Abantu bakeshiba ukuti ni we kapekape, kabili nabo bene bakulakupeela. Baibolo itila:
“Mulepeela, na imwe abantu bakulamupeela. . . . Ku cipimo ico mupiminako bambi, e ko na imwe bakamupimina.”—Luka 6:38.
“Ifyo mucita kuli bambi, e fyo nabo bakulacita kuli imwe.”—Luka 6:38, Contemporary English Version.
2: Nga wa-afwa abantu, ninshi uleyafwa we mwine!
Ukucitila bambi ifisuma kulalenga walaumfwa ukuti walicindama kabili kulalenga wakwata ne nsansa ishifuma mu kupeela. Baibolo itila:
“Mwaba insansa ishingi mu kupeela ukucila ishaba mu kupokelela.”—Imilimo 20:35.
“Ilyo wapekanya umutebeto, ita abapiina, abalemana, na balemana amolu, e lyo ne mpofu; e lyo ukaba ne nsansa, pantu tabakwete ica ku kulambula nangu cimo.”—Luka 14:13, 14.
Abacaice Abasakamana Abantu
Abacaice abasakamana abantu baba fye mpanga yonse! Natulandeko pali bamo.
“Limo nga ndefwaya ukwikala fye mu cipuna no kulatamba TV, ntontonkanya pali ba mayo na batata abali ku ncito na pa fyo balabwela abanaka. Ico cilenga naima no kusuka imbale e lyo no kuwamya mu ng’anda. Ndapangila na bafyashi bandi kofi pantu bali-itemwa sana. Bamayo nga bafika pa ng;anda balalanda abati, ‘Iye ifyo mu ng’anda mulemoneka bwino! E lyo muli na kacena akasuma. Natasha sana mwana wandi!’ Ndomfwa bwino sana ukucitila ba mayo na batata ifintu ifisuma.”—Casey.
“Abafyashi bandi lyonse balansakamana. Balampeela fyonse ifyo nkabila mu bumi. E ico umwaka wapwile ilyo motoka yabo yafwile, nalibapeele indalama sha kulungishishamo nangu ca kutila pa sho nasungile pashele fye shinono. Kwena balikeene, lelo na ine nalibapatikishe ukupoka. Mfwile ukwafwa abafyashi bandi ukucila na pa fyo nabafwile. Kabili nalitemenwe nga nshi ilyo nabapeeleko indalama.”—Holly.
Bushe walishiba? Inte sha kwa Yehova abacaice abengi, balimona ubusuma bwaba mu kwafwa bambi ukusambilila Baibolo. Bamo baliya na ku fyalo fimbi uko aba kusambilisha abantu Baibolo bacepa.
“Nalikuukile ukufuma ku United States no kuya ku Mexico ku kusambilisha abantu Baibolo. Limo ndafilwa ukwafwilisha abalekabila indalama nelyo ifintu fimbi, pantu nshakwata indalama. Lelo nasanga ukuti icacindama sana, kubomfya inshita yandi na maka mu kushimikila abantu ifya kwa Lesa, ukucila ukubapeela indalama ne fintu fimbi.”—Evan.
Kuti na-afwa shani bambi?
Bushe kuti watemwa ukuba ne nsansa ishifuma mu kwafwa abantu? Fimo ifyo wingacita ni fi.
Pa kwafwa balupwa lobe:
Ulewamya mu ng’anda na mu muputule, no kusamfya imbale—nangu tabakwebele ukucita ifyo
