Bushe Lesa e Wapangile Satana pa Kuti Aletwesha?

Icasuko ca mu Baibolo

Baibolo itila Lesa te wapangile Satana Kaseebanya. Apangile umuntu uwaishileba Satana Kaseebanya. Baibolo ilanda pali Lesa ati: “Imilimo yakwe yalifikapo, pantu inshila shakwe shonse mulinganya. Lesa uwa cishinka, uushaba na lufyengo; alilungama kabili alitambalala.” (Amalango 32:3-5) Kanshi ukulingana na aya amashiwi kuti twatila, pa nshita imo Satana Kaseebanya ali uwapwililika kabili uwalungama. Ali malaika, umwana wa kwa Lesa.

Pali Yohane 8:44, Yesu alandile ati Satana Kaseebanya “tatwalilile mu cine.” Kanshi pa nshita imo, Satana aali mu cine kabili talecita ifyabipa.

Lelo, nga filya caba ku babomfi ba kwa Yehova bambi aba ku muulu na pano isonde, malaika uwaishileba Satana alikwete ubuntungwa bwa kusala ukucita icalungama nangu icabipa. Ilyo asalile ukucita ifyo Lesa akeenye no kulenga Adamu na Efa ukubembukila Lesa, ailengele umwine ukuba Satana, ne li ishiwi lipilibula ukuti “Uukaanya.”—Ukutendeka 3:1-5; Ukusokolola 12:9.