Bushe Mfwile Ukupepa ku Batakatifu?

Ifyo Baibolo ilanda

Awe iyo. Baibolo ilanda ukuti tulingile ukupepa fye kuli Lesa, mwi shina lya kwa Yesu. Yesu aebele abasambi bakwe ukuti: “E ico imwe pepeni ifyo amuti: Shifwe wa mu muulu, ishina lyenu libelwe akatiina.” (Mateo 6:9) Kanshi, Yesu aebele abasambi bakwe ukupepa fye kuli Lesa, te ku batakatifu, bamalaika, nelyo ku uuli onse.

Na kabili, Yesu aebele abasambi bakwe ati: “Nine nshila ne cine no mweo; takuli uwisa kuli Tata, kano aishila muli ine.” (Yohane 14:6) Ni Yesu fye e o Lesa apeela amaka ya kulandilako abantu kuli Lesa.—AbaHebere 7:25.

Bushe kuti cabipa nga ndepepa kuli Lesa e lyo na ku batakatifu?

Pa Mafunde 10 pali ne funde ilyo Lesa atile: “Ne Yehova Lesa obe ndi Lesa, wa kalumwa.” (Ukufuma 20:5) Bushe ifi Lesa atile “ndi Lesa wa kalumwa,” aloseshe mwi? Pa tulembo twa pe samba pali ili ilembo muli Baibolo ya New American Bible, patila “afwaya ukulamupepa fye eka.” Kanshi Lesa afwaya ukuti e o tulepepa fye eka, kabili e o tulingile ukulungatikako amapepo yesu epela.—Esaya 48:11.

Nga twapepa ku muntu uuli onse, ku batakatifu nelyo bamalaika, Lesa alafulwa. Ilyo umutumwa Yohane afwaile ukupepa malaika, malaika alimukenye. Amwebele ati: “Awe, ico te co! Ndi musha mubiyo, kabili umunabo wa bamunonko abakwata ubunte bwa kwa Yesu. Pepa Lesa.”—Ukusokolola 19:10.