ABACAICE BEPUSHA UKUTI
Finshi Ningacita pa Kuti Abafyashi Bandi Bancetekele?
Ifyo ulingile ukwishiba
Nga ulecita ifingalenga abantu bakucetekela, abafyashi bobe kuti bakucetekela sana. Ukumfwila amafunde ya bafyashi bobe kwaba kwati kulipila inkongole. Walikwata inkongole sha kumfwila abafyashi bobe, kabili nga ‘ulelipila sana ishi nkongole,’ abafyashi bobe bakulakukongwesha na shimbi, e kutila bakulakulundilako ubuntungwa. Nomba nga taulebomfwila, te ca kutwishika ukuti tabakakucetekele sana kabili bakulakukaanya no kucita ifintu fimo.
Palapita inshita pa kuti abafyashi bakucetekele. Ufwile ukutwalilila ukucita ifingalenga abafyashi bobe bakucetekela. Nga ulecita ifi mu kupita kwa nshita abafyashi bobe bakakucetekela kabili bakakulundilako no buntungwa.
ICACITIKE: “Ilyo nali umusepela, nalishibe bwino ifyo abafyashi bandi balefwaya ndecita, e ico nalecita kwati ndekonka ifyo balenjeba ukucita, lelo mu bumfisolo nalecita ifyo nalefwaya. Ici calengele abafyashi bandi balefilwa ukuncetekela. Ilyo papitile inshita, naishileiluka ukuti: Nga ulefwaya abafyashi bobe bakucetekele no ku kulundilako ubuntungwa, taulingile ukulabepa. Lelo ulingile ukulacita ifingalenga bakucetekela.”—E fyalandile Craig.
Ifyo wingacita
Ulelanda icishinka, nangu ca kuti nacikosa ukucita ifyo. Bonse tulalufyanya, lelo nga ulebepa pa kuti ufise ifyo walufyenye (nelyo nga ulefisa ifyebo fimo pa kuti abantu beishiba ifishinka) abafyashi bobe kuti balekelela fye ukukucetekela. Nomba nga ulelanda icishinka lyonse kabili nga ulesumina ifilubo, abafyashi bobe bakamona ukutila naukula kabili bakakucetekela.
“Ukulufyanya te kwingalenga abafyashi bobe baleka ukukucetekela, lelo ukukanaba ne cishinka e kwingalenga baleka ukukucetekela.”—E fyalandile Anna.
Baibolo itila: “Tufwaya ukuba aba cishinka muli fyonse.”—AbaHebere 13:18.
Ifyo ufwile ukutontonkanyapo: Abafyashi bobe nga bakwipusha uko uleya ne fyo uleya mu kucita, bushe ulabeba ifishinka fyonse? Nelyo nga bakwipusha uko waile ne fyo waile mu kucita, bushe ulafisa ifyebo fimo ifyo balefwaya ukwishiba?
Ulebika amano ku fintu. Ulekonka amafunde yonse aya pa ng’anda. Ulebomba bwangu imilimo ya pa ng’anda. Kabili wilacelwa uko ulingile ukuya nelyo ukucelwa ukucita ifyo ulingile ukucita. Ulecita na fyonse ifya ku sukulu ifyo ulingile ukucita. Kabili ulekonka inshita abafyashi bakweba ukubwela pa ng’anda.
“Nga ca kuti abafyashi bakusuminisha ukuya mu kwangala na banobe kabili bakupeela ne nshita ulingile ukubwela e lyo wapula mu nshita bakwebele, te kuti bakusuminishe umuku ukonkelepo ukuya mu kwangala na banobe!”—E fyalandile Ryan.
Baibolo itila: “Cila muntu ali no kuisendela icipe cakwe umwine.”—Abena Galatia 6:5.
Ifyo ufwile ukutontonkanyapo: Bushe ulacita ifintu mu nshita? Bushe ulabomba imilimo ya pa ng’anda iyo ufwile ukubomba? Kabili bushe ulakonka amafunde abafyashi bobe bakupeela, ukubikako fye na yo ushatemwa?
Uletekanya. Nga ca kuti walilenga abafyashi bobe baleka ukukucetekela, pa kapita inshita pa kuti bakakucetekele na kabili. Kanshi ufwile ukutekanya.
“Nalyumfwile ububi ilyo abafyashi bandi bakeene ukunundilako ubuntungwa ilyo nakuliileko. Nshaishibe ukuti inshita shimo nangu umuntu akuliilako, kuti atwalilila ukucita ifintu ngo mwaice. Nalipwishe abafyashi bandi pa fyo ningacita pa kuti bancetekele. Nangu ca kuti palipitile inshita, balincetekele. Kabili naishileishiba ukuti ukukula mu myaka te kulenga umuntu aba uwacetekelwa, lelo ifyo acita e filenga abantu bamucetekela.”—E fyalandile Rachel.
Baibolo itila: “Muleilinga mwe bene.”—2 Abena Korinti 13:5.
Ifyo ufwile ukutontonkanyapo: Finshi fimo ifyo wingacita ifingalenga abafyashi bobe bakucetekele (nelyo bakucetekele na kabili)?
Ifyo wingacita: Kuti wapanga ukulacita ifintu mu nshita, ukulabomba imilimo ya pa ng’anda, ukulabwela bwangu pa ng’anda, nelyo ukucita ifintu fimbi. Ufwile ukwebako abafyashi bobe ifyo upangile ukucita, kabili ufwile ukubepusha ifyo wingacita pa kuti bakucetekele. Lyena ufwile ukwesha na maka ukukonka ifyo Baibolo ilanda ukuti: “Mufuule ubuntu bwa kale ubwalingana ne mibele yenu iya kale.” (Abena Efese 4:22) Mu kupita kwa nshita abafyashi bobe bakamona ifyo ulelunduluka!