Umulumendo alemona abantu balya pa Ng’anda ya Bufumu

ABACAICE BEPUSHA UKUTI

Cinshi Ningile Ukwila ku Ng’anda ya Bufumu?

Cila mulungu, Inte sha kwa Yehova balalongana pa Mayanda ya Bufumu. Finshi ficitika pa Mayanda ya Bufumu kabili bushe kuti fyakunonsha?

Finshi ficitika pa Ng’anda ya Bufumu?

Pa ng’anda ya Bufumu epo tusambilila ifyo twingalabomfya ifyaba mu Baibolo. Ifyo tusambilila kuti fyakwafwa:

ukwishiba icine pali Lesa.
ukwishiba umwalola ifilecitika pali ino nshita.
ukuba umuntu umusuma.
ukukwata ifibusa ifisuma.

Bushe walishiba ukuti, icifulo apo Inte sha kwa Yehova balonganina bacita ukuti Ing’anda ya Bufumu pantu basambilila sana pa Bufumu bwa kwa Lesa nga balelongana?—Mateo 6:9, 10; 24:14; Luka 4:43.

Mulandu nshi ulingile ukusangilwako?

Ifyebo basambilila kuti fyakwafwa. Amashinte ya mu Baibolo ayo basambililapo ku kulongana kwa Nte sha kwa Yehova yakalenga ‘ukanonke amano.’ (Amapinda 4:5) Ici cilolele mu kuti Babilo kuti yakwafwa ukulasala bwino ifya kucita. Na kabili kuti yalenga waishiba amasuko ku mepusho ayakalamba pamo nga:

Iyi e mitwe imo imo iya malyashi ya mu Baibolo iyo basambilisha pa kulongana kwa pa mpela ya mulungu:

Mulandu Nshi uo Tulingile Ukunakila ku Butungulushi bwa Baibolo?
Ni kwi Twingasanga Ubwafwilisho mu Nshita ya Macushi?
Ifyo Ubufumu Bwa Kwa Lesa Buletucitila Pali Ino Nshita.

“Uo nsambilila nankwe ku sukulu alishile ku kulongana. Twalikele nankwe kabili twalebomfya nankwe ifitabo twakwete. Pa numa ya kulongana anjebe ukuti alitemenwe sana ifyo abantu baleyasukapo. Anjebele no kuti uko apepa tabakwata ifitabo fya kubomfya pa kulongana nga fintu ifwe twakwata.”—E fyalandile Brenda.

Bushe walishiba ukuti, tabakakulipilishe nga waya ku Ng’anda ya Bufumu kabili ta kuba kusonkesha imituulo?

Abo mukaba nabo pa kulongana bakakukoselesha. Baibolo itila umulandu umo uo Abena Kristu balingile ukulalonganina pamo ni ‘kukoseleshanya.’ (AbaHebere 10:24, 25) Ukubishanya na bantu ababika sana amano kuli Lesa e lyo na ku bantu bambi ukucila ifyo babika amano ku kucita ifya kuisekesha kuti kwalenga waumfwa bwino.

“Limo pa numa ya kwinuka ku sukulu ndanaka sana kabili ndomfwa ubulanda nomba nga naya ku Ng’anda ya Bufumu abo tulongana nabo balansansamusha. Nga twainuka ku kulongana ndaba ne nsansa kabili ndakwata amaka ya kubomba ubushiku bukonkelepo.”—E fyalandile Elisa.

Bushe walishiba ukuti? Kwaliba ifilonganino fya Nte sha kwa Yehova ukucila pali 120,000 mwi sonde lyonse kabili bakumanina mu ncende ukucila pali 60,000. Cila mwaka Amayanda ya Bufumu nalimo 1,500 yalakuulwa pa kuti abaleisa ku kulongana balekwata umwa kulonganina.a

Ifyo abanobe balanda

“Ilyo nali ku sukulu lya ku sekondari, uo nalesambilila nankwe alishilepo ku kulongana, kabili alitemenwe ukumona abantu aba mishinku yalekanalekana balesambilila fimo fine. Tapakokwele sana abakalamba ba ncito balishile ku kulongana, kabili balipapile sana ilyo bamwene ukuti tulabomfya sana Baibolo. Ilyo namwene ifyo batemenwe calengele na ine ntemenweko ukulongana!”—E fyalandile Jessica.

“Nasanga ukuti ukulongana kulalenga nilasakamana sana. Tulasambilila ifyo twingaba ne nsansa, ifyo twingaba abantu basuma, e lyo na fimbipo. Lyonse nga nafuma ku Ng’anda ya Bufumu ndomfwa bwino kabili ndakoseleshiwa.”—E fyalandile Timothy.

“Abaume bamo abo naitile ku kulongana, pa numa ya kulongana batile: ‘Ico nacishila nacilafwaya fye ukusangamo ifilubo mu fyo wasuminamo. Nomba nacisanga ukuti ifyo nasuminamo e fya bufi!’ Na kabili batile balitemenwe ifyo Inte sha kwa Yehova batemwa abantu. Batile: ‘Nangu ca kuti e muku wa kubalilapo bamwenepo, bampokelele kwati kale banjishiba!’”—E fyalandile Jacob.

“Kulaba inshita imo iyo ng’umfwa ukutila ukulongana fye nga kwapwa nalaya ku ng’anda. Nomba ilyo tulelongana ndaleka ukumfwa ifi. Pa numa ya kulongana ndatendeka ukulanshanya na bantu kabili nshibukisha ne cacilenga ndefwaya ukuya bwangu ku ng’anda. Ukulongana kwalilenga nakwata ifibusa ifisuma.”—E fyalandile Madison.

a Pa kuti wishibe uko wingalonganina, kabiye pa “Ukulongana Kwesu” lyena utininke apatila “Fwayeni Apa Kulonganina Mupepi na Uko Mwikala.”