Bushe Ubusesemo Cinshi?

Icasuko ca mu Baibo

Ubusesemo kuti twabulondolola ukuti mashiwi ayafuma kuli Lesa, ayalondolola ifyo Lesa afwaya ukucita. Baibo ilanda pali bakasesema ukuti “umupashi wa mushilo e walengele balande amashiwi ayafumine kuli Lesa.” (2 Petro 1:20, 21) Kanshi kasesema muntu uwale-eba abantu amashiwi ayafumine kuli Lesa.—Imilimo 3:18.

Ni nshila nshi Lesa alebomfya pa kweba bakasesema amashiwi yakwe?

Lesa alebomfya inshila ishapusanapusana pa kuti ebe bakasesema amashiwi yakwe:

• Ukulemba. Lesa alibomfeshe iyi nshila ilyo alembele Amafunde 10 ayo apeele Mose.—Ukufuma 31:18.

• Alebomfya bamalaika pa kulanda na bakasesema. Ku ca kumwenako, Lesa abomfeshe malaika pa kulondolwela Mose ifyo ali no kuyalanda kuli Farao imfumu iyaleteka icalo ca Egupti. (Ukufuma 3:2-4, 10) Nga kuli amashiwi ayo Lesa alefwaya ukuti kasesema akayelanda ukwabula ukwalulamo ishiwi nangu limo, aletuma malaika ukuyaeba kasesema ayo amashiwi, nga filya fine acitile ilyo aebele Mose ukuti: “Ufwile ukulemba aya amashiwi, pantu ndepangana icipangano na iwe na bena Israele ukulingana na aya amashiwi.”—Ukufuma 34:27.a

• Ifimonwa. Inshita shimo Lesa alelenga bakasesema bamona ifimonwa ninshi balelola no kulola kabili nabeshiba fyonse ifilecitika. (Esaya 1:1; Habakuki 1:1) Fimo balemonako no ko fyalecitika ica kuti bamo abalemona ifimonwa baleumfwa kwati nabo emo bali mufilecitika. (Luka 9:28-36; Ukusokolola 1:10-17) E lyo pa nshita shimbi Lesa alelenga bamona ifimonwa ninshi balelola, lelo tabeshibe ifilecitika. (Imilimo 10:10, 11; 22:17-21) Na kabili Lesa alelanda na bakasesema ukupitila mu kulota ifiloto.—Daniele 7:1; Imilimo 16:9, 10.

• Umupashi e walebatungulula. Bakasesema tabalelanda ifyo baletontonkanya, lelo Lesa alebafwa pa kuti balelanda amashiwi yakwe. Ifi filomfwana ne fyo Baibo ilanda, itila: “Umupashi wa kwa Lesa e watungulwile abalembele Amalembo yonse aya mushilo.” Aya mashiwi kuti bayapilibula no kuti “Amalembo yonse yantu yaputwamo kuli Lesa.” (2 Timote 3:16; Baibele wa Mushilo) Lesa abomfeshe umupashi wa mushilo, nelyo amaka ayo abomfya, pa kweba ababomfi bakwe ifyo alefwaya ukucita. Nangu ca kuti bakasesema balelanda amashiwi ya kwa Lesa, abene e balesala inshila ya kuyalandilamo.—2 Samwele 23:1, 2.

Bushe ubusesemo lyonse bulanda fye pa fikacitika ku ntanshi?

Awe, amasesemo ya mu Baibo tayalanda fye pa fikacitika ku ntanshi. Na lyo line, ifintu ifingi ifyo Yehova alanda filosha ku fikacitika ku ntanshi, nangu ca kuti inshita shimo talanda mu kulungatika. Ku ca kumwenako, ilingi line bakasesema ba kwa Lesa balesoka abena Israele pa fyabipa ifyo balecita. Nga ca kuti baumfwila ukusoka ifintu fyali no kubawamina, lelo nga ca kuti bakaana ukuba ne cumfwila ifintu fyali no kubabipila. (Yeremia 25:4-6) Ifyalecitikila abena Israele fyalelingana ne fyo balesalapo ukucita.—Amalango 30:19, 20.

Amasesemo ya mu Baibo ayashilanda pa fikacitika ku ntanshi

• Inshita imo ilyo abena Israele balefwaya ukuti Yehova abafwe, atumine kasesema ku kubalondolwela ukuti icalengele Yehova akaane ukubafwa nico tabaleumfwila amafunde yakwe.—Abapingushi 6:6-10.

• Ilyo Yesu alandile no mwanakashi umwina Samaria, alandile pa fintu ifyo uyu mwanakashi alecita kale, kabili icalengele Yesu eshibe ifi nico umupashi wa mushilo walimwafwile. Nangu ca kuti talandilepo ifili fyonse pa fyali no kucitika ku ntanshi, uyu mwanakashi amwitile ukuti kasesema.—Yohane 4:17-19.

• Ilyo Yesu balemulubulwisha, abalwani bakwe bamufimbile pa menso no kumuuma, e lyo balemweba abati: “Nga niwe kasesema twebe! Nani akuuma?” Tabalemweba ukuti alande ifikacitika ku ntanshi, lelo balefwaya umupashi wa mushilo umwafwe ukwishiba abalemuuma.—Luka 22:63, 64.