Bushe Umuntu aba Shani nga Afwa?

Icasuko ca mu Baibolo

Baibolo itila: “Aba mweo balishiba ukuti bakafwa; lelo abafwa, tabaishiba akantu nangu kamo.” (Lukala Milandu 9:5; Amalumbo 146:4) Kanshi nga twafwa, tatwishiba nangu cimo. Abafwa tabatontonkanya, tabacita icili conse, nelyo ukumfwa icili conse.

“Ku lukungu e ko ukabwelela”

Ilyo Lesa alandile na Adamu, alilondolwele ifyo fwe bantu tuba nga twafwa. Pa mulandu wa kuti Adamu alibembwike, Lesa amwebele ati: “Uli lukungu, kabili ku lukungu e ko ukabwelela.” (Ukutendeka 3:19) Ilyo Lesa ashilapanga Adamu “ku lukungu lwa mu mushili,” Adamu taliko. (Ukutendeka 2:7) Kanshi, ilyo Adamu afwile, abwelele ku mushili.

Ifi fine e fyo ciba na ku bantu abafwa muno nshiku. Baibolo ilanda pa bantu ne finama ukuti: “Fyonse fibili fyafumine ku lukungu, na fyonse fibili fibwelela ku lukungu.”—Lukala Milandu 3:19, 20.

Imfwa te mpela ya muntu

Baibolo ilinganya imfwa ku kulaala utulo. (Amalumbo 13:3; Yohane 11:11-14; Imilimo 7:60) Umuntu uuli mu tulo teshiba icili conse icilecitika. E fyo caba na ku bantu abafwa, tabaishiba akantu nangu kamo. Lelo Baibolo isambilisha ukuti Lesa kuti abuusha abafwa nga filya fine umuntu uuleele utulo bengamubuusha. (Yobo 14:13-15) Ku bantu abo Lesa akabuusha, imfwa te mpela yabo.