuli onse uwasambilila ilyashi lya kale uukaana ukuti Yesu, umuYuda kabili umwana wa kwa Yosefe, e ko aali; abengi balisumina ukuti pali ino nshita, balishiba ifingi ifyo Yesu alecita ne fyo alesambilisha.”

Baibolo itila Yesu muntu uwa cine. Ilalanda na mashina ya fikolwe fyakwe, abafyashi bakwe e lyo na baice bakwe. (Mateo 1:1; 13:55) Mu Baibolo mwaliba na mashina ya bakateka abalumbuka abaali pano calo pa nshita imo ine na Yesu. (Luka 3:1, 2) Aya amashina yalafwa abasambilila ilyashi lya kale ukwishiba ukuti ifyo Baibolo yalanda fya cine.